1 Oshu mani bwabo ko Osimon Obitrus, oyole kpo oyikoko ko Oyesu Okristi,

Gebe kawase ni adawo otuse neshi kpaha bwebe koza neshi ko Owuso kpino ngmaha Oyesu Okristi ni:

2 Oneshi kpo Omene nayo kpala kpiri bwebe ko ogyogye kala ni ala gyo Owuso kpo Oyesu Adole ka ni.

3 Oshu ko Owuso daha oza kpiri ni aba doka koyagye kese, byoni Owuso ya yimu ni, bwebe kogyogye kase ni yahogwu bwebe kigyashi kpo oneshi nu. 4 Bwebe koni Owuso daha eshi nyakwu ni ki shoshi ni oshokoyi ni, shini bwebe keshi mani ala ka yishi bwebe ko yimu kese lo, kweyi ala wa gbingbo ipu ko olayi ko Owuso. 5 Mani oni, takirikwu shini oyo oneshi mi ikweyi kotuse wo; ipu koneshi wo yo ogyogye manu; 6 ipu ko ogyogye byi kwiyo manu, ipu ko kwiyo byi zotu manu, ipu ko zotu yo oshi ko Owuso manu; 7 ipu ko oshi ko Owuso wo yo otumene kawogboso Okristi manu, ipu ko otumene kawogboso Okristi, yi imu manu. 8 Omani pini wa arinya ni oshu ko gbo ni la, owoni ogbuwa nwashika, aba yo ya yoko neshi ipu kogyogye ka Adole ka Oyesu Okristi. 9 Owoni oke gbuwa lo, oya mebe gebe lenu lo, kweyi omebe lo, onwanyi mo ayo na shozalabi wo kikyikyo.

10 Mani oni, ayene hin, takirikwu kotata shini oyo ogwu kpo oshoshu ni Owuso sho ni na hagye; owoni oya mani, oya sho otuse wo bita lo. 11 Kweyi oya pyo owe ko gipu ko Obula ka Adole kpo Olowoyi ka Oyesu Okristi ni wa ko gbogbo ni.

12 Ni olemani oni, ishi kpiri nyya rawo ela mani, koni okwobonu gyuwa neshi kweyi gbogba loshu ipu kokwokwoshi ni onye ni. 13 Nma mo oshoshi shini na byi rawo kwurutu byoni ntayoyo yipu ka adaba mani. 14 Nggye mo oya gbeji kelo nyya shi ikpiye ni ya gekwu mani bita, byoni Adole ka Oyesu Okristi ka kyaa dami ni. 15 Nyya takirikwu shini ishini wa ga hin oya rela ka awoza mani.

16 Aha gbosi igwu kokame lalo ishini ako oshu kowowa ka Adole Oyesu Okristi ni. Aha ke mo okwu nu kpiyi ka. 17 Aha ma ni Owuso Ada danu abokpa kpi Igyashi ni, ishini oko bwiso ya kamo, <<Omani woyi hin moshi, ni nyya shotunehe kpanu ni!>> 18 Aha abiyika pwoko mani bwi iso, ishini ababa kpanu ikweyi kefu neshi ni. 19 Ebeni agye mela ni awobane ka ni wokwokwoshi. Oya shoshi shini ala zakpaha danu, ikweyi koni olema byi ikwomu ni ya yu ipu kebe dibu gbishini ebenya kweyi oyoyu kinyiwo ko otukpokyi ya yu ipu kotu kala. 20 Oni shojoji ni, nyya yimu shala gye mo ashishe ipu kaha ya gege ko gwikweyi koza ni abane ipu ko Okpa ko Owuso lo. 21 Koni oshu kinobane oyoye wa bwebe kimu kasuse lo, Omaku ko Owuso pini ke ya kpase ogwu ishini aba kyoleho ni wa bwebe ko Owuso ni la.