1 Pɔli ka a ɲa lɔ kititɛɛ dɛkuru rɔ kosɛbɛ, ka a fɔ ii yɛ ko: «N badenmailu, n da n taama kɔnɔgbɛya rɔ Alla ɲana haan sisɛn.» 2 Mɔɔ mɛnilu lɔni tɛrɛ Pɔli tɔrɔfɛ, Alla la sarakalasela kuntiiba Ananiyasi ka a fɔ woilu yɛ ko ii ye Pɔli gbasi a da rɔ. 3 Pɔli ka a fɔ a yɛ ko: «Ile, filanfilante! Alla fanan di ile gbasi. I siini yan ko ka n na kititɛɛ ka bɛn sariya ma, kɔni i jɛrɛ ra sariya tiɲan, baa ile ka a fɔ ko ii ye n gbasi.» 4 Mɔɔ mɛnilu lɔni tɛrɛ Pɔli tɔrɔfɛ, woilu ka a fɔ ko: «I ye Alla la sarakalasela kuntiiba le naninna ten wa?» 5 Pɔli ka ii jabi: «N badenmailu, n tun ma a lɔn ko ale le Alla la sarakalasela kuntiiba ri. Ni wo tɛ, n tun tɛ wo fɔ, baa a sɛbɛni Alla la kitabu kɔndɔ ko: Mɛn siini i la mɔɔilu kun na, i kana kuma juu fɔ wo ma.»

6 Nba, Pɔli ka a yen ko kititɛɛ dɛkuru faranin. A fan kelen ye Sadusiilu ri. A fan kelen ye Farisiilu ri. Wo le kosɔn, Pɔli ka a kan nabɔ ka a fɔ ko: «N badenmailu, n ye Farisi le ri. N fa fanan ye Farisi le ri. Kiti ye kɛla n kanma bi ka a masɔrɔn n jii lanin su lawuli ko rɔ, ka bɔ saya rɔ.» 7 Pɔli ka wo fɔ tuma mɛn na, sɔsɔli wulira Farisiilu ni Sadusiilu tɛma. Jama ratalara fila ri, 8 baa Sadusiilu ye a fɔla ko su ti nala lawulila ka a bɔ saya rɔ, ko mɛlɛkailu ni jenailu fanan tɛ ye. Kɔni Farisiilu lani wo bɛɛ la.

9 Nba, a kɛra mankan ba ri. Sariya karanmɔɔ mɛnilu tɛrɛ Farisiilu ri, wo doilu wulira ka sɔsɔli kɛ kosɛbɛ ko: «An ma kojuu si yen cɛɛ ɲin na. Ni mɛlɛka wala jena kumara a yɛ don?» 10 Sɔsɔli juuyara fɔɔ tɛsidi kuntiiba silanda ko ii kana Pɔli sɔmɔn ii ni ii ɲɔɔn tɛ ka a faa. Wo rɔ, a ka tɛsidiilu lawa ka Pɔli labɔ mɔɔilu tɛma fanka la, ka wa a ri tɛsidiilu la bon ba la.

11 Su wo rɔ, Maari ka a jɛrɛ yiraka Pɔli la ka a fɔ a yɛ ko: «I sɛɛbɛ don. I ra n na ko fɔ ɲa mɛn ma Jerusalɛmu, i ka kan ka a fɔ wo ɲa kelen de ma Romu so kɔndɔ fanan.»

12 Kɛnɛ bɔra tuma mɛn na, Judiya doilu ka ii ladɛn ka bɛn kan kelen ma. Ii ka ii kali ko ii tɛ dɔɔnnin kɛ, ko ii tɛ ji min fɔɔ ii wa Pɔli faa. 13 Mɔɔ binaanin (40) ni kɔ le bɛnda wo ma. 14 Ii wara Alla la sarakalasela kuntiilu ni mɔɔbakɔrɔilu tɛrɛn ye, ka a fɔ ii yɛ ko: «An ka an kali ko an tɛ dɔɔnnin kɛ fɔɔ an wa Pɔli faa. 15 Wo bolo ma, ai ni kititɛɛ dɛkuru ye kela lawa tɛsidi kuntiiba ma ko a ye Pɔli lana ai ma, sa ai ri a la ko fɛsɛfɛsɛ koɲuma. An di an dabɛn ka a faa sila la sani a ye se ai ma yan.»

16 Kɔni Pɔli barincɛ ka janfa kuma wo mɛn. A wara tɛsidiilu la bon ba la ka wo ɲafɔ Pɔli yɛ. 17 Wo rɔ, Pɔli ka tɛsidi kuntii do kili ka a fɔ a yɛ ko: «I ye wa kanberen ɲin malɔ tɛsidi kuntiiba ma. Kuma do ye a fɛ ka a fɔ a yɛ.»

18 Kɛlɛden kuntii wo wara kanberen malɔ tɛsidi kuntiiba ma, ka a fɔ a yɛ ko: «Kasoden mɛn tɔɔ ko Pɔli, wo ka n kili ka a fɔ n yɛ ko n ye na kanberen ɲin di i ma. Ko kuma do ye a fɛ ka a fɔ i yɛ.» 19 Kɛlɛden kuntiiba ka kanberen mira a bolo ma ka i mabɔ mɔɔilu la ka a maɲininka ko: «Nfen ye i fɛ ka a fɔ n yɛ?» 20 Kanberen ka a fɔ a yɛ ko: «Judiya doilu ra bɛn kan kelen ma ko ii ri i madiya sini, ko i ye wa Pɔli ri kititɛɛ dɛkuru ma sa ii ri a la ko fɛsɛfɛsɛ koɲuma. 21 Kɔni i kana sɔn wo ma, baa mɔɔ binaanin (40) ni kɔ ye Pɔli makɔnɔla sila la, sa ii ri a faa. Ii ra ii kali, ko ii tɛ dɔɔnnin kɛ, ko ii tɛ ji min, fɔɔ ii wa a faa. Ii ra ban ii rabɛnna fewu. Ii ye ile la jabili le makɔnɔla sisɛn.»

22 Kɛlɛden kuntiiba ka a fɔ kanberen yɛ ka a magbɛlɛnya ko: «I kana a fɔ mɔɔ si yɛ ko i ra ko ɲin nase n ma.» Wo rɔ, a ka sila di kanberen ma ko a ye wa.

23 Tɛsidiilu kuntiiba ka tɛsidi kuntii fila kili ka a fɔ ii yɛ ko: «Ai ye tɛsidi mɔɔ kɛmɛ fila (200) rabɛn, a ni sootii biwɔrɔnwula (70) ni tanbatii kɛmɛ fila (200). Dibi wa don kosɛbɛ, ai bɛɛ ye wa Sesare. 24 Ai ye so doilu rabɛn Pɔli yɛ fanan. Ai ye wa a kɛndɛ malɔ jamanatii Felisi wara Sesare.»

25 A ka sɛbɛli rabɛn ka a don ii bolo. A ka mɛn sɛbɛ, wo le ɲin di.

26 «Nde Kolodi Lisiyasi le ye sɛbɛ ɲin nawala jamanatii ɲuma Felisi ma. N ye i fola.

27 «Judiyailu ka cɛɛ ɲin mira. Ii tɛrɛ ye a faa ko rɔ. N ka a mɛn waati mɛn na ko Romu duuren de a ri, n ka tɛsidiilu ta ka wa a bɔsi ii bolo. 28 Judiyailu tɛrɛ ye a jalakila kun mɛn na, n tɛrɛ ye a fɛ ka wo lɔn. Wo le rɔ, n wara a ri ii la kititɛɛ dɛkuru rɔ. 29 Wo rɔ, n ka a yen ko a jalaki kun ye ii jɛrɛ la sariya koilu le ri. Kɔni mɛn ni saya wala kaso labila ka kan, ii ma a jalaki wo si la. 30 A fɔra n ɲana tuma mɛn na ko Judiya doilu ra bɛn kan kelen ma ko ii ri a faa, n ka a lawa i ma i kɔrɔ. N ka a fɔ a jalakibailu yɛ ko ii ye wa a jalaki kun fɔ ile ɲana. Mɛn tɛrɛ ye n fɛ ka a fɔ i yɛ, wo le wo ri.»

31 Nba, mɛn fɔra tɛsidiilu yɛ, ii ka wo kɛ. Ii wara Pɔli ri Antipatirisi so la su wo rɔ. 32 Wo duu sa gbɛ, tɛsidi mɛnilu tɛrɛ ye ii sen ma, woilu ka ii kɔsɛ ka wa ii la bon ba la. Mɛnilu tɛrɛ ye sotiilu ri, woilu wara Pɔli malɔ. 33 Sotiilu sera Sesare tuma mɛn na, ii ka sɛbɛ di jamanatii ma ka Pɔli karifa a la. 34 Jamanatii ka sɛbɛ karan ka Pɔli maɲininka a bɔ yɔrɔ ma. Pɔli ka a fɔ ko a bɔni Silisi le. 35 Wo rɔ, jamanatii ka a fɔ a yɛ ko: «I jalakibailu wa na tuma mɛn na, n di i fɛsɛfɛsɛ ka i la kititɛɛ.» Mansa Herodi tun ka mansa jiya bon mɛn lɔ, jamanatii ka a fɔ ko ii ye Pɔli bila wo la ka a kɔnɔgbɛn.