1 Wꞌankwanaayuun Yasuuꞌa Umasiih itꞌagiirihoob, hinin dibaltiit barooh nꞌashish. Aflaay ani bareekna yꞌaraween raatani, 2 uudehay Wꞌankwana suur akay yꞌaabu iyadneek han, baraak willa baahaseena! Tari baadiinanooyaana! Baraah toon toona Eeshuuk Imugaddasa iknaayee nimaasiw iyad han ikatiin, tari weer idi hoon iyadna, tari aree hineeb ijawabeeb gaalnaay agriini han iyadna. 3 Laakiin baraakna baaꞌatootaalna! Uudehay Ukwaasanaay kehii ribshaayt iikwasi iyadna. Malya Wꞌankwana baaꞌagaar akay, tumaagtikina Uungaal lawiini, aree baruuh toonꞌi daami indi. 4 Baruuh naatka imooriib, tageegaana tari ibaadaateena imooriibka, ugarooyooh een kasseeyooh mhakwal daasi indi. Malya aree Ukwaasanaay udiini gawiib sꞌatiit, Ukwaasana massalami indi.

5 Ani masi geebookna iifiyihoob toon toona sooyan hookna, kashꞌitaana han? 6 Oon tumaagtikina naan abkaat tikatiyeeb baraakna suur akay tikteenna. Baruuh udooruuh yꞌiiniyeeb ookiik hangiit. 7 Bariiyaah yꞌakrir ikwabas suur akay shagaameena, laakiin gaal barooh harꞌa anbiik eefi. Been uuraaw usalalii hantaayiiniyeeb ookiik tumaagtikina lawi kiidi. 8 Malya baruuh lawi indi. Laakiin Wꞌankwana Yasuuꞌa bariiyooh hamshuukiit barooh idaar indi. Baruuh shaawti Wꞌankwanaay umatuuniit timꞌageertii winneet kwidhi indi. 9 Tumaagtikina lawiiniyihoob, uubliis kasteeh timꞌuujisaawwa, tꞌajaayibwa, tꞌalaamaawwa ikwasiyeet toona massalamiini. 10 Uudehay ikwidha bariiyooh wꞌamaag shagaay itootiilna. Baraah midhhan imeer iiktiina, laakiin usidki reer iirib iyadna aree agbili kiidiin. 11 Aflaay Ukwaasana baraah itootiilneet toona akkadeetiit baraah eegwsir aamaneen ikatiin. 12 Baraah oosdik wꞌaamanti iribniit toomaag shagaamiyaani sabbii, kassaah jasaami iyadna.

13 Yaa yꞌarawaan, Wꞌankwana areeyiini hookna, tuun tuuna aree haay tikatiyeeb usabab, hinin diimaab bareeyookna jillaay Ukwaasana nhamid. Baraak hankaab iidhhan tiyadneet toonaatii dehaay Ukwaasana waasiya hookna. Bariiyaah Aashuuk bareek mugaddasaab ikwaasna, aree baraak oosdik aamantaana. 14 Hinin bhaliinaneeb Usakana Udaayiinaay geebii Ukwaasana waliikiya hookna. Baraakna Wꞌankwanaayoon Yasuuꞌaab Umasiihiib umatuuniib wꞌadhdhookna timeerni jillaay baruuh waliikiya hookna. 15 Aflaay yꞌarawaan, daayiib akirnaat oosdik hinin allamnaneeb daayiib abiknaa. Oosdik hinin bhaliinaneebwa ijawabeen iniktibeebwa kasseeh daayiib abiknaa.

16 Ukwaasanaayuun Ubaaba areeyiini hoon. Baruuh daayiibu, daayimaat nꞌimaatwa akra sꞌayaawwa yhii hoon. Wꞌankwanaayuun Yasuuꞌa Umasiih uuknaawwa Ukwaasana Baabuunwa, 17 bareekna isꞌakiireet toonaawwa, aree diimaab daayiinaayt dꞌiitiit daayi bhali tiyadneet toonaati jillaaywa hinin siileelnay.