1 N badenmailu, ni ai ka mɔɔ do yen kojuu kɛla, ai mɛnilu ye taamanna ka bɛn Nii Sɛniman sawo ma, ai ye wo tii lali jususuma rɔ, ka a dɛmɛn a kɔsɛla sila ɲuma kan. Kɔni i ye i janto i jɛrɛ rɔ, sa i fanan kana manɛɛn ka kojuu wo ɲɔɔn kɛ. 2 Ai ye i ɲɔɔn dɛmɛn ai la doninilu tala sa ai ri Ɲenematɔmɔnin na sariya labato a ɲa ma. 3 Ni mɔɔ mɛn ye a mirila ko ale ye mɔɔ ba le ri, ka a tɛrɛn a tɛ foyi ri, wo tii ye a jɛrɛ le lafilila. 4 Mɔɔ kelen kelenna bɛɛ ye a jɛrɛ la kɛwaliilu fɛsɛfɛsɛ a ni ka a jɛrɛ bonya. A mako tɛ a la ka a la kɛwaliilu la mɔɔ gbɛrɛ ta ma. 5 Baa bɛɛ ka kan ka a jɛrɛ la kunko ta.

6 Mɛn da Alla la kumakan sɔrɔn ka a karan, wo tii ka kan ka a la karanmɔɔ sɔ a bolofen ɲumailu rɔ.

7 Ai kana ai jɛrɛ lafili. Mɔɔ ti se mɔnɛdona Alla rɔ wala ka a mayɛlɛ. Baa mɔɔilu wa si su su foyi sɛnɛ rɔ, ii ri suman su wo sɔrɔn. 8 Ɔɔn, mɔɔ mɛn wa sɔn a jɛrɛ faribanku nata juuilu ma ka kojuu kɛ, wo tii ri saya sɔrɔn. Kɔni mɔɔ mɛn wa sɔn Nii Sɛniman diyanan koilu ma ka koɲuma kɛ, wo tii ri ɲenemaya banbali sɔrɔn. 9 An kana kori koɲuma kɛ rɔ, baa ni an ma jiitɛɛ ka a boloka, an di a tɔnɔ sɔrɔn a waati la. 10 Wo le kosɔn, an wa fɛrɛ sɔrɔn tuma mɛn na, an ka kan ka koɲuma kɛ mɔɔilu bɛɛ yɛ, ka tɛrɛ tɛ an badenma lemɛniya mɔɔilu ma.

11 Nba, ai ye sɛbɛden kunba ɲinilu ragbɛ. Nde ye woilu sɛbɛla n jɛrɛ bolo le la ka a lawa ai ma. 12 Mɔɔ mɛnilu ye a fɛ ka ai diyagboya ko ai ye faaninta kɛ, ii bɛɛ ye a ɲininna ka diya mɔɔilu yɛ tuun, baa ii tɛ a fɛ mɔɔilu ye ii tɔrɔ Ɲenematɔmɔnin faa gbɔngbɔn jiri kan wo kosɔn. 13 Baa mɔɔ mɛnilu ye faaninta kɛla, woilu jɛrɛ tɛ Musa la sariya labatola. Kɔni ii ye a fɛ ai ye faaninta kɛ sa ii ri se ii jɛrɛbonyala ko ii ka a kɛ faaninta kɛ nɔ ra kɛ ai fari ma. 14 Nde kɔni, n tɛna n jɛrɛbonyala ko si ma, fo an na Maari Isa Ɲenematɔmɔnin faa ko gbɔngbɔn jiri kan. A la saya kosɔn gbɔngbɔn jiri wo kan, dunuɲa koilu ye n ɲana ikomin fen mɛnilu faani. N fanan ye dunuɲa ɲana ikomin fen mɛn faani. 15 Faaninta kɛ tɛ foyi ri. Faanintakɛbaliya fanan tɛ foyi ri, fɔɔ a kɛ danfen kura ri.

16 Mɛnilu ye sila wo taamanna a ni Isirayɛli mɔɔilu*6.16 A la Isirayɛli mɔɔilu wo kɔrɔ ye le mɔɔ mɛnilu lemɛniyani Maari Isa ma ko ale le ye an kisiba ri. fanan, Alla ye jususuma di wo bɛɛ ma, ka kininkinin ii la.

17 Nba, sisɛn mɔɔ si kana n tɔrɔ butun, baa tɔrɔya nɔ mɛnilu ye n fari ma, n ka woilu sɔrɔn Isa le kosɔn.

18 N badenmailu, an Maari Isa Ɲenematɔmɔnin na ɲumaya ye to ai fɛ. Amina.