36 "फेर सीरिया का उत्तरी राजा अपणी इच्छा कै मुताबिक काम करैगा, अर अपणे-आपनै सारे देवत्यां तै ऊँच्चा अर बड़ा ठहरावैगा; बलके सारे देवत्यां के परमेसवर के बिरुध्द भी अनोखी बात कहवैगा। अर जिब ताहीं परमेसवर का छो ना हो जावै तब ताहीं उस राजा का काम सफल होन्दा रहवैगा; क्यूँके जो कुछ पक्का करकै ठाण्या होया सै वो जरूरी ए पूरा होण आळा सै। 37 वो अपणे पूर्वजां के देवताओं की चिन्ता ना करैगा, ना जनानियाँ के प्यार की कुछ चिन्ता करैगा अर ना किसे देवता की; क्यूँके वो अपणे आप नै ए सारया के उप्पर बड़ा ठहरावैगा। 38 वो अपणे राजपद पै स्थिर रहकै मजबूत गढां ए के देवता का सम्मान करैगा, एक इसे देवता का जिसनै उसके बुजुर्ग भी ना जाणै थे, वो सोन्ना, चाँदी, मणि अर मनभावणी चीज चढ़ाकै उसका सम्मान करैगा। 39 उस पराए देवता के सहारै वो घणे मजबूत गढां तै लड़ैगा, अर जो कोए उस ताहीं मान्नै उसनै वो बड़ा मान देवैगा। इसे माणसां नै वो घणखरयां कै उप्पर प्रभुता देवैगा, अर अपणे फायदा कै खात्तर अपणे देश की धरती ताहीं बाँट देवैगा।"
उत्तरी राजा की विजय
40 "दक्षिण देश के राजा के अन्त के बखत उसनै सींग मारण लागैगा; पर मिस्र के उत्तरी देश के राजा उसपै बवण्डर की तरियां भोत-से रथ-सवार अर जहाज लेकै चढ़ाई करैगा; इस रीति तै वो भोत-से देशां म्ह फैल जावैगा, अर उन म्ह तै लिकड़ जावैगा। 41 वो इस्राएल देश म्ह भी आवैगा, अर भोत-से देश उजड़ जावैंगे, पर एदोमी, मोआबियाँ का देश अर खास-खास अम्मोनी बाकी जातियाँ के देश उसके हाथ तै बच जावैंगे। 42 सीरिया के उत्तरी राज्य का राजा कई देशां पै हाथ बढ़ावैगा अर मिस्र देश भी ना बचैगा। 43 वो मिस्र के सोन्ने-चाँदी के खजान्यां अर सारी मनभावणी चिज्जां का माल्लिक हो जावैगा; अर लूबी अर कूशी माणस भी उसकै पाच्छै हो लेंगे। 44 उसी बखत वो पूरब अर उत्तर दिशा तै खबर सुणकै घबरावैगा, अर बड़े छो म्ह आकै घणखरयां का सत्यानाश करण कै खात्तर लिकड़ैगा। 45 अर वो दोन्नु समुन्दरां11:45 भूमध्यसागर कै बीच पवित्र सिय्योन पहाड़ कै धोरै अपणा राजकीय तम्बू खड़या करावैगा; इतणा करण पै भी उसका अन्त आ जावैगा, अर कोए उसका साथ देणिया ना रहवैगा।"