1 Laakiin toon toona uginꞌook hooy dꞌiyaa: eembꞌi yꞌaakhareeb beentooy gwirha iikti iyadna. 2 Uudehay igarooyeehna areeyeen ikatiina, imhallaga areeyeena, kibiriib ikatiina, tatageegeena, neeweena, ifarooyeehna kiisinaakirna, afreeyeena, aree takweet eetniiwna. 3 Kaꞌareeyaana, kaꞌafooyaana, italisna, igarooyeehna kakaleewiyaana, amaagwaraayeena, tooshbu eeribna, 4 eetilna, ashshigeena, kibir eettiibna, Ukwaasanaay ureeriika tuduniyaatiit nafirnay areeyeenkaab ikatiin. 5 Baraah udiini dehay tꞌiiteeb massalameen. Laakiin udiini akrir ittawiin. Been oodehay hooy sifana.

6 Gwadi bareesooh oodehayi gawa shuumeetiit teemꞌa wꞌiimaaniib nꞌakwt yꞌabikna. Aree bataah maagt atabta, kastooh tꞌamaag niya ibariin. 7 Bataah diimaab allamameena laakiin door han oosdik kasooyaan. 8 Yanniswa Yambireeswa Muusaab imꞌakaarna, aan baraah han oosdik imooriibna. Uudehay igirmaayaahna daayiib biishagaamayneeb wꞌiimaan eeribna. 9 Laakiin baraah kiisigiina, aree uudehay kassaah baraah afrii ikatiineet toona rhi iyadna. Beet tuuna Yanniswa Yambireeswa bak dehaay tiki.

10 Baruuk laakiin aniib wꞌallamti kassooh tikteena. Aniib wꞌadabwa, ani tuduniyaatiib harriiweet toonaawwa tikteena. Aniib wꞌiimaanwa, utarmuumaawwa, ooreerwa, oosbirwa kassooh baruuk tikteena. 11 Amaag waraabwa, lhanaytwa, kastaah taan taana Antaakiyaaywa, Ikoonyoomeewwa, Liistaraaywa, anii dehaay ikeeneet toona tikteena. Wꞌamaagwara ani amtarraam. Masi aree Wꞌankwana kasteeh teen teena hooy ishidhhanheeb. 12 Sidiku, Umasiih Yasuuꞌiib umidhhani kwiraay harriiwka amaag itweeri. 13 Laakiin yꞌamag daawwa, dangar infiishaawwa tumaagtii amaagkaat maagt beeti sakeena, eetilna aree itootiilna. 14 Laakiin baruuk toona allamamaab tikatiyeet soorarima, aree batooh daayiib haay aamanaa. Baruuk yꞌallamanaayaak aayga ikatiineeb tikteena. 15 Baruuk dis oor tiiktiyihoob shꞌaa! Baruuk Eektab Imugaddasa tikana. Aan aaktab barook umidhhan istoobiint tifagarandi yhiin hook, umidhhan Umasiih Yasuuꞌiib wꞌaamantii ikatiib yhiin hook. 16 Uuktaab kassuuh Ukwaasanaay Ishuukee attiyeewiyaab, wꞌallamtii dehaay anfꞌiini, danniin, eetkwiikw, aree tooshbu islamiid. 17 Aflaay uutak Ukwaasanaay dehaay shagaamiiniib tudaayiinaayti shagaay dehaay daayiib gadhꞌamaab ikati.