1 Bwebe ko onyakwase,

Gebe konya bashi kpa ayi nu, ni nyya yimu ko kwokwoshi ni. Ami fufun lalo, ase kpiri ni gyo okwokwoshi ni ba yimu kala, 2 Ikweyi koni okwokwoshi yipu kaha kweyi oki ya yo kpaha ko gbogbo-gbogbo.

3 Nyya beshi ko Owuso Ada kpo Oyesu Okristi, Oyi ka Ada, na yaho oneshi, na miyinyinyi kaha, na daho omene; ana wakaka ipu kokwokwoshi kpi imu.

4 Otu hin sha kotata ni nma ayi kala shishini ba yawu ipu kokwokwoshi, byoni Ada ka daha ni. 5 Mani oni nyya ka dawo, onya hin moshi: an yimu ki iyikaha. Omani wono pepe pini nyya ta dawo lalo; ono ni agbo bwikyikyo ni la. 6 Imu ni nyya kela nu mani wa ko yawu ipu ko geyagye do ono ko Owuso. Byoni ala pwo bwikyikyo ni, owotiri shini ala bagye ipu kimu yoya.

7 Awino gyasegya lewewa bose gipu kese, awase ni kyogwu mo Oyesu Okristi wese bya asuse lo ni. Ase lemani wino gyasegya kweyi wo Omonyekwotu ko Okristi. 8 Ala gbera, shini ala ka yoza ni ayoko nu ni tonu lo, shini ala pya abola nu gyogye. 9 Ase ni yagye kpoza fofu ko Okristi otu lo, ke gweji ta, ogbo Owuso lo. Ase ni yagye kpo ozafofu oni ogba Ada kpo Oyi epepa wa. 10 Mani oni, owoni ashe webe kala kweyi obyo ozafofu mani walo, ala ka zuwa ipu kole kala lo; ala ka kadawa mo, <<Omene na yo kpala lo.>> 11 Ase ni mo omene na yo kpawa ogipu koza bibi ni aba ya ni oma.

12 Ngbo oza nwashika ko ka dala, nke ya yimu ko to okpa lo; nyya yimu kowa mala shan kela iyi kpiyi, shini kpiri kaha an shotunehe nwashika.

13 Ayi ko oyene wo moshi mo na to ogbogba.