1 Ayi hin moshi, nyya tenena mani dala shini ala ka yozalabi lo; owoni ashe kala ke yozalabi, agba ase ni ya ba Ada ikweyi ka ni wo Oyesu Okristi, aseneshi. 2 Okristi abiyinu wo owe ko yozalabi ka gbaha, wo ozalabi ka kin la lo, ke wo ozalabi kese mani kpiri.

3 Owoni ageyagye do ono ko Owuso, oni ya sayi ma agyo oma. 4 Owoni akamo agyo, kweyi ake geyagye do ono nu lo, akokame, okwokwoshi yipu kotu ka lo. 5 Owoni ake gboso ela nu, awase ni yimu ko Owuso yo gyogye ni. Owe ni aba gye mo arema kpo Owuso ni oma: 6 Owoni akamo atayayo ba rema kpo Owuso, ahan bagye byoni Oyesu Okristi ya ni.

7 Ayene hin moshi, ono ni nyya ta dala mani wo pepe la lo; owono nekye-nekye la, oni ala pwo bwikyikyo ni. Ono nekye-nekye mani wo oshu ni ala kwobonu pwo ni. 8 Ni olemani oni, ono ni nyya ta dala mani wo opepe la, ikweyi koni okwokwoshi nu aba ma ipu ko Okristi ki kpa ala. Koni ebe dibu shigbo wa, kweyi oyoyu ko kwokwoshi ya yu.

9 Owoni akamo abipu ko yoyu, ake tela ka ayene ka, atayayo bebe didu kwikyikye ni. 10 Owoni ayimu kase ashini, abipu ko yoyu, mani oni ojije yebe ka ni ya yashe ya yozalabi lo. 11 Owoni ake tela kase ashini, abipu kebe dibu; aba yawu ipu nu kweyi agyebe ni aba gani lo, ikweyi koni ebe dibu yaha pwiyi.

12 Ayi hin moshi, ta dala ikweyi koni Owuso ya yozalabi kala yi gbala bwebe ko Okristi. 13 Nyya to omani dala awada, ikweyi koni ala gyo, anu ni yaba bwikyikyo ni. Nyya ta dala awisongo, ikweyi koni ala yi Ibiri gwagye ni. 14 Ayi hin, nyya ta dala, ikweyi koni ala gya Ada. Nyya ta dala awada, ikweyi koni ala gyo, anu ni yaba bwikyikyo ni. Nyya ta dala awisongo, ikweyi koni ala loshu; ela ko Owuso yipu kala, kweyi ala kwobonu ya Ase Bibi oni gwagye wa.

15 Ala ka yimu kese kwe oza kpiri ni bipu kese ni lo. Owoni oya yimu kese, oya yimu ka Ada lo. 16 Ojoji ni wa kese, ozalabi ni ase ba yimu ni, wo oza ni ase ma kweyi ba showu, kpo ojoji kese ni ase ba gwabotu kpa anu ni, oyoye wa bwebe ka Ada lo; kpiri wa kese mani la. 17 Ese kpo ojoji ni ase ba showu ni ya kweyi; awase ni ke yoza ni Owuso ya yimu ni ba gbo olayi ko gbogbo-gbogbo.

18 Ayi hin moshi, okweyi kese yo pee wa! Aka dala mo omonyekwotu ko Okristi ya wa; kweyi anani nwashika ko monyekwotu ko Okristi kwobonu bose wa, mani oni agye mo okweyi yo pee. 19 Ko kwokwoshi awase mani ba rema kpa aha lo, oza ni ya ni ashaha bita ni oma; owoni abi ba rema kpaha, abi ba bagye kpaha. Ake shaha bita shini ase na gye mo ashishe wa bipu kikpo ka lo.

20 Ala ke adala Omaku ko Owuso ni Okristi dala ni, kweyi kpiri ka gyo kwokwoshi mani. 21 Mani oni ntokpa mani dala, ikweyi koni ala gyo kwokwoshi lo ni lalo; ikweyi koni ke ala gye ni la, shini ala ki gye mo okame yawa bwebe ko kwokwoshi lo.

22 Mani oni anoho ke ya kokame? Awase ni kamo Oyesu wo Omezaya lo ni. Edo kawase mani wo omonyekwotu ko Okristi, atela ka Ada kpo Oyi nu. 23 Awase ni tela ko Oyi, atela ka Ada mamani oma; awase ni kyogwu kpo Oyi, akyogwu kpa Ada mamani oma.

24 Ni olemani oni, ala kpela ni ala pwo bwikyikyo ni shipu ko otu kala. Owoni ala kpela mani shotu kala, ala ba rema kpo Oyi kpa Ada ishi kpiri. 25 Oza ni Okristi abiyinu shokoyi ko daha ni oma olayi ko gbogbo-gbogbo.

26 Nyya tokpa mani dala ikweyi kawase ni ba takirikwu ko gyala egya ni. 27 Ala ke, Okristi dala Omaku ko Owuso wa. Byoni Omaku nu tayayo yipu kotu ala, ala ba tikpo ka ashishe ko fala oza kelo, ikweyi koni Omaku nu ya fala ojoji, kweyi oza ni oya fu ni ke wo kwokwoshi la, wo kame lalo. Mani oni ala geyagye do ozafofu ko Omaku ko Owuso shini ala bipu kema kpo Okristi.

28 Een, ayi hin moshi, ala bipu kema kpanu, shini ishini owa bose ikpiye ka ya loshu kweyi aba nyinya teba kpi iweyi Eno ni lo. 29 Agye mo Okristi wa aseneshi la; ala ki gye mo, ase ni yoza neshi wo oyi ko Owuso la.