1 Yahuudaab, Yasuuꞌa Umasiihiib ushagaamanaawwa, Yaaguubiib oosanwa ikatiinaay, baliib Ukwaasana waliikaab ikatiyeeb, Ukwaasana Ubaabaay reeriiwwa Yasuuꞌa Umasiihi sꞌasgaab ikatiyeeb ookiik eebi ujawaab. 2 Tinꞌimaawwa, umꞌasigwa, gwida reerwa Ukwaasana baꞌiyaaw hookna.

3 Yꞌarawaan, hinin kassaan hiddaab miraab nikatiyeeb umidhhaniib dehookna iiktibee dehaay winneet ahariw. Laakiin Ukwaasana kassooh gaal door udehayooh hiiyyaab ikatiyeeb wꞌiimaan ibakii tehanbiineet toona ani dehookna kitibtiit araatanyeet toonaatu. 4 Gwadi Ukwaasana anu ikweer dehay geeboon kwabas aree "Hinin astehalnayeet tunaati mhakwal Ukwaasana imshabiib hoon, aflaay daayiib maagtiib yaknayeet toonaatu." iyadna. Baraah masi hinin Yasuuꞌa Umasiih Wꞌankwana oongaalnaayt aamannayeet toona han ittawiin. Laakiin Ukwaasana anu ikweer uudehay Wꞌankwanaayoonwa Whadꞌaayoonwa ittawiineet toona aaktab shꞌiika akraab sooyaaba. 5 Toon toona kastooh tikteeniineek han, Wꞌankwana oodehay Wꞌisraaꞌiileeb door gaal Masree kak ishidhhaneet toona bareekna shꞌastiib aharriiw. Laakiin malya baliib barooh aamanaab baakaay oodehay kwidhsiya. 6 Imalak ishagaayoosna dꞌiyaab baakaaywa, imhiinayeesna yꞌishni idꞌiiniit toona masi baraakna tikteenna. Ukwaasana bareeh akraat shinshilaatee yhaakwir, oontꞌa aree whukwimiit tuuyin eetniyeeb ookiik thibnama deelaayeeb daasaabu. 7 Timadiina Sadoomwa Gamooraawwa oodar iifiint timadiinaawwa han naan dehaay tikayeeb ibakii bareek daayiib soonayeet toonaatu. Udehayuuhna maagtiib yakiyaaniit, jikuuni haraam kassooh shagaamiyaan. Malya Ukwaasana bareeh misaal ikwaasiit, toonꞌi tudaayimtii bareeh jasaaya. 8 Oodehay ani hooy hadiidan eefiyeeb, baliin yhawsooyaan, igarooyoosna ookna kwidhsiyaan tꞌiiti sakti sakeen. Baraah kastooh tehadꞌaayi iribniit imalak neewiyaan. 9 Miikaaꞌiil umalaktaayi uuwin han ashꞌariyaayt oobliis neewaab kiiki. Baraah mhallaas aree Muusaay ugarooy hadiidsamiyaan. Miikaaꞌiil "Wꞌankwana jasaayi hook indi." idi. 10 Laakiin uun uudehay yꞌakrir naat hooy biikaanneeb neeween. Baraah ooreew tisoossaari wꞌagiyaay kwidheen tꞌiiteeb ikatiin. 11 Oontꞌa baraah gwirhaayeeb eefeen. Baraah Gaabiiliib oomsaal iramna, mhallagaayi jillaay aree igarooyoosna nuuniyaaniit Balꞌaamiit toomaag idꞌiin. Baraah Gooraay oofinaayt finaayaaniit bariitooh aree kwidhiyaan. 12 Uun uudehay dhikwa girmaay ikatiin, sikwꞌiiwwa akishwa shagaay baraakna hiddaab tamteeneet tumꞌari aree eemigna. Baraah ibꞌaluuk ubaraam nanfiyeeb laakiin door han baabireesay tꞌiiteeb ikatiin. Baraah yhindi teerat baabariin ugadam balamiit iyaayiin, firaay baafariin tꞌiiteeb ikatiin. 13 Bareeh ishagaayuuhna isiisakwꞌi, ubhari moojiit hibibt tꞌiiteeba. Baraah hawriikeen hayikw yaaytiit diimaab toonꞌeeti thibnami deelaay dhibeen tꞌiiteeba. 14 Hanookh, Aadami harꞌii ootak wꞌasarama ikati, oon udehayiib isridihoob aree "Shibibna! Wꞌankwana gwida alfa mugaddasa malakee yꞌaa indi. 15 Kassooh oodehay aree hukwimi indi. Oodehay Ukwaasana anu ikweer aree kastooh tumaagti shagaayoohna dehaay jasaayi indi. Wꞌankwana oon oodehay Ukwaasana anu ikweer tumaagtikina, kastooh toona baraah Wꞌankwanaay sooyaab ikatiineet dehaay jasaayi indi." idi. 16 Uun uudehay diimaab ashkiimeen, oodehay ooraaw aree imooyiin, amaagt niyaatoosna aree eetriimna. Baraah aakna eefishna, baraah yhariwneet toona imeerni jillaay aree oodehay ooraaw aree hakwseen.

17 Yꞌarawaan, Wꞌankwanaayoon Yasuuꞌa Umasiihiib ilinguuma hiyaayeekna iiktiineet tiwasi shꞌaana. 18 Baraah, tuusꞌa danwiilihoob, uudehay wꞌakishwa Ukwaasana anu ikweerwa, Ukwaasanaay kasheen. 19 Oontꞌa aree uun uudehay taktaki kehii bareek eeshwawiineet toona shagaameen. Baraah oon umidhhan oobhaat eekwinna, Eeshuuk Imugaddasa aree kiibariin. 20 Yꞌarawaan, wꞌiimaanookna utageega asaas kehii dꞌirna. Aashuuk Imugaddasa tusileeltiib eeshtiimna hookna. 21 Igarooyookna aree Ukwaasana areesaana, baraakna Wꞌankwanaayoon Yasuuꞌaab Umasiihiit tirhamaati miyaaw umidhhan udaayim iniiw tehagitna. 22 Baliib eetehak ibariin aree rhamaat dehaay dꞌiina. 23 Oodehay ooraaw aree tunꞌeetiit sikwna firꞌanaat shidhhanna. Dehay weer aree rhamaat mirkwaay hooy amshawawiyaab ikatiyeeb rhisaana. Laakiin baliib maagti shagaay yhalakaayeehna yiwaashiisaab ribna.

24 Bareekna oodhib yhabiinaay, umatuuniyooh suurii bareekna gwihaab aniwwa firhaatwa haay yꞌiiniib, 25 Ukwaasana Oongaal Wꞌishidhhiinoon, Wꞌankwanaayoon Yasuuꞌaab Umasiihii ikwasiib, umatuunwa, whadꞌaamtiiwwa, umꞌalaayiiwwa, hadꞌaayeetwa kasseeh idaman suurwa oontꞌaawwa diimaab bariiyeeh baꞌiiktiin. Aamiin.