1 A ka a fɔ ko: «N failu ni n badenmailu, ai ye ai tolo malɔ n na, n ye mɛn fɔla n jɛrɛ kunka ko rɔ.» 2 Ii ka Heburukan mɛn a da rɔ tuma mɛn na, ii ka ii sabari kosɛbɛ. Pɔli ka a fɔ ko:

3 «Judiya le nde ri. N sɔrɔnni Silisi Tarisi, kɔni n namɔni Jerusalɛmu yan de. N tɛrɛ karanmɔɔ Kamaliyɛli le bolo. Ale le ka n karan kosɛbɛ an benbailu la sariya la. N fanan tɛsidini tɛrɛ Alla la ko la kosɛbɛ, ikomin ai jɛrɛ tɛsidini ɲa mɛn ma bi. 4 N ka sila kura ɲin taamabailu tɔrɔ kojuuya fɔɔ ka doilu faa. N tɛrɛ ye ii mirala, cɛɛ ni muso, ka ii bila kaso la. 5 Alla la sarakalasela kuntiiba ni mɔɔbakɔrɔilu bɛɛ ye n sereilu ri wo ko rɔ. N ka sɛbɛ sɔrɔn ii la, sa n di wa wo ri ii badenmailu ma Damasi. Wo bolo ma, n wara Isa la mɔɔilu ɲinin Damasi. N wa mɛnilu sɔrɔn ye, n tun ye a fɛ ka woilu mira ka ii sidi, ka na ii ri Jerusalɛmu yan sa ko ri latɔn ii la.»

6 «Nba, n watɔla, telelatelen waati ka n sudunyani tɛrɛ Damasi la. Wo tuma, fen do mɛlɛn ba bɔra gbɛ rɔ san ma kelen di ka na n naminin. 7 N bera duu ma. N ka kumakan do mɛn ko: Sawuli, Sawuli, i ye n tɔrɔla kojuuya nfenna? 8 N ka ɲininkali kɛ ko: ‹Maari, i ye yon di?› A ka n jabi: ‹Isa Nasarɛtika le nde ri, i ye mɛn tɔrɔla kojuuya kɔnin.› 9 Nba, n taamaɲɔɔnilu ka kɛnɛ yelen ba wo yen. Kɔni kumakan mɛn tɛrɛ ye kumala n yɛ, ii ma wo mɛn. 10 N ka a fɔ ko: ‹N ye nfen kɛ, Maari?› Maari ka n jabi: ‹I wuli ka wa Damasi. Ko mɛn bɛɛ latɛɛni i ma ka kɛ, wo bɛɛ ri fɔ i yɛ ye.› 11 N ma se foyi yenna ka a masɔrɔn kɛnɛ yelen ba wo bonyara kojuuya ka n ɲa lafin. Wo rɔ, n taamaɲɔɔnilu le ka n bolo mira ka wa n di Damasi.

12 «Wo ka Alla ɲɛsilanɲɛba do tɛrɛn Damasi, mɛn tɔɔ ko Ananiyasi. Cɛɛ wo tɛrɛ ye Alla la sariya mirala kosɛbɛ. Damasi Judiyailu bɛɛ tɛrɛ ye a tɔɔ ɲuma fɔla. 13 A nara ka i lɔ n dafɛ ka a fɔ n yɛ ko: ‹N badenma Sawuli, i ɲa ye laka ikɔ tuun.› Nde fanan, waati kelen wo rɔ, n ka a yen. 14 A ka a fɔ ko: ‹An benbailu Maari Alla ra i ɲenematɔmɔn, sa i ri a sawo lɔn, ka a la Mɔɔ Telenni yen, ka a la kuma mɛn ka bɔ a jɛrɛ da rɔ. 15 I ri kɛ a sere ri, baa i ka ko mɛnilu yen a ni i ka ko mɛnilu mɛn, i ri woilu lase mɔɔilu bɛɛ ma. 16 Nba, i ye nfen makɔnɔla sisɛn? I wuli ka sun ji rɔ, ka Maari matara sa a ri i ko ka i la kojuu bɔ i ma.›

17 «Kɔ fɛ, n ka n kɔsɛ Jerusalɛmu. Lon do rɔ, n tɛrɛ ye Alla matarala Alla batobonba la tuma mɛn na, Alla ka fen do yiraka n na. 18 N ka Maari yen. A ka a fɔ n yɛ ko: ‹I kaliya. I ye bɔ Jerusalɛmu i kɔrɔ ka wa, baa i ye a fɛ ka n na kuma mɛn sereya bɔ yan mɔɔilu yɛ ii ti nala sɔnna wo ma.› 19 N ka a jabi: ‹Maari, ii jɛrɛ ka a lɔn ko n tɛrɛ ye donna salibonilu la ka i la lemɛniya mɔɔilu mira ka ii gbasi ka ii bila kaso la. 20 Mɔɔilu tɛrɛ ye i sere Etiyɛn faala waati mɛn na, n jɛrɛ lɔni tɛrɛ ye. N sɔnda wo bɛɛ ma, fɔɔ ka a faabailu la durukiilu ramira ii yɛ.› 21 Kɔni Maari ka a fɔ n yɛ ko: ‹Wa! N kɛtɔ i lawala siya gbɛrɛilu ma, mɛnilu siini yɔrɔ jan.›»

22 Nba, mɔɔilu tɛrɛ ye ii tolo malɔla Pɔli la haan a ka siya gbɛrɛilu la ko fɔ. A ka wo fɔ tuma mɛn na, ii bɛɛ sɔnkɔra ko: «A ye bɔ yan ka a faa! A ma kan ka balo butun!» 23 Ii tɛrɛ ye ii kan nabɔla, ka ii la durukiilu bɔ ka woilu lafilifili, ka buuri lasyɛlɛ san ma. 24 Kɛlɛden kuntiiba ka wo yen ka a fɔ a la tɛsidiilu yɛ ko ii ye Pɔli ladon bon ba la. Ko ii ye a gbasi gbiɲɛ la ka a fɛsɛfɛsɛ, sa a ri jama jaman kun fɔ ii yɛ. 25 Ii ka Pɔli sidi ko ii ye a gbasila tuma mɛn na, Pɔli ka a fɔ tɛsidi kuntii yɛ ko: «Ka Romu duuren do gbasi gbiɲɛ la ka a sɔrɔn a la kiti ma tɛɛ fɔlɔ, wo dahani wa?» 26 Tɛsidi kuntii ka wo mɛn tuma mɛn na, a wara tɛsidi kuntiiba tɛrɛn ye ka a fɔ a yɛ ko: «I kɛtɔ nfen kɛla cɛɛ ɲin na? A ye Romu duuren de ri de!» 27 Kɛlɛden kuntiiba jɛrɛ wara Pɔli maɲininka ko: «Romu duuren de ile ri wa?» Pɔli ka a jabi: «Ɔɔn.» 28 Kɛlɛden kuntiiba ka a fɔ ko: «N ka wodi ba le bɔ ka kɛ Romu duuren di.» Pɔli ka a fɔ ko: «Nde sɔrɔnnin de a rɔ!» 29 Mɛnilu kɛtɔ tɛrɛ ye Pɔli fɛsɛfɛsɛla, woilu ka wo mɛn ka ii mabɔ a la kelen di. Kɛlɛden kuntiiba jɛrɛ silanda, ka a masɔrɔn ale le tun ka Pɔli sidi nɛɛ jɔlɔkɔ la, ka a tɛrɛn a ye Romu duuren de ri.

30 Wo duu sa gbɛ, tɛsidi kuntiiba ka Pɔli la ko rabila dɔɔnin ka Alla la sarakalasela kuntiilu ni kititɛɛ dɛkuru bɛɛ kili ka ii ladɛn, baa Judiyailu ye Pɔli jalakila kun mɛn na, tɛsidi kuntiiba tɛrɛ ye a fɛ ka wo lɔn. Wo rɔ, a ka Pɔli lalɔ ii ɲakɔrɔ.