1 Wo rɔ diya Junusa yɛ fewu. A mɔnɛra kosɛbɛ. 2 A ka Allabatala matara ko: «Aa, Allabatala, ka n to n na jamana kɔndɔ fɔlɔ, a miriya tɛrɛ ye n na ko i ri a kɛ ten. Wo le ka a kɛ, n ka n kaliya ka n bori ka wa Tarasisi. Baa n tun ka a lɔn fewu ko i ye Alla le ri, mɛn na kininkinin ni ɲumaya ka bon kosɛbɛ. I ti mɔnɛla jonna. I ye mɔɔilu kaninna kojuuya. I wa masilannikan mɛnilu fɔ, i rabɛnni tuma bɛɛ ka woilu to ye. 3 Allabatala, sisɛn, i ye n bɔ duunuɲa rɔ yan, baa saya fisa n yɛ ka tamin ɲenemaya la.» 4 Allabatala ka Junusa jabi: «A ye di? I jɔ ye duɲa rɔ wa?»

5 Nba, Junusa bɔra Ninibe so kɔndɔ, ka wa i sii telebɔ rɔ. A ka gbaa do lɔ ye, ka i sii wo kɔrɔ lulen na ka makɔnɔni kɛ, baa a ye a fɛ ka a yen ko mɛn tamintɔ so kɔndɔ. 6 Wo tuma, Maari Allabatala ka nɔnbɔju do lafɛrɛn ka yɛlɛ Junusa kun na ka lulen di a ma, ka a bɔ a la niilafin dɔ. Junusa sɛwara nɔnbɔju wo la kosɛbɛ. 7 Wo duu sa gbɛ sɔɔma da la, Alla ka tunbu do lana. Tunbu wo donda nɔnbɔju rɔ ka a dɔɔn ka a ja. 8 Tele yɛlɛra tuma mɛn na, Alla ka fɔɲɔ ba kalaman nana ka bɔ telebɔ rɔ. Tele gbara Junusa kun na kojuuya fɔɔ a betɔ le tɛrɛ. A tɛrɛ ye a fɛ ka sa. A ka a fɔ ko: «Saya kɔni ka fisa n ma ka tamin ɲenemaya kan.» 9 Alla ka Junusa maɲininka ko: «A ye di? I jɔ ye duɲa rɔ nɔnbɔju ja ko rɔ wa?» Junusa ka a fɔ ko: «N kɛ! N jɔ ye a rɔ! N da duɲa haan ka n sɔn saya ma.» 10 Allabatala ka a fɔ ko: «Nɔnbɔju ni wo hina ye i la. I don ma baara si kɛ a la, mɛn di a labonya. A fɛrɛnda su fɔlɔ rɔ ka ja su filana rɔ. 11 I ye a fɛ nde kana kininkinin Ninibekailu ma, so belebele wo kɔndɔ mɔɔ waa kɛmɛ ni waa muwan (120,000) mɛnilu mɛn ti se bolokinin ni bolomaran faranfasila, kolofen siyaman ba wo ma jate ma lɔn.»