1 Baawloos, Ukwaasanaay shagaamanaawwa Yasuuꞌa Umasiihi ulinguuma ikatiibwa kitbaabi.

Ukwaasana ooknaay oodehay gwidaka iimaan dꞌiitiit, oodiini sidik afhameeni jillaay ani bareeh asꞌakiir. 2 Malya Ukwaasana shꞌiika waadiyaayaab ikatiyeeb umidhhan udaayimi sꞌaya baraah imaar iyadna. Aree Ukwaasana door han gwisir kahadiidiya. 3 Aflaay udoorooh uwaasamaanaay, Ukwaasana Wꞌishidhhiinuun toon tudiigwat yhii hoon. Aree baruuh diyaab ikatiyeeb ibhali sooyaniyeet toona sooyaheeb.

4 Tiituus, wꞌiimaaniyoon sabbii baruuk wꞌooru tꞌiiteeb tikatiya. Ukwaasana Baabuun Umasiih Yasuuꞌa Wꞌishidhhiin nꞌimaatwa mꞌasigwa baꞌiyaaw hook.

5 Ani barook Kireeteeb ash hook, faayamaab baakaay ushaga tankwiikwi jillaay, kasteeh timadiinaateet kaniisaateeb aree suurkinaab danꞌiyi jillaay beentooy ash hook. Aniib ibhali shꞌaa! 6 Uudehay ibakii daayi faal ibariin ikatiina, aree idꞌareeb sidkiib ikatiin. Yꞌaraahna ibakii Wꞌankwanaay aamanana ikatiina, amag faaleebwa baasinaakiirwa ibakii biiꞌakeen. 7 Tukaniisaati suurkina Ukwaasanaay ushaga daayeenayt, daayi faaleeb ikatiineet toonaati. Atoorbiib biiꞌakaayna, dawil shuukeeb biiꞌakaayna, askiranaab biiꞌakaayna, finaasameen biiꞌakaayna, tari ushagaay toolanaab biiꞌakaayna. 8 Baraah ibakii oodehay igirbaab araweesameena, aree tudaayiinaayti shagaay afirheen ikatiin. Masi aree igarooyeeh kaleeweenwa, takwakwwa, nhaswa ikatiineet toonaati. 9 Usidkiit diigwat baraah allamamaab ikatiineet ibakii daayiib yꞌabikneet toonaati. Aflaay utꞌaliimuuhna udaayi oodehay eeraw eeshtiim, aree tudiigwat eerib oodehay kasseeh itakwikwna.

10 Gwida amgwashuushaay dehaay eefeena, gwida bhaliyeeba aree tallasa. Baliin yꞌitkwashiib bak sakeen. 11 Laakiin bareeh ibakii dinsiteeneet toonaati. Baraah imhallagaayi harꞌii sakeena, aree indhiwa kasseeh gadabseena aree ibakii biidꞌiineet toona bareeh allameen. 12 Bareeh nabiyuuhna gaal door gaal bak diyaabu, "Kireeteeb uudehay diimaab gwisir hadiideen. Baraah haamaaba, hasraaba umalaali reew tꞌiiteeba." diyaabi. 13 Tuun tuuna sidkiit badeha tikati. Shaawti bareeh akraab dininna, aflaay baraah wꞌiimaaniib yꞌikir iyadna. 14 Iyahuudi mitaalwa udehayiit waseewwa, hararfiridayt baasinaakirna. Een bareeh uudehay usidkiit sinaakrooyt baahariiw dꞌiyaaba. 15 Ootak uginꞌuuh nhas ikatiyeeb naatka geeb nhas tikati. Laakiin wꞌiimaan baabariib yiwaashi ginꞌiib ikatiib, naat han nhas dehaay kitti. Been ootaki ginꞌaawwa ugirmaawwa dayꞌameen. 16 Baliin uudehay Ukwaasana ikteeniineet toona massalameena, laakiin ushanhuuhna barooh sidik biikaanneet toona rhisiini.