1 Ukwaasanaawwa Umasiih Yasuuꞌaawwa haayee, yꞌayaabwa idhhaniibwa yhikim indiib, baruuh laweetiit hadꞌaab ikatiyeet toona sooyani hook. 2 Tudiigwat oodehay kasseeh sikatima, tehibiiwwa umhagaayiiwwa oodehay shiishbooba, dinina, sꞌakira, winneet tarmuumaab dꞌiya aree daayiib sooyaa. 3 Damaan yꞌiini uudehay udaayi madehaba kiisinaakirna. Laakiin baraah aakna yhariwneet teena iitram iyadna, gwida kooja aree geebooh dibiltiit yꞌangwil yayamseen bhali dehaay hadiideen. 4 Baraah oosdik biimaasiiwnee dehaay yꞌangwil dhadhibseena, whararfirdi mitaal isnaakiirna. 5 Laakiin baruuk kassooh oodoor ishuukeek kaleewa, igwirha amtarraama, aree Usakana Udaayiinaay ibhaliiti shaga dꞌiyaa. Baruuk Ukwaasanaay shagaamana tikatiyi sabbii kastooh tuwaajibtook tikwikwa.

6 Toosꞌa ani karaamaat hooy iikti andiyeet shaawti yꞌaatu, ani tuduniyaatii hooy giigi andiyeeb uudoor yꞌaabi. 7 Ani oofinaay daayiib finaayan, aree wꞌamgaruuba faaysan, wꞌiimaan han kaleewan. 8 Oontꞌa oodehay eeshbooni taaj umikhsaniib aneeb hangiit. Wꞌankwana Ugaadi uushboob beet tooyin ootaaj iyaawheeb indi. Aree aneeb oobhaat kaaki, laakiin bariiyooh ilawtii dehaay hayꞌaab han kassaah ootaaj imaar iyadna.

9 Anii dehaay willa eetniyeet toona sehariwa. 10 Deemaas toon tuduniya areeyiini akay aneeb yꞌish idꞌiiteheeb Tasaaluuniikaab beeti idif. Kireeskiis aree Galaatiyaab beeti idif, Tiituus han Dalmaatiyaab beeti idif. 11 Luuga uubhaat geebu eefi. Maarkoos hariwaat geebook haay mꞌaa. Baruuh aneeb ishagaay eeshtiimheeb akay haay mꞌaa. 12 Tiikiikoos aree Afasoos beeti astoob. 13 Baruuk eetniyihoob, Taroowaaseeb Kaarboosi geeb asheet tusideeriyaay tꞌiiteet haay mꞌaa. Aniib imiksasaawwa eektabwa han haay mꞌaa. Eektab whakooy daamaab eekna aree haay mꞌaa.

14 Iskandar ubalooykwootana gwidaat maagnaay iweerheeb. Beet tumaagnaay barooh Wꞌankwana hooy itkwis indi. 15 Baruuk han barooh hooy digwagwa, baruuh tudiigwattoon winneet irib.

16 Ani whakamamti whankaaneenaay ugarooyu habuuyi jillaay tumhakamaati suurii angadihoob, gaal han geebu gadaab kiiki. Laakiin kassaah yꞌishni idꞌiinheeb. Ukwaasana toon toona bareeyooh kehii biidꞌiyeet toona minniimani. 17 Laakiin Wꞌankwana anii geeb ingadaayt akrir yhiiheeb. Shaawti ani toon tudiigwat kastooh Ijintiili eemsiiwni jillaay sooyan. Aree ani tooyat istoobiib whukwimii adhhan. 18 Wꞌankwana kastooh tumaagtii ishidhhinheeb indi, tibreeteeb teefeet tehadꞌaayeetooh aree asgaa istuubheeb indi. Umatuun diimaab bariiyooh baꞌiikti. Aamiin.

19 Biriskillaawwa Akiilaawwa tishboonay salaama. Oonisifroosi dhiwa han tishboonay salaama. 20 Araastuus Koorinteeneeb isꞌa, Turoofiimuus aree lhaab akay Miileetooseeb ash adꞌi. 21 Tehibiiti dabaay tooy daatniyeet toona hariwaa. Iyuubiluus tishboonay salaamiini hook, Buudeen han tishboonay salaamiini hook, Liinoos tishboonay salaamiini hook, Kilaawdiyaawwa kassaah isanaawwa han tishboonay salaameen hook.

22 Wꞌankwana bariiyeek ishuuki geeb daayi indi. Tinꞌima geebook baꞌiiktiin.