1 Nba, an ka foli di lemɛniya mɔɔilu ma ka don kulunba kɔndɔ. An bɔra ye ka an telen Kɔsi la. Wo duu sa gbɛ an wara se Rɔdi, ka bɔ ye ka wa Patara. 2 An ka kulunba do tɛrɛn ye, mɛn watɔ Fenisi jamana rɔ. An donda wo kɔndɔ ka wa. 3 An sudunyara Sipere ka a yen, kɔni an taminda a la a tele kankan bolo kinin fan fɛ. An wara Siri jamana rɔ ka an lɔ Tiri, baa donin mɛn tɛrɛ ye kulun kɔndɔ, wo tun ka kan ka lajii so wo le la. 4 An wara karandenilu ɲinin so kɔndɔ, ka tele wɔrɔnwula kɛ woilu fɛ. Alla la Nii Sɛniman tun ka a yiraka ii la ko ko ri Pɔli sɔrɔn Jerusalɛmu. Wo le ka a kɛ, ii ka a lali ko a kana wa ye. 5 Kɔni an wa lon sera tuma mɛn na, an bɔra ye ka wa. Karandenilu ni ii musoilu ni ii denilu bɛɛ bɔra so kɔndɔ ka wa an bilasila diya fɔɔ kulun da la. An bɛɛ ka an ɲɔnkin ji da la ye ka Alla matara. 6 An banda Alla matarala ka foli di an ɲɔɔn ma tuma mɛn na, an donda kulunba kɔndɔ. Woilu ka ii kɔsɛ ka wa ii wara.

7 An bɔra Tiri ka wa Pitolemayisi kulunba kɔndɔ. An se mɛn kɛni ye, an bɔra kulunba kɔndɔ ka wa ye lemɛniya mɔɔilu fo. An ka tele kelen kɛ woilu fɛ. 8 Wo duu sa gbɛ, an bɔra ye ka wa Sesare. An wara jiya Filipe wara, mɛn tɛrɛ ye kibaro ɲuma lasela ri. Jerusalɛmu lemɛniya mɔɔilu tun ka cɛɛ wɔrɔnwula mɛn ɲenematɔmɔn ka ii kɛ talibidenbailu dɛmɛnbailu ri, Filipe tɛrɛ woilu do le ri. 9 Denmuso sunkurun naanin tɛrɛ ye Filipe bolo. Wo si tun ma sii cɛɛ kun fɔlɔ. Woilu tɛrɛ ye kuma sɔrɔnna Alla la ka a lase mɔɔilu ma.

10 An ka tele dɔndɔ kɛ Filipe wara tuma mɛn na, Alla la keladen fisamante do nara ka bɔ Jude mara. Wo tɔɔ ko Akabusi. 11 A nara an ma ka Pɔli la tɛsidilan ta. A ka a jɛrɛ sen ni a bolo sidi wo la, ka a fɔ ko: «Alla la Nii Sɛniman ka a fɔ ko Judiyailu ri tɛsidilan ɲin tii mira Jerusalɛmu, ka a sidi wo ɲa ma ka a don siya gbɛrɛilu bolo.» 12 An ka wo mɛn tuma mɛn na, an ni ye mɔɔilu ka Pɔli madiya kosɛbɛ ko a kana wa Jerusalɛmu. 13 Pɔli ka an jabi: «Ai ye kasila ten ka n jusu tiɲan kojuuya nfenna? Ni ii ka n sidi Jerusalɛmu, n dabɛnni wo ma. Hali ni ii ka n faa Maari Isa la ko kosɔn, n dabɛnni wo bɛɛ ma.» 14 An ka a yen tuma mɛn na ko Pɔli tɛ sɔn an kan mirala, an ka a to ten, ka a fɔ ko: «Maari sawo ye kɛ.»

15 Tele dɔndɔ taminni kɔ, an ka an dabɛn ka wa Jerusalɛmu. 16 Sesare karanden doilu nara an malɔ, ka an nana an jiya diya Minasɔn wara. Minasɔn ye Sipereka le ri. A kɛni Isa la karanden di kɛbi waati jan.

17 An se mɛn kɛni Jerusalɛmu, ye lemɛniya mɔɔilu ka an damira koɲuma. 18 Wo duu sa gbɛ, Pɔli ni an tɔilu wara Yakuba wara. An ka lemɛniya mɔɔilu la ɲɛmɔɔilu bɛɛ tɛrɛn ye. 19 Pɔli banda folila tuma mɛn na, a kumara ii yɛ. Alla tun ka ko mɛnilu kɛ siya gbɛrɛilu tɛma ka fara Pɔli la baara la, a ka wo bɛɛ lase ii ma kelen kelen. 20 Ii ka ii tolo malɔ ko woilu la, ka Alla tando kosɛbɛ. Ii ka a fɔ Pɔli yɛ ko: «An badenma, i ma a yen Judiya waa siyaman de lanin Isa la yan. Wo bɛɛ tɛsidini Musa la sariya ko le la. 21 Kɔni a ra fɔ ii ɲana ko i ye Judiyailu karanna, mɛnilu siini siya gbɛrɛilu tɛma kɔnin. Ko i ye a fɔla woilu yɛ ko ii ye Musa la sariya bila, ko ii kana ii denilu la faaninta kɛ butun, ko ii kana an na namunilu bonya. 22 Sika tɛ a rɔ, ii wa a mɛn ko i ra na. An ye a kɛla di wo rɔ? 23 Nba, an ye mɛn fɔla i yɛ sisɛn, i ye wo mira. Cɛɛ naanin ye an bolo yan, mɛnilu ra dakan ta Alla yɛ. 24 I ye la woilu kan ka sɛninya namun kɛ ii fɛ. I jɛrɛ ye wodi bɔ, sa ii ri ii kun li. Wo wa kɛ, bɛɛ ri a lɔn ko i la ko mɛn fɔni ii ɲana, ko tuɲa tɛ wo ri. Ii ri a lɔn fanan ko i jɛrɛ ye i taamanna sariya sila kan. 25 Kɔni siya gbɛrɛ mɛnilu ra la Isa la, an da sɛbɛ lawa woilu ma kɔrɔman ka an miriya yiraka ii la. An ka a fɔ ii yɛ ko ii kana joo sɔ sobo dɔɔn. Ko ii kana jeli dɔɔn. Ko ii kana juufaa sobo dɔɔn, jeli ye mɛn dɔ. Ko ii kana jalonya kɛ.»

26 Nba, wo duu sa gbɛ, Pɔli ka mɔɔ naanin woilu ta ka wa sɛninya namun kɛ ii fɛ. Wo kɔ rɔ, a wara Alla batobonba la ka sɛninyali dafa lon fɔ. Wo lon wa se, saraka ri bɔ ii kelen kelenna bɛɛ yɛ.

27 Seniyali wo ye kɛla tele wɔrɔnwula le kɔrɔ. Waati wo dafatɔla, Asi jamana Judiya doilu ka Pɔli yen Alla batobonba kɔndɔ. Ii ka mankan nawuli jama tɛma ka Pɔli mira. 28 Ii ka ii kan nabɔ ko: «Isirayɛlikailu, ai ye na an dɛmɛn! Cɛɛ mɛn ye mɔɔ bɛɛ karanna fan bɛɛ rɔ ko ii kana an na mɔɔilu ni Musa la sariya ni an na yɔrɔ ɲin jate, wo le ɲin di. Ka a la wo bɛɛ kan, a ra na Kirɛkiilu ri Alla batobonba jɛrɛ kɔndɔ, ka an na yɔrɔ sɛniman ɲin nɔɔ.» 29 Ii ka wo fɔ ka a masɔrɔn ii tun ka Torofime, mɛn bɔni Ɛfɛsi, a ni Pɔli yen i ɲɔɔn fɛ so kɔndɔ. Ii ka ii miri ko Pɔli tun da don a ri Alla batobonba jin kɔndɔ.

30 Mankan bonyara ka so bɛɛ lamaa. Mɔɔilu borimantɔ nara ka bɔ fan bɛɛ rɔ. Ii ka Pɔli mira ka a sɔmɔn ka a labɔ Alla batobonba jin kɔndɔ. Mɔɔilu ka bon dailu tuun i kɔrɔ. 31 Ii tɛrɛ ye a faa ɲa ɲininna tuma mɛn na, kela sera Romu tɛsidiilu la kuntiiba ma ko Jerusalɛmu so bɛɛ ra lawɔyɔ. 32 A ka tɛsidi kuntii doilu ni tɛsidi doilu ta i kɔrɔ ka a bori ka wa jama rɔ. Judiyailu ka tɛsidi kuntiiba ni a la tɛsidiilu yen tuma mɛn na, ii ka Pɔli gbasi boloka. 33 Kɛlɛden kuntiiba nara ka Pɔli mira. A ka a fɔ tɛsidiilu yɛ ko ii ye Pɔli sidi nɛɛ jɔlɔkɔ fila la. A ka jama maɲininka ko cɛɛ ɲin ye yon di, a ka nfen kɛ? 34 Mɔɔilu tɛrɛ ye ii kan nabɔla kosɛbɛ. Do ta ni do ta tɛ kelen di. Kɛlɛden kuntiiba ka a yen ko a ti se tuɲa gbɛ sɔrɔnna ka a masɔrɔn mankan ka siya. Wo rɔ, a ka a fɔ tɛsidiilu yɛ ko ii ye wa Pɔli ri ii la bon ba la. 35 Ii sera bon yɛlɛyɛlɛnanilu ma tuma mɛn na, tɛsidiilu ka Pɔli layɛlɛ ii boloilu la ka wa a ri, baa jama mɔnɛnin tɛrɛ kojuuya ii muruntira a kanma. 36 Ii tɛrɛ ye tɛsidiilu kɔ, ka ii kan nabɔ ko: «Ai ye a faa, ai ye a faa!»

37 Pɔli ladontɔ tɛrɛ ye bon ba la tuma mɛn na, a ka a fɔ tɛsidi kuntiiba yɛ ko: «I ri hakɛ to, n di se kuma do fɔla i yɛ wa?» Tɛsidi kuntiiba ka a jabi: «I ye Kirɛkikan mɛnna wa? 38 A ye di? Misiranka kanberen mɛn ka mɔɔilu lamurunti waati taminnin, ile le wo ri wa, mɛn kɔnin wara bɛnkaninna mɔɔ waa naanin (4,000) di kiɲɛ fufu kɔndɔ?» 39 Pɔli ka a jabi: «Nde ye Judiya le ri ka bɔ Silisi Tarisi. So ba wo duuren de n di. I jaandi, i ye sɔn n ye kuma doilu fɔ jama yɛ.»

40 Kɛlɛden kuntiiba sɔnda wo ma. Wo rɔ, Pɔli ka i lɔ bon yɛlɛyɛlɛnanilu kan ka tɔɔmasere kɛ a bolo la mɔɔilu ɲana ko a ye a fɛ ka kuma ii yɛ. Ii ka ii sabari tuma mɛn na, Pɔli kumara ii yɛ Heburukan dɔ.