1 Baawlooswa, Siilaaswa, Tiimootiiwwa kitbaab ikatiineeb ujawaab, Tasaaluuniikaay teefeet tukaniisaati dehay Ukwaasana Baaboonwa Wꞌankwanaayoon Yasuuꞌaab Umasiihiiwwa ikatiin ookiik eebi:

2 Ukwaasana Baabuunwa Wꞌankwana Yasuuꞌaab Umasiihiit tinꞌimaawwa umꞌasigwa geebookna baꞌiiktiin.

3 Yaa yꞌarawaan, hinin Ukwaasana nhamdee dehaay diimaab gwida sabab nibari. Wꞌiimaanuukna Ukwaasanaay tibariineebwa, taktakeeb ureeruuknaawwa kassooh oodoor inwiin. 4 Oon usabbii aree, hinin iknaayaan kasteeh Ukwaasanaayt tikaniisaateeb bareekna haay neefish hookna. Baraakna gwida amaag waraawwa lhamtiiwwa hookna daayaaneek han, wꞌiimaaniyookna kak tarmuumaab tibariineet toona bareeh soonay.

5 Kastuuh tuun tuuna aree Ukwaasana adlii yhankiimeet toona rhistini. Bariitooh tehadꞌaayeeti jillaay lhamteenayt, batooh titꞌadhiidhni jillaay aree baruuh eetkwiikw hookna. 6 Ukwaasana aadilu: Bareekna lhaseen oodehay jasaayi indi. 7 Laakiin bareekna igwirhaayee fiinsi hookna indi. Hinin han toon toona tookna dehoon danꞌi. Wꞌankwana Yasuuꞌa yꞌakra malakeesooh tibreetee yꞌiiniyihoob, 8 balooltiniit nꞌeetii yꞌeen. Wꞌankwanaayuun Yasuuꞌa oodehay Ukwaasana baakanwa tudiigwattooh sinaakraab baakaywa kasseeh jasaayi indi. 9 Bareeh ijasaayuuhna kwidh daayim iikti indi. Baraah Wꞌankwanaayoonwa umatuuniyooh yꞌakriri suuriisiiwwa isaag iyadna. 10 Beet tooyin baruuh yꞌiiniyeet, kasseeh udehayiisooh matuun imaar indi, aree kasseeh yꞌaamananaayee hamooyseeb imaar indi. Baraak han hinin soonaneet tudiigwat aamantaanayt een bareeyooh geeb daayi tiyadna.

11 Oon usabbii hinin diimaab dehookna siileelnay. Ukwaasana bareek dehaay waliikaab ikatiyeeb umidhhaniit takwi tidꞌaneet toona Ukwaasanaay nhariw. Tudaayiinaaytiit niyaatookna kastooh aree baruuh timmiima akrireesooh wꞌiimaanookna timmiisiiniyeet toona hinin siileelnay. 12 Malya, aflaay Wꞌankwanaayuun Yasuuꞌiib uusim hookna inwiin ikati, aree baraakna bariiyooh eewin tikatiina, Ukwaasanaayoonwa Wꞌankwanaayiiteen tinꞌimaateet tehayꞌaatii ikatiyeet toonaatii dehaay siileelnay.