1 N badenmailu, n tɛrɛ ti se kumala ai yɛ ikomin mɔɔ mɛnilu ra kɔɔ Alla la koilu rɔ, kɔni ikomin dunuɲa mɔɔilu, ikomin mɔɔ mɛnilu ye den ɲɛrɛnninya rɔ Ɲenematɔmɔnin na koilu rɔ. 2 N da karan di ai ma mɛn kɛnin ikomin sin ji, dɔɔnnifen gbɛlɛn tɛrɛ tɛ a ri, baa ai tɛrɛ ti se a lamirala. Kɔni hali sisɛn, ai ti se a nola fɔlɔ. 3 Ka a masɔrɔn ai kɛnin ikomin dunuɲa mɔɔilu. Baa keleya ni bɛnbaliya ye ai tɛma. Wo ra a yiraka ko dunuɲa mɔɔilu le ai ri mɛnilu ye taamanna ikomin adamaden doilu. 4 Aile do kelen wa a fɔ ko, «Nde, Pɔli le ta ye n di,» do ye a fɔ ko, «Nde, Apɔlɔsi le ta ye n di,» adamadenya koilu le tɛ woilu ri wa?

5 Yon de Apɔlɔsi ri? Yon de Pɔli ri? Alla la baaraden de dɔrɔn ye andeilu ri, mɛnilu ka ai dɛmɛn ai ka lemɛniya. Bɛɛ ri a baara lakanbali Maari ka mɛn don a bolo. 6 N ka si foyi ten, Apɔlɔsi le ka a ji la, kɔni Alla le ka a lasabati. 7 Wo ɲa ma, foyi tɛ si foyi mɔɔ ni a ji la mɔɔ ri, fɔɔ Alla mɛn ye a lasabatila. 8 Si foyila ni a ji lala bɛɛ ka kan, Alla ri wo kelen kelenna bɛɛ sara ka bɛn ii baara ɲa ma. 9 Baa an kɛnin baarakɛlailu le ri, mɛnilu ni Alla ye baarala ii ɲɔɔn fɛ. Aile kɛnin Alla la sɛnɛ le ri, Alla la bon. 10 Alla ra a latɛɛ n ma a la hina rɔ, n ye baara a yɛ ikomin bonlɔla mɛn kusan, bon ju birinna. Sisɛn, mɔɔ gbɛrɛ ye bon lɔla wo kan. Kɔni fɔɔ bɛɛ ye a kɛ a hankili la wo bon lɔ ko rɔ. 11 Baa mɔɔ si ti se bon ju gbɛrɛ ju birinna, baa a ra ban ju birinna. Ɲenematɔmɔnin Isa le a ju birin di. 12 Awa, ni mɔɔ si ye bon lɔla wo ju birin kan, ka sanin bon lɔ, wala wodigbɛ, wala kuru dagbɛlɛnilu, wala jiri, wala karatabon, wala bin, 13 bɛɛ baara nɔ ri lɛnkɛnɛmaya Isa Na Lon, baa ta le nala, ka mɔɔ bɛɛ baara nɔ yiraka, ni a ka ɲin, ni a ma ɲin. 14 Ni mɔɔ ra baara kɛ ta tɛ mɛn halakila, wo tii ri a la baraji sɔrɔn. 15 Kɔni ni mɔɔ baara nɔ janinda, a ra bɔnɔ wo rɔ. A jɛrɛ ri kisi, kɔni a ri kɛ ikomin mɔɔ wa tamin ta kun na.

16 Ai ma a lɔn wa, ko ai kɛnin Alla batobonba le ri, Alla la Nii Sɛniman sii diya? 17 Wo le rɔ, ni mɔɔ si ka Alla batobonba tiɲan, Alla ri wo tii halaki; baa Alla batobonba sɛniman, aile jɛrɛ le Alla batobonba ri.

18 Wo le rɔ, mɔɔ si kana a jɛrɛ majuuwaya. Ni mɔɔ do ye ai tɛma mɛn ye a mirila ko waliji le ale ri dunuɲa mɔɔilu ɲakɔrɔ, a bɛnnin tɛrɛ le, wo tii ye a jɛrɛ jate hankilidɔɔ ri, kosa a ye kɛ waliji jɛrɛ ri. 19 Baa dunuɲa walijiya kɛnin kɔmɔɔya le ri Alla ɲakɔrɔ, ikomin a sɛbɛnin Kitabu kɔndɔ ɲa mɛn ma ko, «Alla ye hankilimailu mirala ii jɛrɛ kewuyailu le fɛ.»* 20 A ka a fɔ yɔrɔ gbɛrɛ rɔ fanan ko, «Maari ka walijiilu miriyailu lɔn ko fuuilu le ri.»* 21 Wo le rɔ, mɔɔ si kana a jɛrɛdabaya adamadenilu la ko rɔ butun! Baa aile ta ye ɲinilu bɛɛ ri: 22 nde Pɔli wo, Apɔlɔsi wo, Sefasi wo, dunuɲa ɲin wo, siimaya wala saya, waati ɲin wala mɛn ye nala, ai ta le ii bɛɛ ri, 23 a ni Ɲenematɔmɔnin de fanan ta ye aile ri, Alla le fanan ta ye Ɲenematɔmɔnin di.