Lucas 19

Isa ni Sace

1 Isa donda Jeriko so kɔndɔ ka a tamintɔ ka wa. 2 Wo ka cɛɛ do tɛrɛn ye, mɛn tɔɔ ko Sace. Ale tɛrɛ ye niisɔnkɔmirala la kuntii le ri. Nanfulu ba tɛrɛ ye a bolo. 3 A lɔɔ tɛrɛ ye a la ka a ɲa la Isa kan ka a lɔn. Kɔni, jama warani tɛrɛ Isa laminin dɔ kojuuya. Wo bolo ma, Sace ma se a yenna, baa a kundiyani tɛrɛ. 4 A ka ibori ka wa jama ɲɛ, wo rɔ, ka yɛlɛ toro ju la ka Isa makɔnɔ, kosa a ri Isa tamintɔla yen, ka a masɔrɔn Isa ka kan ka tamin dinkira wo rɔ. 5 Nba, Isa se mɛn kɛni jiri ju wo ma, a ka a ɲa layɛlɛ san ma ka a fɔ Sace yɛ ko: «Sace, ikaliya, i ye jii. N ye a fɛ i ye n jiya i wara bi.» 6 Sace jiira kaliya rɔ ka bɔ jiri la. A ka Isa ramira sɛwa rɔ ka wa a malɔ fɔɔ a wara. 7 Mɔɔilu ka wo yen tuma mɛn na, ii ka Isa mafɔ ko: «A sɔnni ka wa jiya kojuu kɛla wara.» 8 Sace ka i lɔ Maari ɲana ka a fɔ a yɛ ko: «Maari, bi n di n na nanfulu tala ka fan kelen di bolokolonilu ma. Ka la wo kan, ni a ka a tɛrɛn n da mɔɔ do bolofen mira tɔɲɔli bolo ma, n di a ɲɔɔn naanin lasɛ wo ma.» 9 Isa ka jabili kɛ ko: «Kisi ko ra se a wara bi baa a fanan ye Iburahima dencɛ do le ri. 10 Mɔɔ Dencɛ ra na, mɔɔ tununnilu ɲininna ko ii ri kisi.»