1 Awa, Allabatala ka jɛɛ ba do lana mɛn ka Junusa lakunun. Junusa ka tele sawa ni su sawa kɛ jɛɛ kɔndɔ. 2 Ka a to jɛɛ kɔndɔ, Junusa ka a Maari Allabatala tara.

3 A ka a fɔ ko:

«Allabatala, ka n to tɔrɔya ba rɔ, n ka i matara.

I ka n jabi.

Ka n to lakira rɔ saya rɔ, n kulera dɛmɛnni ko rɔ.

I ka n namɛn.

4 I ka n nafili kɔɔji rɔ,

fɔɔ kɔɔji dun ba kɔrɔ.

Kɔɔji ka n naminin fan bɛɛ rɔ.

I ka kɔɔji kuru ba mɛnilu lana,

woilu bɛɛ lara n kan.

5 N tɛrɛ ye a fɔla n jɛrɛ ma ko i ra n gbɛn ka n bɔ i ɲakɔrɔ.

Kɔni n lani a la n di i la bon sɛniman yen ikɔ tuun.

6 Kɔɔji ka n natunun ka n na ɲenemaya masilan.

N jiira fɔɔ kɔɔji dun ba kɔrɔ.

Kɔɔjikɔrɔ binilu mɔrɔnmɔrɔnnin tɛrɛ n kun ma.

7 N jiira fɔɔ koyinkɛilu sen kɔrɔ kɔɔji kɔrɔ.

N sera suilu la jamana rɔ. A da bɛɛ sɔɔra n ma kadawu.

Kɔni ile, n Maari Allabatala,

i ka n kɛndɛ layɛlɛ lakira kɔndɔ.

8 N Maari Allabatala, ka a to dɔɔni n tun di sa,

n miriya sera i ma.

I ka n na matarali kan namɛn

i la bon sɛniman kɔndɔ.

9 Mɔɔ mɛnilu ye batofen ɲatɔnɔntanilu batola,

woilu ri bɔnɔ i la kaninteya rɔ.

10 Kɔni nde ri kalaman bɔ i yɛ ka i tando,

ka saraka di i ma.

N ka dakan mɛn ta i yɛ, n di wo mafa.

Allabatala, ile kelen pe le ri se mɔɔ kisila.»

11 Awa, Allabatala kumara jɛɛ ba yɛ. Wo rɔ, jɛɛ ba ka Junusa labɔ gbere ma.