1 N badenmailu, n nara ai tɔrɔfɛ tuma mɛn na, ka Alla la ko sereya bɔ ai yɛ, n ma kuma kɔrɔlaman fɔ ai yɛ walijiya rɔ. 2 Baa n ka a latɛɛ le ko n kana foyi miriya ai tɛma, fɔɔ Isa Ɲenematɔmɔnin na ko, a ni ale Isa Ɲenematɔmɔnin gbɔngbɔn ko. 3 Nde jɛrɛ tɛrɛ ai tɔrɔfɛ fankatanya rɔ, n tɛrɛ yɛrɛyɛrɛla silan dɔ. 4 N tɛrɛ karan ni kawandili mɛn kɛla, n tɛrɛ tɛ karannin mɔɔilu saman diya adamadenilu la walijiya fɛ, fɔɔ Alla la Nii Sɛniman fanka, 5 kosa ai kana lemɛniya adamadenilu la walijiya ma, fɔɔ Alla fanka.

6 Sisɛn mɛnilu la lemɛniya ra rakɔɔ, an ye woilu karanna walijiya do la. Kɔni dunuɲa ɲin walijiya tɛ, wala dunuɲa kuntiilu* ta, mɛnilu ye halakila. 7 Ande ye Alla la walijiya gbundu ko le ɲafɔla, mɛn dokonnin, kɔni Alla tun da mɛn natɛɛ an ma an na gbiliya la ko rɔ, sani dunuɲa ye dan. 8 Dunuɲa kuntii si ma wo walijiya lɔn. Ni ii tɛrɛ ka a lɔn, ii tun tɛ Maari gbiliya tii gbɔngbɔnna jiri kan. 9 Kɔni ikomin a sɛbɛnin Kitabu kɔndɔ ɲa mɛn ma ko,

«Alla ka ko mɛnilu rabɛn a kanin mɔɔilu ɲɛrɔ,

ɲa ma wo yen fɔlɔ, tolo ma wo mɛn,

mɔɔ ma hankili lamiri mɛn ma fɔlɔ.»*

10 Kɔni Alla ra a yiraka andeilu la a la Nii Sɛniman baraka rɔ. Alla la Nii Sɛniman ye ko bɛɛ kɔrɔ ɲininna hali Alla la gbundu ko dun. 11 Baa yon ye mɔɔilu tɛma mɛn di se mɔɔ kɔnɔrɔ ko lɔnna, ka bɔ a jɛrɛ nii rɔ ko mɛn ye wo tii fari rɔ wa? Wo ɲa ma, mɔɔ si ti se Alla la koilu bɛɛ lɔnna fɔɔ Alla la Nii sɛniman.

12 An ma dunuɲa ɲin hankili sɔrɔn, kɔni fɔɔ Alla la Nii Sɛniman, Alla ka mɛn nana, kosa Alla ra fen mɛnilu bɛɛ di an ma gbansan, an ye woilu lɔn. 13 An ye wo koilu le fɔla, mɛnilu kɛnin tɛ mɔɔilu la hankilimaya karanilu ri, kɔni fɔɔ Alla la Nii Sɛniman karan. An ye Alla la Nii koilu ɲafɔla wo tiiilu le yɛ, wo Nii ye mɛnilu rɔ. 14 Kɔni Alla la Nii Sɛniman tɛ mɔɔ mɛn dɔ, wo tii tɛ Alla la Nii koilu mirala fewu. Kɔmɔɔya koilu le woilu ri a ɲakɔrɔ, a ti se ii famunna. Ka a masɔrɔn Alla la koilu ye lɔnna a la Nii Sɛniman de fɛ. 15 Kɔni, Alla la Nii Sɛniman ye mɔɔ mɛn jusu rɔ, wo tii ri se koilu bɛɛ dan nafarabɔla, kɔni mɔɔ ti se wo tii la ko dan nafarabɔla. 16 Baa a sɛbɛnin Kitabu rɔ ko,

«Yon di se Maari miriyailu lɔnna

kosa a ye a karan?»*

Kɔni andeilu, Ɲenematɔmɔnin miriya ye an dɔ.