1 Tiituus, baruuk ibakii oosdik oobhaat allamtiniyeet toonaati. 2 Eenda yꞌeegrima igarooyeehna kaleeweeneet toona sooyaa, sidkiiwwa, dhhani ginꞌiiwwa ikatiineet toonaati. Wꞌiimaanwa, ooreerwa, utarmuumaawwa diimaab idꞌaneet toonaati.

3 Teemꞌat tꞌeegrima han Ukwaasana areeyeen udehayiit sakeeneet toon sooyaa. Bataah ibakii yaandiintiib biidhaabayna, aree whaayt kishiya biiꞌakaayna. Bataah ibakii tudaayiinaay allameeneet toonaati. 4 Aflaay taamꞌat tidadis daayiit hiyootwa deetwa iikti iyadna. 5 Taamꞌat tidadis kastaah ibakii dhhani ginꞌiitwa nhast niyaatiitwa ikatiineet toonaati. Bataah daayiib ugawiib shagaameent ikatiin, eendeehna naati suuriika daaseent ikatiin. Malya Ukwaasanaay tudiigwattiib gaat han amaagna iyaad kitdi.

6 Yꞌar yhankwila naatiika igarooyeehna kaleeweeneet toona sooyaa. 7 Baruuk uknaayuuk aree oodehay irawee dehaay daayi misaal akaa. Aree allamtiniyihoob, nhaswa sidkiibwa tikatiyeet toonaati. 8 Nhas bhali diyaa, gaal han hook hadiidi kiidi. Toon dꞌiyaa, wꞌashooyuuk naat kehoon indiyeet toona winneet iisikwꞌa indi.

9 Ikishiya aree naatiibka yꞌankwanaayeehna diimaab sinaakirtiit afirhiseeneet toona sooyaa. Baraah yꞌankwanaayeehna dehaay bhaliib biidigiineet toonaati. 10 Tari bareeh biigwihaarna. Baraah ibakii daayiib nhaswa aamanameenwa ikatiin. Malya baraah Ukwaasana Wꞌishidhhiiniib allamamaat toona kassaah hamooysi iyadna.

11 Ukwaasanaayt tinꞌima umidhhan haay yꞌeent kasseeh oodehayii dehaay lawiyaan. 12 Hinin tumaagti salalaayeen ishti dꞌiit, aree tuduniyaatiit niyaateen ishti dꞌiit, toon tuduniyaatiib sidki kwiraaywa daayi midhhanwa nimeereet toona baruuh allamiya hoon. 13 Ukwaasanaayoon Oowin Wꞌishidhhiin Yasuuꞌaab Umasiih agarti yꞌiiniyihoob, hinin sꞌayaab atab akay nhagit. 14 Baruuh hinin toomaag kastiisooh ishidhhiini jillaaywa, iginꞌaayeen isinhiisi jillaaywa ugarooyooh nuuniya. Hinin barooh ooknaay dehay nikatiyeet toona harriiw, tudaayiinaay nidꞌeet toona winneet harriiw.

15 Teen teena allamaa! Tehadꞌaayeetook haay anfꞌamaat oodehay haay sꞌakira aree daanina. Aflaay gaal han abaabiiniyook baakwaasa.