1 Kpiri kase ni kyogwu mo Oyesu wo Omezaya, owo Oyi ko Owuso; ase ni yimu ka Ada oya yimu ko oyi nu mamani. 2 Owe ni aba gye maha ba yimu ka ayi ko Owuso ni yoma: bwebe ko yimu ko Owuso kpo geyagye do ono nu. 3 Imu ni agbo do Owuso ni sayi maba geyagye do ono nu. Kweyi ono nu lono daha lo, 4 Koni kpiri kase ni wo Oyi ko Owuso, oyese mani gwagye. Kweyi aba rogwa ikweyi kese bwebe ko otuse ka. 5 Anoho ya gege ya yese gwagye? Ase ni kyogwu mo Oyesu wo Oyi ko Owuso ni fufunu.

6 Oyesu Okristi pini wase ni wa kpinyo ko obatisma nu kpo oyi kikwu nu la. Owa kpinyo kin lalo, oke wa kpinyo kpoyi la. Kweyi Omaku abiyinu yolobene mo omani wokwokwoshi, koni Omaku wo kwokwoshi la. 7 Koni aha gbo olobene eta: 8 Omaku, inyo kpo oyi; oza eta mani yolobene oye kponu. 9 Aha kyogwu kpolobene kasuse; olobene ko Owuso ke loshu she, kweyi anu yolobene mani ikweyi ko Oyi nu. 10 Mani oni awase ni kyogwu kpo Oyi ko Owuso ni gbo olobene mani ipu kotu wa; awase ni ke kyogwu kpo Owuso lo, ayoya wino kokame, ikweyi koni akyogwu kpolobene ni Owuso ya ikweyi ko Oyi nu ni lo. 11 Olobene oni yoma: Owuso daha Olayi ko gbogbo, kweyi otu ko olayi mani wo Oyi nu. 12 Ase ni gbo Oyi nu gbo olayi: ase ni gbo oyi ko Owuso lo, ogbo olayi lo.

13 Nyya tenena mani dala shini ala gye mala gbo Olayi ko gbogbo-gbogbo, ala ni kyogwu kpo Oyi ko Owuso ni. 14 Ikpiye kaha loshu obutu ko Owuso, ikweyi koni aha gye mo oya pwaha owoni adoka koza kpiri ni wa kotu nu ni.

15 Oya pwaha ishi kpiri ni ado oka; aha gye mo omani wo kwokwoshi, aki gye mo oya dahoza ni aba do oka ni. 16 Owoni omo oyene oye ya yozalabi niya byo gowe kikwu lo ni, tinarigwu do Owuso, shini ona dase ni Olayi. Nyya kela kawase ni ozalabi wa wako byuwa gikwu lo ni. Ozalabi ni ke ya byase gikwu ni yaba, nyya ka mala tinarigwu do Owuso ikweyi koni lalo. 17 Oza ni shoshi lo kpiri wozalabi la, ozalabi oye ke yaba ni ya byase gikwu lo ni.

18 Agye mo ase ni woyi ko Owuso oya yipu ko yozalabi lo; Oyi ko Owuso ya gbo gbogbo, kweyi Ase Bibi oni ya yo ofo lo.

19 Koni aha gye maha wa ayi ko Owuso, koni ese kpiri ya abo ka Ase Bibi oni ni.

20 Aha gye mo Oyi ko Owuso kwobonu wa wa kweyi odaha ogyogye, shini ahan gyo Owuso kokwokwoshi. Aha bagye dudu kpo Owuso kokwokwoshi oni, kpo Oyi nu Oyesu Okristi. Anu pini wo Owuso ko okwokwoshi kpo Olayi ko gbogbo la.

21 Ayi hin moshi, ala ka sha be eka lo!