1 Nba, wo kɔ, Isa ka kuma kɔrɔlama do fɔ ka a la karandenilu karan, ka a masɔrɔn a ye a fɛ ii ye to Alla matarala tuma bɛɛ. Ii kana jiitɛɛ ka wo boloka.

2 A ka a fɔ ko: «Kititɛɛla do tɛrɛ ye so do la. A tun tɛ silanna Alla yɛ, a tun tɛ mɔɔ bonyala. 3 Nba, cɛsamuso do tɛrɛ ye mɛn tɛrɛ sela kititɛɛla tuma bɛɛ ka a fɔ a yɛ ko: ‹I ye n na kiti tɛɛ, baa n juu ra kojuu kɛ n na.› 4 A mɛnda, kititɛɛla ma sɔn ka kiti wo tɛɛ. Kɔni, lon do rɔ, kititɛɛla ka a fɔ a jɛrɛ kɔndɔ ko: ‹Tuɲa le. N tɛ silanna Alla yɛ, n tɛ mɔɔ bonyala, 5 kɔni, muso ɲin da n tɔrɔ kojuuya. Wo bolo ma, a fɛrɛ tɛ fo n ye kiti wo tɛɛ. Ni wo tɛ, a ri to n ɲagbala tuma bɛɛ fo ka n sɛɛ.›»

6 Wo rɔ, Maari ka a fɔ ko: «Kititɛɛla telenbali wo ka mɛn fɔ, ai ye ai tolo malɔ wo la kosɛbɛ. 7 Ni Alla la mɔɔ suwandininilu ka ii kan nabɔ ale ma ka kiti ɲinin a fɛ su ni tele, a ti nala ii dɛmɛnna ka ii la kititɛɛilu ɲanabɔ wa? A tɛ a ban ii rɔ. 8 Alla ri a kaliya ka kititɛɛ ii yɛ telenbaya la. A ye ten de! Kɔni hali wo, Mɔɔ Dencɛ wa na waati mɛn na, a ri lemɛniya tɛrɛn dunuɲa rɔ wa?»

9 Mɔɔ doilu tɛrɛ ye, mɛnilu tɛrɛ ye ii jɛrɛ jatela mɔɔ telennilu ri. Ii lanin a la ko ii ka ɲin mɔɔ tɔilu ri. Isa ka kuma kɔrɔlama do fɔ woilu le ma.

10 A ka a fɔ ko: «Mɔɔ fila wara Alla matara diya Alla batobonba kɔndɔ. Kelen tɛrɛ ye Farisi ri. Kelen tɛrɛ ye niisɔnkɔmirala ri. 11 Farisi cɛɛ wo ka i lɔ ka Alla matara a jɛrɛ la ko rɔ ko: ‹Ɔ Alla, n ye baraka bilala i yɛ, n tɛ ikomin mɔɔ tɔmailu, ka a masɔrɔn n ti tɔɲɔli kɛla, n tɛ telenbali ri, n tɛ kaninkɛla ri, wala n tɛ ikomin niisɔnkɔmirala ɲin. 12 N ye sun donna siɲa fila lɔɔkun kelen kɔrɔ. Ka la wo kan, n wa fen fen sɔrɔn, n di wo ja bɔ.› 13 Kɔni niisɔnkɔmirala wo ka i lɔ yɔrɔ jan. A ma sɔn ka hali a ɲa lɔ sankolo fan dɔ. A ka a sisi magbasi ka kɛ a nimisa tɔɔmasere ri. A ka a fɔ ko: ‹Alla, i ye n makoto, baa kojuu kɛla le nde ri.›»

14 Isa ka a fɔ ko: «N ye a fɔla ai yɛ ko niisɔnkɔmirala ka jo sɔrɔn, kɔni Farisi cɛɛ wo ma jo sɔrɔn. Baa mɔɔ mɔɔ wa a jɛrɛ bonya, wo ri majii, kɔni mɔɔ mɔɔ wa a jɛrɛ fanmajii, wo ri bonya.»

15 Lon do rɔ mɔɔilu tɛrɛ ye nala denninilu ri Isa ma ko a ye a bolo la woilu kan ka duwa ii yɛ. Isa la karandenilu ka wo yen ka mɔɔ woilu makuma. 16 Kɔni Isa ka denninilu kili ko ii ye na a ma. A ka a fɔ a la karandenilu yɛ ko: «Ai ye a to denninilu ye na n ma. Ai kana ii mabali, ka a masɔrɔn Alla la mansaya ye ii ɲɔɔnilu le ta ri. 17 A ragbɛ! Mɔɔ mɛn ti nala sɔnna Alla la mansaya ma ikomin dennin sɔnnin Alla la mansaya ma ɲa mɛn ma, wo ti nala donna Alla la mansaya rɔ habadan. Tuɲa le wo ri fewu.»

18 Judiyailu la kuntii do nara Isa maɲininka ko: «Karanmɔɔ ɲuma, n ye nfen kɛ sa n di ɲenemaya sɔrɔn, ɲenemaya mɛn tɛ ban?» 19 Isa ka a jabi: «I ra a fɔ n ma ‹karanmɔɔ ɲuma› nfenna? Mɔɔ ɲuma si tɛ ye fɔɔ Alla kelen pe. 20 Alla ra mɛn sɛbɛ a la sariya rɔ, i ka wo lɔn. A sɛbɛni ye ko: ‹I kana kaninkɛ, i kana mɔɔ faa, i kana suɲali kɛ, i kana sere juu ri, i ye i fa ni i na bonya.›» 21 A ka Isa jabi: «Karanmɔɔ, kɛbi n denniya waati, n da sariya wo bɛɛ mira.» 22 Isa ka wo mɛn waati mɛn na, a ka a fɔ cɛɛ yɛ ko: «I ra dɛsɛ ko kelen na butun. I ye wa i bolofen bɛɛ san ka wo wodi di fantanilu ma, sa nanfulu bɛrɛ bɛrɛ ri kɛ i bolo harijeene rɔ. Wo wa ban, i yɛ na bila n kɔ.» 23 Cɛɛ ka jabili wo mɛn waati mɛn na, a jusu makasira, ka a masɔrɔn nanfulu ba tɛrɛ ye a bolo.

24 Isa ka a ɲa lɔ a rɔ ka a fɔ ko: «Nanfulutii don gboman Alla la mansaya rɔ de! 25 Nanfulutii don Alla la mansaya rɔ, wo ka gbɛlɛn ɲɔɔmɛ don di sɛlan woo la.» 26 Mɛn ka wo mɛn, woilu ka ɲininkali kɛ ko: «Yon di se kisila wo rɔ?» 27 Isa ka ii jabi: «Ko mɛnilu ti se kɛla mɔɔ bolo, woilu ri se kɛla Alla bolo.»

28 Piyɛri ka a fɔ Isa yɛ ko: «Andeilu don? An da fen bɛɛ to ye ka bila i kɔfɛ.» 29 Isa ka a fɔ ii yɛ ko: «A ragbɛ! Mɔɔ mɔɔ wa sɔn ka a la bon to ye, wala a muso, wala a badenmailu, wala a sɔrɔnbailu, wala a denilu, ka wa Alla la mansaya ɲinin, 30 wo sara ri wara dunuɲa ɲin dɔ. Sini, ɲenemaya fanan di di a ma, ɲenemaya banbali kɔnin.»

31 Wo kɔ, Isa ka a fɔ a la talibidenba tan ni fila yɛ ko: «An watɔ Jerusalɛmu. Alla la kelalaselailu ka fen fen sɛbɛ Mɔɔ Dencɛ la ko rɔ, wo bɛɛ ri dafa ikomin a sɛbɛni ɲa mɛn ma. 32 Ii ri a mira ka a don siya gbɛrɛ mɔɔilu bolo. Woilu ri a lafɛya ka a mayɛlɛ, ka a nani, ka ii daji tu a kan. 33 Ii ri a gbasi kojuuya, ka ban ka a faa. Kɔni, a faa tele sawana lon wa se, a ri wuli.» 34 Keladenbailu ma foyi ɲayen a la kuma rɔ. Wo kɔrɔ doonnin tɛrɛ ii ma. Ii ma famunyali si sɔrɔn a rɔ.

35 Isa ni a la mɔɔilu sudunyara Jeriko so la tuma mɛn na, ii ka ɲa funyen do tɛrɛn yɔrɔ wo rɔ. A siini tɛrɛ ye taralila sila da la. 36 Ɲa funyen wo ka jama mankan mɛn, ka maɲininkali kɛ ko: «Nfen kɛnin?» 37 A fɔra a yɛ ko Isa Nasarɛtika le tamintɔ. 38 A ka wo mɛn tuma mɛn na, a ka a kan nabɔ ka a fɔ ko: «Isa, Mansa Dawuda mamaren cɛɛ, i ye kininkinin n ma.» 39 Mɔɔ mɛnilu tɛrɛ ye jama ɲɛfɛ, woilu ka a makuma ka a fɔ a yɛ ko: «I makun!» A ma sɔn a makunna, fɔɔ ka a kan nabɔ fanka la, ka a fɔ ko: «Isa, Mansa Dawuda mamaren cɛɛ, i ye kininkinin n ma!» 40 Isa ka ɲa funyen kan mɛn ka i lɔ, ka a jamari kɛ ko ɲa funyen ye lana a ma. Mɔɔilu wara a ta ka na a ri a ma. A se mɛn kɛnin Isa ma, Isa ka a maɲininka ko: 41 «A ye di? I ye a fɛ n ye nfen kɛ i yɛ?» A ka jabili kɛ ko: «Maari, n ye a fɛ n ɲa ye laka ikɔ tuun.» 42 Isa ka a fɔ a yɛ ko: «Ale le wo ri. I ɲa ra laka. I ra lakɛndɛya i la lemɛniya sababu la.» 43 A ɲa lakara i kɔrɔ ye. A bilara Isa kɔ ka to Alla gbiliyala. Mɔɔilu ka wo bɛɛ yen ka Alla tando bakɛ.