1 Usuurkinaay, wꞌaraawu whayis Gaayoos, usidkiib areeyaneeb ookiik eebi uun ujawaab.

2 Wꞌaraawu whayis, baruuk timmiima dalha tibariyeet toonaawwa naatka geebook daayiib tishboobiyeet toonaatii dehaaywa siileelani. Baruuk ishuukeeb daayiib tehayeet toona han akteen. 3 Sanaayaan gali eeyaaniit bariiyook wꞌiimaan usidkiib tibariyeeb sooyaanihoob winneet afirhan. Baruuk usidkiib kak soorarimti saktiniyeeb baraah sooyaana. 4 Aniib yꞌar usidkiib sakeena diyee amaasiwihoob, afirhaneet tifirha door han afirhaab kaaki.

5 Wꞌaraawuunay, baruuk isanaayeen dehaay saktiniyeet toonaatiib sidkiib tikatiya. Baraah girbaab ikatiineek han, 6 baraah tudaayiinaaytook tooy tukaniisaatiib hadiidiyaan. Baruuk daayiib tiweera, bareeh tꞌiibaabtiyoohna yhariwneet toona tehiit giigsita, aree beet tuuna Ukwaasana afirhistini. 7 Baraah Wꞌankwanaay ishagaamti jillaay iibaabeena, oodehay yꞌaamanaab baakaynee shamaamt naat han kaꞌagbiliyaan. 8 Shaawti een eenda hinin ibakii nitehadiireet toonaatu, aflaay usidki jillaay hiddaab shagaameen nikati.

9 Ani tukaniisi ookiik aktib, laakiin Diyootrafas usuurkinaamti areeyiiniib, ani andiyeet toona isniikar kiidi. 10 Aflaay ani yꞌaniyeek, baruuh danꞌiyeet toona uginꞌu hooy iidꞌi andi. Baruuh hineeb hadiidiiniyeet tuyaandiinwa toomaagwa uginꞌu hooy iidꞌi andi. Baruuh beet tuuna masi mhaatooh kitti akay, isanaayeen wꞌashuush inriib. Baruuh masi bareeh wꞌashuush yhariw baliib han yhanbi, aree bareeh tukaniisaatii giigsiini.

11 Wꞌaraawuunay, toomaag sakeen oodehay misaal baakwaasa, laakiin tudaayiinaay sakeen misaal kwaasa. Tudaayiinaay shagaamiiniibka Ukwaasanaay ikati, aree tumaagnaay shagaamiiniibka Ukwaasana rhaab kiiki. 12 Kassaah uudehay Dimeetriyoosiib daayiinaayt hadiideen. Uusdik uukna han bariiyooh hadiidiini. Hinin han bariiyooh daayiinaayt hadiidnay, hineet tibadeha sidik ikatiineet toona baraak tikteenna.

13 Ani barook beeti akantiibeet gwidaana teefi, laakiin ani galamwa waragtiiwwa akantiibeet toona kaahariw. 14 Ani willa rhitiyook aharriiw, aree fiir fiiree hadiidsamni niyad. 15 Umꞌasig geebook badaayi. Yꞌaraw tooy eefeen salaameen hook. Yꞌaraw beentooy eefeen aree gaal gaalnaay salaama.