1 N badenmailu, aile mɛnilu ka sariya lɔn, ai ka a lɔn ko sariya ye mɔɔ jamarilila haan a laban waati. 2 A misaliya kɛnin muso le ri mɛn siinin cɛɛ kun ma. Wo siinin a la cɛɛ kun ma sariya le ma haan a ye a niila waati mɛn na, kɔni ni a la cɛɛ faara, a ye bɔ sariya kɔrɔ mɛn tɛrɛ ka ii sidi ii ɲɔɔn ma. 3 Wo le rɔ, ni a siira cɛɛ gbɛrɛ kun ma, a cɛɛ fɔlɔ ye a nii la, a ra kaninkɛ wo rɔ. Kɔni ni a la cɛɛ faara, wo rɔ a ra bɔ wo la sariya kɔrɔ. Wo rɔ, a ri se siila cɛɛ gbɛrɛ kun ma, wo kɛnin tɛ kaninkɛ ri. 4 N badenmailu, ai le fanan da faa sariya fan fɛ Ɲenematɔmɔnin faribanku baraka rɔ, kosa, ai ri ai fasa a ma, mɛn da wuli ka bɔ saya rɔ kosa an ye baara ɲumailu kɛ Alla yɛ. 5 Baa faribanku diyanan koilu tɛrɛ ye an jamarila waati mɛn dɔ, julumun diyanan koilu tɛrɛ ye baarala an fariilu rɔ sariya fɛ kosa mɛn tɛrɛ ye an faala an ka wo kɛ. 6 Kɔni sisɛn, an da bɔ sariya kɔrɔ, ka a masɔrɔn an da faa sariya kɔrɔ, mɛn tɛrɛ ra an mira. An ye baarala Nii Sɛniman na sila kura le kan sinɛn, an tɛ sariya sɛbɛnin kɔrɔman kan butun.

7 An ye nfen fɔla wo rɔ? Sariya jɛrɛ le julumun di wa? Ɛɛn de! Sariya le ka a kɛ n ka a lɔn ko nfen ye julumun di. Ni sariya tɛrɛ ma a fɔ n yɛ, «i kana nata», n tɛrɛ ma a lɔn nfen ye nata ri.* 8 Wo rɔ, julumun ka fɛrɛ sɔrɔn, ka nata su bɛɛ ladon n dɔ sariya fɛ. Ka a masɔrɔn ni sariya tɛrɛ tɛ ye, julumun faanin de tɛrɛ. 9 Sariya tɛrɛ tɛ n kan waati mɛn na, n tɛrɛ kɛndɛ, kɔni jamarili nanin, julumun nara, wo rɔ n faara. 10 N da a yen ko, jamarili mɛn ka kan ka siimaya lana, wo nanin saya le fɛ. 11 Baa, julumun da fɛrɛ sɔrɔn jamarili fɛ, ka n janfa, ka n faa.

12 Wo le rɔ, sariya sɛniman, jamarili sɛniman, a telennin, a ka ɲin. 13 Wo kɔrɔ ye di? Kuma mɛn ka ɲin, wo ra kɛ saya ri nde yɛ? Ɛɛn de! Julumun de ra n faa wo fen ɲuma fɛ, kosa julumun ko ri lɔn julumun di, kosa julumun fankama ka yiraka jamarili fɛ.

14 An ka a lɔn ko sariya faranin Alla la Nii Sɛniman de la, kɔni faribanku le nde ri, mɛn da mayira ka a kɛ julumun jɔn di. 15 N ma a lɔn n ye mɛn kɛla, ka a masɔrɔn n ye a fɛ ka mɛn kɛ, n tɛ wo kɛla, kɔni fɔɔ mɛn gboman n yɛ, n ye wo le kɛla. 16 Ni n tɛ a fɛ ka mɛn kɛ, n ye wo le kɛla, wo ye a yirakala ko n da sɔn ko sariya ka ɲin. 17 Wo rɔ, nde tɛ wo kɛla, kɔni julumun de wo ri mɛn ye n dɔ. 18 Ka a masɔrɔn n ka a lɔn ko koɲuma tɛ n dɔ ka fara n faribanku la, baa hali koɲuma kɛ lɔɔ ye n na, n ti se a kɛla. 19 N ye a fɛ ka koɲuma mɛn kɛ, n tɛ wo kɛla, kɔni n tɛ a fɛ ka kojuu mɛn kɛ, n ye tola wo le kɛla. 20 Ko mɛn kɛ lɔɔ tɛ n na, ni n ka wo kɛ, wo kɔrɔ le, ko nde ma a kɛ, kɔni julumun mɛn ye n ma.

21 Wo le rɔ, N ye a yenna ko sariya le ɲin di. Koɲuma kɛ lɔɔ ye n na waati mɛn dɔ, kojuu fanan ye n dɔ. 22 Adon, n sɛwanin Alla la sariya yɛ, n jusu rɔ. 23 Kɔni n ye sariya gbɛrɛ le yenna n faribanku rɔ mɛn ye n hankili sariya kɛlɛla, ka n kɛ kasolabilala ri julumun na sariya rɔ, mɛn ye baarala n faribanku rɔ. 24 Mɔɔ tɔrɔnin de n di! Yon de n kunkala faribanku ɲin ni a diyanan koilu ma mɛnilu ye n nawala saya rɔ? 25 An ye baraka bila Alla yɛ an Maari Isa Ɲenematɔmɔnin baraka rɔ! Wo rɔ, n da kɛ Alla la sariya jɔn di n hankili rɔ, kɔni n faribanku ra n kɛ julumun sariya jɔn di.