1 Ayene hin moshi, ala ka kyogwu kpa awase kpiri mawa agbo Omaku ni lo, Ala muwama kwe Omaku ni agbo ni bwebe ko Owuso la, ikweyi koni awinobane ko okame nwashika bose ebebenya ipu kese. 2 Owe ni ala ba gye kwe owo Omaku ko Owuso ni yoma: ase ni kyogwu mo Oyesu Okristi wese bya asuse ni gbo Omaku ko Owuso la. 3 Ase ni ke kyogwu mo Oyesu wese bya asuse lo ogbo Omaku ko Owuso lo, Omaku ni ogbo ni wa ko Omonyekwotu ko Okristi la; ala pwo mo oyawa, nabani oke kwobonu wese wa.

4 Ayi hin moshi, ala ke wa ko Owuso, ala awobane ko kame yi gwagye, ikweyi koni Omaku ni yo kpa ala ni sho Omaku ni yo kpase kese. 5 Awobane ko kame ba kela ikweyi koza kese mani la, kweyi ese ke ba pwuwa ikweyi koni awa kese mani la ni. 6 Aha ke wa ko Owuso. Ase kpiri ni gyo Owuso ya pwala ka; ase ni gyo Owuso lo ya pwala ka lo. Mani pini aha ba gyo Omaku ko kwokwoshi, kpo Omaku ni wako kame ni la.

7 Ayene hin moshi, ahan yimu ki iyikaha, ikweyi koni imu bwebe ko Owuso la. Ase ni ya yimu kase wo Oyi ko Owuso la kweyi ogyo Owuso. 8 Ase ni ya yimu kase lo, ogyo Owuso lo, ikweyi koni Owuso pini wi imu la. 9 Owuso sayi ki imu nu daha bwebe ko toleho kpo Oyi nu oye kpokponu wipu kese, shini ahan pyo Olayi bwebe nu. 10 Ozani imu we ni oma: wako ni aha yimu ko Owuso lalo, anu ke yimu ka kweyi to Oyi nu oleho ko wa kore ko ozalabi ka. 11 Ayene hin moshi, owoni Owuso yimu kaha mani, aha shu ko yimu ki iyikaha. 12 Ashishe mo Owuso igbo oye kponu walo, owoni aha yimu ki iyikaha, Owuso yayo kpaha dudu, kweyi imu nu gyogya ipu kaha.

13 Aha gye maha bipu nu kweyi anu yipu kaha, ikweyi koni odaha Omaku nu ni. 14 Aha ke ma kweyi ka dase mo Ada to Oyi nu oleho wa ko wa wo Olowoyi kese mani. 15 Ase ni kyogwu mo Oyesu wo Oyi ko Owuso, Owuso yipu nu, kweyi anu yipu ko Owuso.

16 Mani oni aha gye kweyi kyogwu kpi imu ni Owuso gbo daha ni.

Owuso wi imu la, ase ni yo kpimu, oyo kpo Owuso, kweyi Owuso yo kpanu. 17 Mani oni, imu yo kpaha gyogya, shini ikpiye kaha na loshu Eno ko ke Epwo, koni ipu kese mani ahan lema byanu ni. 18 Oshi yaba ipu kimu yoya lo, imu kotata ya noshi yoya enya. Mani oni, imu kotata yipu kase ni ya yoshi ni lo, ikweyi koni oshi ya ye dudu kpo gbogo agye la.

19 Agbi imu ikweyi koni Owuso yimu ka ikyikyo ni. 20 Owoni akamo, aba yimu ko Owuso, kweyi aba tela kase ashishini, awawo kokame. Koni owoni aha ba yimu kase shishini ni aha ba muwa ni lo, aba ya moji ba gege ko yimu ko Owuso ni aba mo lo ni? 21 Ono ni Okristi daha ni yoma: ase ni ya yimu ko Owuso owotiri shini ona yimu ko oyinanu mamani.