1 I kɛra mɔɔ mɔɔ ri, ile mɛn ye doilu jalakila, i ti se i jɛrɛ kun makala. Ka a masɔrɔn i ye doilu jalakila ko mɛnilu la, ile fanan jɛrɛ ye woilu kɛla. Wo rɔ, i ra i jɛrɛ fanan jalaki. 2 An ka a lɔn ko Alla ye kiti tɛɛla telen de rɔ mɔɔilu yɛ tuɲa la, mɛnilu ye ko su ɲinilu kɛla. 3 Kɔni i wa kɛ mɔɔ mɔɔ ri, i lanin a la wa ko ile ri bɔ Alla la kiti kɔrɔ wa, ile mɛn ye doilu jalakila koilu rɔ ile jɛrɛ ye mɛnilu kɛla? 4 Wala i yonin Alla la ɲumaya le ma wa, a ni a la diɲɛ ni a la muɲun? I ma a lɔn ko Alla la ɲumaya ka kan de ka i latuntun tubi ma wa? 5 Kɔni i la tengberenya ni i la jusu tubibali la ko kosɔn, i ye tola Alla la mɔnɛ makafula mɛn namaranin i kanma, a ri i sɔrɔn Alla la mɔnɛ lon dɔ, Alla la kiti telennin wa bɔ kɛnɛma waati mɛn na. 6 Alla ri mɔɔ bɛɛ sara a kɛwaliilu la.* 7 A ri ɲenemaya banbali di mɔɔilu ma mɛnilu ye gbiliya ni kunnafulen ni sayabaliya ɲininna, ka ii tunadiya ko ɲuma rɔ. 8 Kɔni a la duɲa ni a la mɔnɛ ri wuli mɔɔilu kanma mɛnilu ye ii jɛrɛmakaranna, ka ii ban tuɲa ma, ka bila telenbaliya kɔfɛ. 9 Awa, tɔrɔya ni kɔndafiliilu ri la kojuu kɛlailu bɛɛ kan, ka damira Judiyailu ma ka wa siya gbɛrɛilu ma. 10 Kɔni Alla ri gbiliya ni kunnafulen ni jususuma di koɲuma kɛlailu bɛɛ ma, ka damira Judiyailu ma ka wa siya gbɛrɛilu ma. 11 Ka a masɔrɔn Alla tɛ mɔɔilu lafisayala ii ɲɔɔn ko.

12 Mɛnilu bɛɛ ye julumun kɛla, ni ii tɛ Musa la sariya kɔrɔ, woilu ri halaki hali ka bɔ wo sariya ma. Kɔni mɛnilu bɛɛ ye hakɛ kɛla Musa la sariya kɔrɔ, sariya ri woilu makiti. 13 Ka a masɔrɔn mɛnilu wa ii tolo malɔ sariya la gbansan, woilu telennin tɛ Alla ɲakɔrɔ, kɔni mɛnilu wa sariya mira, Alla ri woilu jate mɔɔ telennin di. 14 Baa, siya gbɛrɛ mɛnilu ma Musa la sariya lɔn woilu wa koilu kɛ mɛn dahanin sariya ma ii la mɔɔya fɛ, hali Musa la sariya tɛrɛ tɛ ii bolo, woilu ra ii ta sariya labɔ. 15 Wo ye a yirakala le ko sariya ka jamarili mɛn di, wo sɛbɛnin tɛrɛ ii jusu le rɔ. Ii jɛrɛ hankili le ii sereya ri, a ni ii la miriya firifirinin de tɔɔ lala ii la, wala ka ii kun makɛlɛ. 16 A ye kɛla wo ɲa le ma Alla wa bɔ mɔɔilu la gbundu koilu makiti diya lon mɛn na Isa Ɲenematɔmɔnin baraka rɔ, ikomin n ye Isa la ko Kibaro Ɲuma mɛn nasela, wo ye a fɔla ɲa mɛn ma.

17 Kɔni ni ile ye a fɔla ko Judiya le i ri, i bolo malanin sariya ma, ka to wasola Alla la, 18 ka a sawo lɔn, ka sɔn ko fisamantɛ ma, baa i ra kolo sariya bolo, 19 a ni, ni i lanin a la ko ɲa funyen bolo mirala le ile ri, a ni kɛnɛya mɛn ye mɔɔilu dɛmɛnna dibi rɔ, 20 mɛn ye hankilidɔɔilu karanna a ni denninilu karanmɔɔ, baa i lanin a la ko i ra lɔnnin ni tuɲa jɛrɛjɛrɛ sɔrɔn sariya rɔ, 21 wo rɔ, ile mɛn ye doilu karanna, i ye i jɛrɛ karanna le wa? Ile mɛn ye kawandili kɛla ko mɔɔ kana suɲali kɛ, ile ye suɲali kɛla wa? 22 Ile mɛn ye tɔn siila kaninkɛ la, ile ye kaninkɛ kɛla wa? Jooilu gboman ile mɛn yɛ, i ye ii batobonilu kɔndɔ fenilu suɲala le wa? 23 I ye i tola i wasola sariya la, kɔni i ye Alla lamaloyala sariya tiɲan na! 24 Ka a masɔrɔn, a sɛbɛnin Kitabu kɔndɔ ko, «Alla tɔɔ ye lafɛyala siya gbɛrɛilu bolo aile le la ko kosɔn.»*

25 Judiyailu la faaninta, tɔnɔ ye a la, ni i ka sariya mira. Kɔni ni sariya tiɲanna le i ri, hali i ra faaninta kɛ, i jatenin de sinɛn ikomin faanintabali. 26 Wo rɔ, ni siya gbɛrɛ mɛn ma faaninta kɛ, ka sariya mira, Alla tɛ wo jate ikomin a ra faaninta kɛ wa? 27 Ni faanintabali ka Alla la sariya mira, a tɛ ile Judiya jalaki? Ka a masɔrɔn i ye sariya tiɲanna, hali a sɛbɛnin tɛrɛ i bolo mɛn da faaninta kɛ. 28 Judiya dina munuɲa ye mɔɔ mɛn dɔ, wo kɛnin tɛ Judiya bɛrɛ jɛrɛ ri. Faaninta kɛ bɛrɛ ko kɛnin tɛ faribanku ko gbansan de ri. 29 Kɔni mɔɔ ye kɛla Judiya bɛrɛ ri a kɔndɔ koilu le fɛ. Faaninta kɛ bɛrɛ ye tola mɔɔ jusu le rɔ ka fara Nii Sɛniman na, sariya sɛbɛnin tɛ. Wo mɔɔ su tɛ tandoli sɔrɔnna adamadenilu la fɔɔ Alla jɛrɛ.