1 Atokpa mani dala ikweyi kela ko olayi, ni yaba bwi ikyikyo ni. Aha pwo, kweyi aha ma kpi iyi ka, ee, aha ma kweyi abo ka ki ganu. 2 Ishini olayi mani bose ni, aha mo; mani oni akela ikweyi nu kweyi ka dala ikweyi ko olayi gbogbo ni yebe ka ada kweyi owa yaha gyo. 3 Mamani oza ni ama ki pwo ni pini aka dala la, shini ala gipu kema ka ni agbo kpa Ada kpo Oyi nu Oyesu Okristi. 4 Atokpa mani shini shotunehe ka na gyogya.

5 Anani oshu ni apwo bwebe ko Oyi nu kweyi ka dala ni yoma: Owuso wo oyoyu, kweyi gbe ebe dibu ipu nu lo kpiri-kpiri. 6 Owoni ake kamo aba rema kpanu, kweyi aha ke tayayo bebe dibu, akokame ipu kela ka kpo ozayoya ka. 7 Owoni ake kamo abebe yoyu, byoni anu yipu kebe yoyu ni, mani oni arema kpiyi ka, oyi ko Oyesu, oyinu, ya yaha na sho zalabi kpiri.

8 Owoni akamo aha yo ozalabi lo, aha ba gyiyi ka egya la, kweyi okwokwoshi yipu kotu ka lo. 9 Owoni ake shagbotu ko ozalabi ka do Owuso, oya byo okoyi nu kweyi oya yoza neshi: oya yozalabi ka gbaha kweyi oya yaha na shipu koza ni aya neshi lo ni. 10 Owoni akamo aha yozalabi lo, akokame to Owuso kweyi ela nu yipu kotu ka lo.