1 Nba, n badenmailu, n ye Isa la ko Kibaro Ɲuma la ko labila ai la, n ka mɛn nase ai ma, ai ka a lamira, ai sɛɛbɛ donnin mɛn ma, 2 ai kisinin mɛn fɛ, ni ai ka a mira ikomin n ka a lase ai ma ɲa mɛn ma. Ni wo tɛ, ai ra la a la fuu rɔ.

3 N ka mɛn sɔrɔn, n da wo lase ai ma ko fɔlɔ ri: Ɲenematɔmɔnin faanin an julumunilu le la ko rɔ, ikomin Kitabu ka a fɔ ɲa mɛn ma. 4 A su donda le, a la saya tele sawana lon a wulira ka bɔ saya rɔ, ikomin Kitabu ka a fɔ ɲa mɛn ma. 5 A ka a jɛrɛ yiraka Sefasi la, wo kɔ rɔ a la talibidenba tan ni filailu. 6 Wo kɔ rɔ, a ka a jɛrɛ yiraka lemɛniya mɔɔ kɛmɛ loolu (500) a ni kɔ la waati kelen dɔ. Wo siyaman ye ii nii la fanan, kɔni do ra faa. 7 Wo kɔ rɔ, Yakuba ka a yen, a la talibidenbailu bɛɛ ka a yen ikɔ tuun.

8 Tɔɔ la a ka a jɛrɛ yiraka nde fanan na, nde mɛn kɛnin ikomin den mɛn sɔrɔnda a sɔrɔn waati taminnin. 9 Baa nde le talibidenba dɔɔmannin di. A ma kan ka fɔ n ma ko «talibidenba,» ka a masɔrɔn n tɛrɛ ra Alla la lemɛniya jama bɛnsɛnkɔnintɛya. 10 Kɔni Alla la hina rɔ, a ka n kɛɲa mafalen tende. A ka hina mɛn natɛɛ n ma wo ma kɛ fuu rɔ, ka a tɛrɛn nde baarara le ka tamin talibidenba doilu bɛɛ la. Nde tɛ kɔni Alla la hina le tɛrɛ n fɛ. 11 Wo rɔ, ni a kɛra nde ri, ni a kɛra iile ri, an ye ɲin de kawandili kɛla. Ai fanan da la wo la.

12 Nba, an ye kawandili kɛla ko Ɲenematɔmɔnin da wuli ka bɔ saya rɔ, aile doilu ri se a fɔla fanan di ko mɔɔ faanin tɛ wulila ka bɔ saya rɔ? 13 Ni mɔɔ faanin tɛ wulila ka bɔ saya rɔ, wo rɔ Ɲenematɔmɔnin jɛrɛ fanan ma wuli ka bɔ saya rɔ. 14 Nba, ni Ɲenematɔmɔnin ma wuli ka bɔ saya rɔ, kawandili bɔ kun tɛrɛ tɛ wo ri an bolo wo rɔ, ai la lemɛniya fanan di to fuyan. 15 Mɛn taminnin wo la, a kɛnin de ko an da wuya fɔla sereya bɔ Alla la ko rɔ wo rɔ, baa an da a fɔ ko a ra a la Mɔɔ Ɲenematɔmɔnin nawuli ka bɔ saya rɔ. Ka a tɛrɛn ni mɔɔ faanin tɛ wulila ka bɔ saya rɔ, wo kɔrɔ le ko Alla ma a fanan nawuli ka bɔ saya rɔ. 16 Baa ni mɔɔ faaninilu tɛ wulila ka bɔ saya rɔ, Ɲenematɔmɔnin fanan tɛ wulila ka bɔ saya rɔ wo rɔ. 17 Nba, ni Ɲenematɔmɔnin tɛrɛ ma wuli ka bɔ saya rɔ, ai la lemɛniya ra kɛ fuu ri, ai fanan ye ai julumunilu rɔ wo rɔ fɔlɔ. 18 Wo kɔrɔ le ko, mɛn tɛrɛ ra lemɛniya Ɲenematɔmɔnin ma, woilu faara, woilu ra tunun wo rɔ. 19 Ni an ka an jii la Ɲenematɔmɔnin dɔ an na dunuɲaratɛɛ ɲin de dɔrɔn dɔ, wo rɔ andeilu makininkininnin ka tamin mɔɔilu bɛɛ la.

20 Kɔni Ɲenematɔmɔnin da wuli ka bɔ saya rɔ fewu! Mɔɔ fɔlɔ wulinin de a ri ka bɔ saya rɔ, mɔɔ faaninilu tɛma. 21 Baa saya nanin mɔɔ do le fɛ, wo ɲa ma, mɔɔilu fanan ye wulila ka bɔ saya rɔ mɔɔ do le fɛ. 22 Baa ikomin, mɔɔ bɛɛ ye faala le Adama fɛ, wo ɲa ma, mɔɔ bɛɛ fanan di wuli ka bɔ saya rɔ Ɲenematɔmɔnin fɛ. 23 Kɔni mɔɔ bɛɛ ni a la waati lanin de, Ɲenematɔmɔnin de mɔɔ fɔlɔ ri mɛn wulira ka bɔ saya rɔ. Wo kɔ rɔ, a la mɔɔilu fanan di wuli ka bɔ saya rɔ a na waati rɔ. 24 Wo wa tamin, a laban wa se, Isa ri na mansayailu ni se tiiya ni fankamailu bɛɛ tiɲan, ka mansaya don a Fa Alla bolo. 25 Baa a fɛrɛ tɛ ye fɔɔ Isa ye mansaya kɛ le haan Alla ye a juuilu bɛɛ la a sen kɔrɔ waati mɛn na. 26 Juu mɛn ye halakila tɔɔ la, wo le saya ri. 27 Baa Kitabu ra a fɔ ko, «A ra fen bɛɛ la a sen kɔrɔ.»* Kɔni a ka a fɔnin ko fen bɛɛ ra la a sen kɔrɔ, wo gbɛnin ko Alla tɛ woilu rɔ mɛn ka fen bɛɛ la ale sen kɔrɔ. 28 Fen bɛɛ wa la a sen kɔrɔ, wo rɔ ale jɛrɛ, Alla Dencɛ fanan di la Alla sen kɔrɔ mɛn ka fen bɛɛ la a sen kɔrɔ, kosa Alla ye to fen bɛɛ kun na ko bɛɛ rɔ.

29 Ni wo ɲa tɛ, mɔɔ mɛnilu sunnin ji rɔ mɔɔ faaninilu la ko rɔ woilu ye nfen ɲininna? Ni mɔɔ faaninilu tɛ wulila ka bɔ saya rɔ muumɛ, nfenna mɔɔilu ye sunna ji rɔ woilu la ko rɔ? 30 Andeilu fanan, nfenna andeilu ye gbalo da kɔrɔ yan waati bɛɛ? 31 N badenmailu, n ye saya da kɔrɔ lon lon. N ye n jɛrɛmatɔɔla ai la ko rɔ baa ai tonin Maari Isa Ɲenematɔmɔnin fɛ, n da n kali wo le la, tuɲa le a ri. 32 Ni n ka dalifen jamanniilu kɛlɛ Ɛfɛsi so kɔndɔ adamadenilu la koilu le dɔrɔn dɔ, wo munanfan ɲuman tɛrɛ n ma wo rɔ? Ni mɔɔ faaninilu tɛrɛ tɛ wulila ka bɔ saya rɔ,

«An ye dɔɔnnin kɛ, ka an min

baa an di sa sini.»*

33 Do kana ai majuuwaya ka a masɔrɔn, «Teri juuilu ye sɔn ɲuma tiɲanna le.» 34 Ai ye hankili sɔrɔn fanan ikomin a dahanin ɲa mɛn ma, ka ai la hakɛ koilu lalɔ. Baa aile do ma Alla lɔn, n ye ɲin fɔla ai la maloya le ma.

35 Do ri ɲininkali kɛ ko, «Mɔɔ faaninilu ye wulila ka bɔ saya rɔ di? Ii ye nala faribanku su ɲuman dɔ?» 36 Hankilidɔɔ! I wa si foyi i la sɛnɛ rɔ waati mɛn na, a tɛ fɛrɛn na a ma sa fɔlɔ. 37 I tɛ si ju foyila kɔni fɔɔ a kisɛ dɔrɔn, binbiriba wala lannifen gbɛrɛ. 38 Kɔni Alla le si lafɛrɛnna a ju ri bonya ikomin a duman a yɛ ɲa mɛn ma. Ale le si su bɛɛ ju kɛɲa latɛɛla a ma.

39 Nimafen bɛɛ fari tɛ kelen di. Mɔɔ fari ye a danna, sobo fari ye a danna, kɔnɔ fari ye a danna, jɛɛ fari ye a danna. 40 Sankolo fariilu ye ye, dunuɲa fariilu ye ye. Sankolo fariilu nɔɔrɔ ye a danna, dunuɲa fariilu nɔɔrɔ ye a danna. 41 Tele nɔɔrɔ ye a danna, karo nɔɔrɔ ye a danna, loloilu fanan nɔɔrɔ ye ii danna, lolo kelen kelen bɛɛ nɔɔrɔ ye a danna.

42 Mɔɔ faaninilu wa wuli ka bɔ saya rɔ, a ye kɛla wo ɲa le ma. Faribanku mɛn ye sudonna, a ri se tiɲanna. Kɔni a wa wuli mɔɔ faaniilu tɛma, a ti se tiɲanna. 43 A ye donna waati mɛn na, a lafɛyanin, fanka tɛ a la. Kɔni a wa wuli, a nɔɔrɔnin, fanka ye a la kosɛbɛ! 44 A ye donna waati mɛn na, faribanku le tɛrɛ a ri, a wa wuli, harijeene fari le wo ri. Ni faribanku ye ye, harijeene fari fanan ye ye. 45 Wo le rɔ, a sɛbɛnin Kitabu kɔndɔ tende ko,

«Adama, Alla la mɔɔ dannin fɔlɔ kɛra niilama le ri.»

Kɔni Adama tɔɔ laban,* wo kɛra nii ri mɛn ye niimaya dila. 46 Harijeene fari ɲin fɔlɔ ma na fɔɔ faribanku, wo kɔ rɔ, harijeene fari nara. 47 Adamaden fɔlɔ, Alla ka wo dan duu ɲin banku le la. Adamaden filana, wo bɔnin harijeene le rɔ. 48 Mɛn dannin banku ɲin dɔ, dunuɲa mɔɔilu ye wo le munuɲa ri. Mɔɔ mɛn bɔnin harijeene, harijeene mɔɔilu ye wo le munuɲa ri. 49 An da munuɲa adamaden na mɛn bɔnin banku rɔ, an natɔ munuɲala wo ɲa le ma harijeene mɔɔ la.

50 N badenmailu, n ye mɛn ma, wo le ɲin di ko mɛn dannin faribanku ni jeli la, ii ti se Alla la mansaya sɔrɔnna. Fen mɛn ye tiɲanna, wo ti cɛ tiɲanbali sɔrɔnna.

51 Ai ye ai tolo malɔ, n ye gbundu ko le fɔla. An bɛɛ ti nala faala, kɔni an bɛɛ ri yɛlɛman. 52 Baa buru tɔɔ laban wa fɛ waati mɛn na, mɔɔ faaninilu ri wuli ka bɔ saya rɔ, ka habadan niilakisi sɔrɔn, an bɛɛ ri yɛlɛman jonna sani ɲa makadi. 53 Baa an faribanku mɛn ye tiɲanna, a fɛrɛ tɛ ye fɔɔ a ye yɛlɛman fari ri mɛn tɛ tiɲanna. Mɛn ye faala wo ye yɛlɛman faabali ri. 54 Wo le rɔ, an fari mɛn ye tiɲanna, a wa yɛlɛman fari tiɲanbali ri waati mɛn na, a ni faata ye yɛlɛman faabali ri, wo wa kɛ, Kitabu la kuma ri dafa wo rɔ ko, «Saya ra halaki fanka sɔrɔn dɔ.»

55 «Saya, i fanka ye min?

Saya, i mɔɔ faa fanka ye min?»*

56 Saya mɔɔ faa fanka le julumun di, julumun fanan fanka le sariya ri. 57 Kɔni baraka ye bila Alla yɛ mɛn ka fanka sɔrɔn di an ma a la Mɔɔ Ɲenematɔmɔnin baraka rɔ an Maari Isa.

58 Wo le rɔ, n diyanan badenmailu, ai ye ai sɛɛbɛ don kosɛbɛ! Ai kana lamaa. Ai ye to baarala Maari yɛ waati bɛɛ ka a masɔrɔn ai ka a lɔn ko ai ye baara mɛn kɛla Maari yɛ, ko fuu tɛ wo ri muumɛ!