Luka 20

Isa ye yon na fanka kɔrɔ

1 Lon do rɔ, Isa tɛrɛ ye mɔɔilu karanna ka kibaro ɲuma lase ii ma Alla batobonba jin kɔndɔ. Sarakalasela kuntiilu, ni sariya karanmɔɔilu, ni mɔɔbailu wara a tɛrɛn ye. 2 Ii ka Isa maɲininka ko: «I ye baara mɛn kɛla ɲin, yon ka i lɔ wo la? I ye yon na se kɔrɔ?» 3 Isa ka ii jabi: «N di ai maɲininka fɔlɔ: 4 Yon ka Yaya lɔ sunni kɛla ji rɔ? Alla le ka a lɔ a la, wa mɔɔilu?» 5 Ii wara i ɲɔɔn ye ka wo jabili ɲinin. Ii ka a fɔ ko: «Ni an ka a jabi: ‹Alla le ka Yaya lɔ wo la›, a ri a fɔ ko: ‹nfenna ai ma la Yaya la wo rɔ?› 6 Ni an ka jabili kɛ ko: ‹Mɔɔ le ka Yaya lɔ,› mɔɔ bɛɛ ri wuli ka an bon kaba la, baa ii bɛɛ ka a fɔ ko keladen fisamante do le tɛrɛ Yaya ri.» 7 Wo rɔ, ii nara Isa jabi: «An ma Yaya kelayaba lɔn.» 8 Isa ka jabili kɛ ko: «Nba, n fanan ti sɔn ka n kelayaba tɔɔ fɔ ai yɛ, n ye mɛn na se kɔrɔ kɔnin.»

Baarala juuilu ka mɛn kɛ

9 Ka Isa to ye, a ka kuma kɔrɔlama do fɔ jama yɛ. A ka a fɔ ko: «Cɛɛ do ka rɛsɛnfɛ labɔ a la sɛnɛ rɔ, ka ban ka a karifa sɛnɛkɛla doilu la. A bannin a karifala, a bɔra ye ka wa taama rɔ. A mɛnda ye, a ma i kɔsɛ. 10 Jiriden kadi waati sera tuma mɛn, rɛsɛnfɛ tii ka jɔn do lawa rɛsɛnfɛ rɔ, ka a fɔ sɛnɛkɛlailu yɛ ko ii ye a sɔ jiriden dɔ. Keladen se mɛn kɛnin ye, sɛnɛkɛlailu ma sɔn ka a sɔ. Ii ka keladen mira ka a gbasi ka a bololakolon nawa. 11 Rɛsɛnfɛ tii ka jɔn gbɛrɛ lawa. A fanan senin ye, sɛnɛkɛlailu ma sɔn ka fen di wo fanan ma, fɔɔ ka a gbasi ka a nanin ka a gbɛn. 12 Rɛsɛnfɛ tii ka jɔn sawana lawa ii ma. A se mɛn kɛra ii ma, ii ka a mira ka a gbasi fɔɔ ka a madimin ka wa a lafili kɔkan.

13 «Wo rɔ, rɛsɛnfɛ tii ka a fɔ ko: ‹N ye nfen kɛla? Nba, n di n diyanan dencɛ lawa ii ma. Ii ka kan ka ale bonya.› 14 Sɛnɛkɛlailu ka dencɛ wo natɔla yen, ka a fɔ i ɲɔɔn yɛ ko: ‹Dencɛ wo ri kɛ rɛsɛnfɛ tii ri a fa kɔ. An ye a mira ka a faa. Sa rɛsɛnfɛ ri kɛ an ta ri.› 15 Wo bolo ma, ii ka a mira ka a lafili kɔkan ka a faa.»

«A ye di? Rɛsɛnfɛ tii ri nfen kɛ sɛnɛkɛlailu la? 16 A ri na ka ii halaki, ka ban ka rɛsɛnfɛ karifa dogbɛrɛilu la.» Jama ka kuma kɔrɔlama wo mɛn ka a fɔ ko: «Ɛɛ! Alla ma an kisira ko su wo ma!» 17 Isa ka a ɲa lɔ jama rɔ ka ii maɲininka ko: «Nba, mɛn sɛbɛnin Alla la kuma rɔ, wo kɔrɔ ye nfen di? A sɛbɛnin ko:

‹Bon lɔlailu ka ii ban kabakudun mɛn dɔ,

wo le kɛra bon jusii kabakudun di.›»

18 «Mɔɔ mɛn wa be kaba wo kan wo ri rakadi, kɔni kaba wo wa be mɔɔ mɔɔ kan, wo ri mɔɲɔnkɔ.»

19 Sariya karanmɔɔilu ni sarakalasela kuntiilu ka a yen ko Isa ka kuma kɔrɔlama wo fɔ ii ma. Wo rɔ, ii wulira ka Isa mira ɲa ɲinin damira. Kɔni ii silanda jama yɛ, ka a masɔrɔn Isa duman tɛrɛ ye jama yɛ kosɛbɛ.

Niisankɔ bɔ ko

20 Wo bolo ma, ii tɛrɛ ye Isa lakɔrɔsila tuma bɛɛ. Ii ka janfanteilu lawa a ma, mɛnilu ka ii jɛrɛ kɛ ikomin telenbailu Isa laɲinin kanma. Woilu tɛrɛ ye a fɛ kuma bɛnbali do ye bɔ Isa da rɔ, mɛn di se kɛla a mira sababu ri. Kosa ii ri wa a ri kiti diya faama wara. 21 Wo bolo ma, janfanteilu nara ka ɲininkali kɛ a kun ko: «Karanmɔɔ, an ka a lɔn ko i la kuma telennin de, a ni i la karan. I tɛ mɔɔ dɔɔyala mɔɔ do yɛ. Alla la sila ka kan ka taama ɲa mɛn, i ye mɔɔilu karanna wo la tuɲa jɛrɛ jɛrɛ rɔ. 22 Wo rɔ, an ye a fɛ ka i maɲininka ko do ma. A ye di? Ka niisɔnkɔ bɔ ka a di Romu mansaba ma, wo dahani an ma, wala wo dahani tɛ?» 23 Isa ka a lɔn ko a laɲinin kuma le ɲin di. Wo rɔ, a ka a fɔ ii yɛ ko: 24 «Ai ye wodi banan kelen yiraka n na. Yon munuɲa ni yon tɔɔ ye wodi gbanan ɲin kan?» Ii ka a jabi: «Romu mansaba.» 25 Isa ka a fɔ ko: «Nba, ai ye Romu mansaba ta di Romu mansaba ma. Ai ye Alla ta di Alla ma fanan.» 26 Isa ka jabili kɛ koɲuma jama bɛɛ ɲana ka janfanteilu mabali. A la jabili ka ii kabannakoya fɔɔ ka ii makun.

Sadusiilu ka ɲininkali kɛ Isa kun

27 Dina mɔɔ doilu tɛrɛ ye, mɛnilu tɔɔ ko Sadusiilu. Woilu ye a fɔla ko mɔɔ si tɛ wulila ka bɔ saya rɔ. Wo doilu nara i madon Isa la ka a maɲininka ko: 28 «Karanmɔɔ, Musa ka a sɛbɛ a la sariya rɔ ko ni i kɔrɔcɛ sara ka a muso densɔrɔnbali to ye, i ye a muso ta, kosa muso ri den sɔrɔn i kɔrɔcɛ yɛ. 29 Awa, dencɛ wɔrɔnwula tɛrɛ ye cɛɛ do bolo. Dencɛ fɔlɔ ka muso do furu. A sara ka a muso densɔrɔnbali to ye. 30 Ka bɛn sariya ma, dencɛ filana ka muso wo ta. Ale fanan sara ka muso densɔrɔnbali to ye. 31 Wo rɔ, dencɛ sawana ka muso ta. Dencɛ wo fanan sara. A kɛra ten haan muso wo siira kanberen wɔrɔnwula kelen kelenna bɛɛ kun. Ii bɛɛ sara ka muso densɔrɔnbali to ye. 32 A laban, muso fanan sara. 33 A ye di? Su lawuli lon, muso ri cɛɛ yon ta ri sa? A siira a kelen kelenna bɛɛ kun.»

34 Isa ka ii jabi: «Bi mɔɔilu ye furu kɛla. Cɛɛ ni muso ri furu ii ɲɔɔn ma. 35 Kɔni sini, a tɛ kɛ wo ɲa. Alla wa mɔɔ mɛnilu jate, woilu ri wuli ka don harijeene. Kɔni furu ko tɛ ye. Cɛɛ tɛ muso furu. Muso tɛ sii cɛɛ kun ma. 36 Ii tɛ sa butun, fo ka kɛ ikomin mɛlɛkailu. Ii ye Alla la denilu ri, ka a masɔrɔn ii ra bɔ saya rɔ ka don Alla la ɲenemaya banbali rɔ. 37 Mɔɔ ri wuli saya kɔ, sika tɛ wo rɔ. Musa jɛrɛ ka wo le yiraka an na. A bɛnda Alla ri jiri tuni taman dafɛ waati mɛn na, a ka a fɔ Maari Alla ma ko: ‹Iburahima la Alla, Isiyaka la Alla, a ni Yakuba la Alla.› 38 Awa Alla tɛ suilu la Alla ri, fo ɲenemailu. Mɔɔ bɛɛ ɲenema le Alla ɲana.»

39 Sariya karanmɔɔ doilu ka a fɔ Isa yɛ ko: «Ɛɛ, karanmɔɔ! I ra jabili kɛ koɲuma!» 40 Mɔɔ si ma susu ka a ɲininka foyi la wo kɔ.

Mansa Dawuda dencɛ le Mɔɔ Ɲenematɔmɔnin di wa?

41 Isa ka ii ɲininka ko: «Nfenna mɔɔilu ye a fɔla ko Mɔɔ Ɲenematɔmɔnin di kɛ Mansa Dawuda dencɛ do ri wa? 42 Mansa Dawuda jɛrɛ ka a sɛbɛ Jaburi kitabu rɔ ko:

‹Maari Alla ka a fɔ n Maari yɛ ko:

Na i sii n bolokinin ma,

43 haan n ye i juuilu bilala i sen kɔrɔ.›

44 Mansa Dawuda jɛrɛ ka a fɔ a ma ko ‹n Maari.› A ye di? A ri se kɛla Mansa Dawuda dencɛ gbansan di wo rɔ wa?»

Isa ka sariya karanmɔɔilu dɔɔya

45 Isa ka kuma do fɔ a la karandenilu yɛ jama ɲana. A ka a fɔ ko: 46 «Ai ye ai jɛrɛ lakɔrɔsi sariya karanmɔɔilu la ko rɔ. A duman ii yɛ ka duruki ɲumailu don ka i mataama. Ii ye a fɛ mɔɔilu ye ii tuwa ka ii bonya jama ladɛndiya rɔ, a ni ka ɲɛmɔɔ sii diya sɔrɔn salibon kɔndɔ, a ni sali kinin dɔɔn diya. Wo bɛɛ duman ii le yɛ. 47 Ii ri cɛsamusoilu bolofenilu bɛɛ dɔɔn, ka ban ka waati jan kɛ Alla matarala ka ii jɛrɛ kɛ ikomin Alla kaninbailu. Jahadi juu ba ye woilu makɔnɔla.»