1 Nba, Fɛsitusi siira jamanatiiya la Sesare. Tele sawa a naaninnan a wara bɔ Jerusalɛmu. 2 A se mɛn kɛni ye, Alla la sarakalasela kuntiilu ni Judiya ɲɛmɔɔilu nara ka tɔɔ la Pɔli la. Ii ka Fɛsitusi madiya 3 ko a ye ii dɛmɛn. Ko a ye ii diyanan ko kɛ ii yɛ ka Pɔli lana Jerusalɛmu. Wo ka a tɛrɛn ii ra bɛn kan kelen ma ko ni Pɔli nara Jerusalɛmu, ii ri be a kan sila la ka a faa. 4 Fesitusi ka ii jabi: «Pɔli bilanin kaso la Sesare. A tɛ mɛn ba kɛ n di n kɔsɛ so kɔndɔ ye. 5 Wo rɔ, ai ye ai la ɲɛmɔɔ doilu lawa n fɛ Sesare. Ni cɛɛ wo ka kojuu le kɛ, ai ri tɔɔ la a la ye.»

6 Fesitusi ka tele seyin wala tele tan kɛ Jerusalɛmu, ka ban ka i kɔsɛ Sesare. A sera ye lon mɛn na, wo duu sa gbɛ a wara i sii kiti diya ka kela lawa ko ii ye na Pɔli ri. 7 Pɔli nara tuma mɛn na, Judiya mɛnilu bɔni Jerusalɛmu, woilu ka ii lɔ a laminin dɔ ka kojuu bailu la a la. Kɔni ii ma se ka wo si yiraka tuɲa la. 8 Wo rɔ, Pɔli ka a ta fɔ ko: «N ma kojuu si kɛ. N ma Judiyailu la sariya tiɲan. N ma Alla batobonba manɔɔ. N ma Romu mansaba mafɔ.» 9 Fesitusi tɛrɛ ye a fɛ ka Judiyailu dɛmɛn ka ii diyanan ko kɛ ii yɛ. Wo rɔ, a ka Pɔli maɲininka ko: «I ri wa Jerusalɛmu wa, sa n di kititɛɛ ko ɲinilu kan ye?» 10 Pɔli ka a jabi: «N lɔni Romu mansaba la kiti diya le rɔ ɲin di. N na ko ka kan ka ɲanabɔ yan de. N ma foyi kɛ Judiyailu la. I jɛrɛ ka wo lɔn. 11 Ni a ka a sɔrɔn n da sariya tiɲan, ka ko do kɛ mɛn di n faa kun bɔ, n tɛ n ban n faa ko ma. Kɔni mɔɔ ɲinilu ye ko mɛnilu lala n na, ni woilu ra tɔɔ la n na foyi tɛ tuɲa ri, mɔɔ si ma kan ka n don ii bolo. Wo le rɔ, n ye a fɛ Romu mansaba jɛrɛ ye n na kititɛɛ.»

12 Fesitusi ni a la mɔɔilu ka i ɲɔɔn yen ka ban tuma mɛn na, a ka Pɔli jabi: «Ikomin i ye a fɛ Romu mansaba jɛrɛ ye i la kititɛɛ, i ri wa mansaba wara Romu.»

13 Waati wo taminni kɔ, mansa Akiripa ni Bɛrɛnisi* nara Sesare ka Fɛsitusi fo. 14 Ii ka tele siyaman kɛ ye. Wo kɔ rɔ, Fɛsitusi ka Pɔli la ko fɔ mansa yɛ. A ka a fɔ ko: «Felisi bɔra yan ka cɛɛ do to a kɔ kaso la. 15 N wara Jerusalɛmu tuma mɛn na, Alla la sarakalasela kuntiilu ni Judiya mɔɔbakɔrɔilu ka a la ko fɔ n yɛ, ka n madiya ko n ye a la kititɛɛ ka a faa. 16 N ka ii jabi ko Romukailu tɛ wo kɛla. N ka a fɔ ko ka bɛn an na namun ma, kiti kana tɛɛ mɔɔ kan fɔɔ a ni a jalakibailu ye i ɲɔɔn yen ɲa ni ɲa. Wo rɔ, ii ye a jalakila ko mɛnilu la, a ri fɛrɛ sɔrɔn ka woilu jabi. 17 Wo le rɔ, mɔɔ woilu nara yan tuma mɛn na, n ma a ko lasumaya. Ii nara lon mɛn, wo duu sa gbɛ n wara n sii kiti diya ka kela lawa ko cɛɛ wo ye na. 18 Kɔni a jalakibailu ka ii lɔ ka kuma tuma mɛn na, n mirini tɛrɛ kojuu mɛnilu ma, ii ma a jalaki wo si la. 19 Ɛɛn. Ii tɛrɛ ye i ɲɔɔn sɔsɔla ii la dina ko rɔ. Ii tɛrɛ ye i ɲɔɔn sɔsɔla fanan cɛɛ do la ko rɔ mɛn tɔɔ ko Isa. Wo sara, kɔni Pɔli ka a fɔ ko a kɛndɛ le. 20 N tun ma a lɔn n di ko ɲin ɲabɔ ɲa mɛn ma. Wo le rɔ, n ka Pɔli maɲininka ni a ri wa kiti diya Jerusalɛmu, sa ko ɲinilu ri ɲanabɔ. 21 Kɔni Pɔli ka i ban wo ma. A ka a fɔ ko a ri to kaso la yan fo Romu mansaba jɛrɛ ye a la kititɛɛ. Wo rɔ, n ka a fɔ ko ii ye a lamara kaso la fo n wa a ɲa sɔrɔn ka a lawa mansaba ma.» 22 Akiripa ka a fɔ Fɛsitusi yɛ ko: «N ye a fɛ ka n tolo malɔ cɛɛ wo la.» Fɛsitusi ka a fɔ ko: «Ale le wo ri. I ri a lamɛn sini.»

23 Wo duu sa gbɛ, mansa Akiripa ni Bɛrɛnisi nara. Mɔɔilu tɛrɛ ye ii bonyala a ɲa jɛrɛ jɛrɛ ma. Ii ni tɛsidi kuntiilu ni so mɔɔbailu donda i ɲɔɔn fɛ ladɛn bon ba la. Ii seni ye, Fɛsitusi ka a fɔ a la mɔɔilu yɛ ko ii ye na Pɔli ri. Ii nara a ri. 24 Fɛsitusi ka a fɔ ko: «Mansa Akiripa ni mɛnilu ye an fɛ yan, ai ɲa ye cɛɛ mɛn na ɲin di. Judiyailu bɛɛ makasini ale le kan Jerusalɛmu, ka ii makasi a kan yan fanan. Ii sɔnkɔra ko a ka kan ka faa. 25 Nde ma kojuu si yen a la, mɛn di a faa kun bɔ. Kɔni a jɛrɛ ka a fɔ ko a ye a fɛ Romu mansaba jɛrɛ le ye a la kititɛɛ. Wo rɔ, n ka a latɛɛ ko n di a lawa mansaba ma. 26 Kɔni n ma a lɔn fɔlɔ n ka kan ka mɛn sɛbɛ a la ko rɔ ka a di n tii mansaba ma. Wo le rɔ, n da a lana ai bɛɛ ɲakɔrɔ, katɛrɛtɛ ile mansa Akiripa ma, sa ii wa a la ko fɛsɛfɛsɛ, n di ko do sɔrɔn n ka kan ka mɛn sɛbɛ, 27 baa i wa kasoden nawa mansaba ma, i ka kan ka a jalaki kun fɔ. Ni wo tɛ, a ti bɛn.»