1 Awino bane kokame bipu kasuse nekye-nekye, mamani awofoza kokame ba bose ipu kala. Aba wa foza kokame ko yase yishi, kweyi aba tawashu ka Adole ni ngmawa ni, bwebe koni aba yiyiwa ngmo ishi oye kponu. 2 Mamani ase nwashika ba bwowe bibi wa; kweyi ase shishini ba wa kela bibi ikweyi ko Owe ko Okwokwoshi ikweyi koza ni aba ya ni. 3 Awofoza kokame mani ba wa pya abola bwebe kokame ni aba ka dala ni, ikweyi koni aba yofa kiyo kese. Ino kepwo wa wiyinushu gbeji wa, kweyi ase ni ya yuwa ngmo ni ya gbola lo! 4 Owuso sha ayoleho ni yozalabi ni bita lo, oke tuwa gipu kola, ebe ni ashuwa ashirika ipu kebe dibu ni, ba gbeyi ke Eno ko ke Epwo. 5 Owuso she ese nekye bita lo, oyi inyo yese kawase ni gyo Owuso lo ni yi re; awase ni ongmawa ni wo Onuhu, ino tono ko okwokwoshi, kpa ashini kase ahapa fufuwa. 6 Owuso yo ogya ko Osodom kpo Ogomora yola, shini ona sayi koza ni ya wa gbodagye kpawase ni gyo Owuso lo ni. 7 Ongmo Olotu, aseneshi ni byotu ikweyi kozalabi kawase ni ba ko ono lo ni. 8 Aseneshi mani yagye kpawa, kweyi kurutu otu nu ya bya kotata ishini oma kwe opwela koza bibi ni aba ya ni. 9 Mani oni Adole gishi ko ngmase neshi shipu kowe kweyi dase bibi owe gbeyi ke Eno ko ke Epwo, 10 otata wawase ni gboso oza bibi ni ikpiye wa ya yimu ni kweyi amo oshu ko Owuso gyiyi lo.

Awofoza kokame mani ba yoshi lo kweyi aba lagbiti, ake ba geyagye da awine kigyashi ni bi iso ni lo; abishi koni, aba suwesa. 11 Ayoleho ni ke loshu ki gboshu sha awofoza kokame mani kwuwepwo kpe esa sosa obutu ka Adole lo. 12 Awase mani ke ba kela karigbetu ikweyi koza ni agyikweyi nu lo ni, ale bye ebe ka akyashi ni amuwa ko kwuwa ngmo ni; aba sase eyi kpe esa sosa ikweyi koza ni agyikweyi nu lo ni. Aba yuwa ngmo byebe ka akyashi. 13 Aba suwore kowe ni adase ni kpowe moma. Ebe wa onye ko moma wako yoza ni ikpiye wa ya yimu ni eno kyakyakya; awoza ki iweyi kpo owuru gbogbo ishini awa roza kpala, ipu kishi kpiri aba kowe ke egya gyogya wa! 14 Oza ni yipu kotu wa ni weba boba kin; aba yipu kpo ozalabi lo. Aba sase ni hagye loshu lo ni abo ko gbo gipu keda. Akwobonu fiyiwa ko yimu kiyiwa kin. Owuso kwobonu yuwo okwunu wa! 15 Ashowe neshi bita kweyi bwowe bibi; azowe ko Obalam oyi ko Obiyo, ni ya yimu ka abola koza bibi ni 16 Owuso gba apwo koza bibi nu. Odagyi nu ni shu ko kela kpoko kasuse lo ni kela kweyi wobi ko onyoza ni inobane mani ya ya ni.

17 Awase mani wokpa ni gbinyo lo ni, bya akpa ni owu ya to ni; Owuso shebe bita dawa ipu kebe dibu tiri. 18 Aba kela ni gbikweyi lo ni ko zikweyi iso, aba yoko kpikpiye wa ko gyawase ni ba kwotu ko ngmabo shozalabi ni egya bwebe koza bibi kimu kikpiye. 19 Aba shokoyi ko ngmawa she eshe awa abiyiwa ke wawoshe ka arinya labi-oza noya gege ko shibita lo owo oshe nu la. 20 Owoni ase bose shipu kese mani ni ya yishi ni bwebe kogyogye ka Adole kpo Olowoyi ka Oyesu Okristi, kweyi oki kwikye gipu ko yo ozalabi, okweyi wa ya labi sha kikyikyo. 21 Obi ya shoshi she dawa owoni agyo owe ko oza neshi lo, sho olamu ni agye kweyi pyitikpi tono neshi ni adawa ni. 22 Ozani tawa ni sayi mo asuse ni asa ni wo kwokwoshi: <<Iwo kwikye ga roza ni oyi gba ni>> kpo <<Aruma ni agwiye ni kwikye ga ja ipu ko ototo.>>