1 N tericɛ Teyofili, Isa ka baara ni mɔɔ karan mɛnilu kɛ kɛbi a la baara damira waati haan a kɔrɔtara ka wa harijeene rɔ lon mɛn na, n ka wo bɛɛ sɛbɛ n na sɛbɛli fɔlɔ rɔ ka a lawa i ma. 2 Sani a ye kɔrɔta ka wa harijeene rɔ, a ka a la talibidenbailu karan, a ka mɛnilu suwandi. A ka ii karan Alla la Nii Sɛniman baraka rɔ, ka ii la baara yiraka ii la. 3 A la tɔrɔya kɔrɔ, a bɔra ii ɲakɔrɔ gbɛ rɔ ka ko siyaman kɛ tele binaanin (40) kɔrɔ. A ka a yiraka ii la ɲa siyaman ma ko a kɛndɛ le. Wo tuma, a tɛrɛ ye Alla la mansaya ko fɔla ii yɛ. 4 Lon do rɔ, ka a tɛrɛn a ye dɔɔnninna ii fɛ, a ka a fɔ ii yɛ ko: «Ai kana bɔ Jerusalɛmu yan haan n Fa la lahidi ye dafa, n ka mɛn na ko fɔ ai yɛ kɔrɔman. Ai ye wo dafa makɔnɔ so kɔndɔ yan. 5 Yaya ka mɔɔilu sun ji rɔ, kɔni a tɛ mɛn bakɛ butun, ai ri sun Alla la Nii Sɛniman dɔ.»

6 Ka a tɛrɛn ii bɛɛ ladɛnnin yɔrɔ kelen dɔ, talibidenbailu ka Isa maɲininka ko: «Maari, i ri mansaya lasɛ Isirayɛlikailu ma sisɛn wa?» 7 A ka ii jabi: «Wo ko ri kɛ waati mɛn na, N Fa kelen pe le ri se wo latɛɛla. 8 Kɔni Alla la Nii Sɛniman wa jii ai kan, ai ri sebaya sɔrɔn. Ai ri kɛ n sereilu ri Jerusalɛmu, a ni Jude mara fan bɛɛ a ni Samari mara fan bɛɛ a ni dunuɲa duukolo fan bɛɛ rɔ.»

9 Isa banda wo fɔla tuma mɛn na, a kɔrɔtara ii ɲakɔrɔ ka yɛlɛ harijeene rɔ. Duru ka a latunun ii ma. 10 Ka ii ɲa lɔni to sankolo rɔ ka a watɔla ragbɛ, cɛɛ durukigbɛ tii fila nara i kɔrɔ ka ii lɔ ii tɔrɔfɛ. 11 Woilu ka a fɔ ko: «Kalilekailu, nfenna ai lɔni yan ka sankolo ragbɛ? Isa mɛn bɔni ai tɛma yan, ka wa harijeene rɔ, a ri na ikɔ tuun. A wani ɲa mɛn ma ai ɲana, a ri na ikɔ tuun wo ɲa kelen ma.»

12 Nba, talibidenbailu bɔra Olibiye Koyinkɛ kan ka ii kɔsɛ Jerusalɛmu. A ni Jerusalɛmu tɛma ri kilo kelen ɲɔɔn bɔ. 13 Ii seni Jerusalɛmu, ii wara sankaso san ma bon kɔndɔ, ii ye i ɲɔɔn nadɛnna yɔrɔ mɛn dɔ kɔnin. Piyɛri tɛrɛ ye, a ni Yuhana, Yakuba, Andere, Filipe, Tomasi, Baritɔlɔmi, Matiyu, Alife dencɛ Yakuba, Simɔn Fabaden a ni Yakuba dencɛ Juda. 14 Ii tɛrɛ ye ii ladɛnna Alla matara kanma miriya kelen de la. Muso doilu fanan tɛrɛ ye ii rɔ, a ni Isa na Mariyamu a ni Isa dɔɔcɛilu.

15 Nba, lon do rɔ, Piyɛri ka i lɔ a badenmailu tɛma ka kuma. Wo ka mɛnilu tɛrɛn ye, woilu ri mɔɔ kɛmɛ ni mɔɔ muwan (120) bɔ. 16 Piyɛri ka a fɔ ko: «N badenmailu, mɛn sɛbɛnin Alla la kitabu kɔndɔ ka fara Alla la Nii Sɛniman na, mansa Dawuda ka mɛn fɔ Judasi la ko rɔ (Judasi mɛn ka Isa yiraka a mirabailu la) wo sɛbɛ ka kan ka dafa. 17 A tɛrɛ ye an na dɛkuru le rɔ. An ka baara mɛn sɔrɔn Alla la, a sen tɛrɛ ye wo fanan dɔ.» 18 Nba, Judasi ka wodi mɛn sɔrɔn a la juuya sara ri, a ka wo ta ka duu do san. A bera wo duu kan*, ka a kɔnɔ fara ka a noo bɛɛ bɔ kɛnɛ ma. 19 Jerusalɛmukailu bɛɛ kolɔnda wo rɔ tuma mɛn na, ii ka yɔrɔ wo tɔɔ la ii la kan dɔ ko Akɛlidama. Wo kɔrɔ le ko Jeli Duu. 20 Piyɛri ka a fɔ ko: «A sɛbɛnin Jaburi rɔ ko:

‹A la lɔdiya, a dakolon di to.

Mɔɔ si kana don a kɔndɔ.›

«A ni:

‹Mɔɔ gbɛrɛ ye a lɔ a nɔ rɔ.›

21 «Wo le kosɔn, an ka kan ka mɔɔ kelen suwandi mɛn bilara an kɔ Maari Isa la waati bɛɛ rɔ 22 kɛbi Isa sun waati ji rɔ Yaya bolo haan a kɔrɔtara waati mɛn na ka yɛlɛ harijeene rɔ, a bɔra an tɛma lon mɛn na. Mɔɔ wo ye kɛ mɔɔ ri an tɛma mɛn di a sereya ko Maari Isa ra wuli ka bɔ saya rɔ.»

23 Wo rɔ, lemɛniya jamailu ka mɔɔ fila ɲatɔmɔn. Do tɔɔ ko Yusufu. A tɔ kelen tɔɔ ko Matiyasi. Yusufu wo tɔɔ le fanan ko Barisabasi. Doilu ye a fɔla a ma ko Jusitusu. 24 Ii bɛɛ ladɛnnin ka Alla matara ko: «Maari, ile le ka mɔɔilu bɛɛ sɔnɔmɛ lɔn. I ra mɛn suwandi mɔɔ fila ɲin dɔ, i ye wo yiraka an na. 25 Wo ye bila Judasi nɔ rɔ ka kɛ talibidenba ri ka baara an ɲɔɔn fɛ, baa Judasi ka baara wo bila, ka wa a sara sɔrɔn mɛn ni a la baara julu sara ka kan.» 26 Ii banda Alla matarala ka kala matɛɛ. Kala ka Matiyasi mira. Wo rɔ, ale lara talibidenba tan ni kelen kan.