1 नबूकदनेस्सर राजा की और तै देश-देश अर जात्ति-जात्ति के माणसां, अर न्यारी-न्यारी भाषा बोलण आळे जितने सारी धरती पै रहवै सैं, उन सारया नै यो वचन मिल्या, "थारा भला होणा बढ़ता जावै! 2 मन्‍नै यो आच्छा लाग्या, के परमप्रधान परमेसवर नै मेरे ताहीं जो-जो निशान्‍नी अर चमत्कार दिखाये सैं, उननै प्रगट करुँ। 3 उसके दिखाए होए निशान कितणे बड़े, अर उसके चमत्कारां म्ह के ही बड़ी शक्ति प्रगट होवै सै! उसका राज्य तो सदा का अर उसकी प्रभुता पीढ़ी तै पीढ़ी ताहीं बणी रहवै सै।"

4 "मै नबूकदनेस्सर अपणे भवन म्ह चैन तै अर अपणे महल म्ह खुश रहया करदा। 5 मन्‍नै इसा सपना देख्या जिसके कारण मै डर ग्या; अर पलंग पै पड़े-पड़े जो विचार मेरे मन म्ह आए अर जो बात मन्‍नै देक्खी, उनकै कारण मै घबरा ग्या था। 6 फेर मन्‍नै हुकम दिया के बाबेल के सारे पंडित मेरे सपने का मतलब मेरे ताहीं बताण खात्तर मेरे स्याम्ही हाजिर करे जावैं। 7 फेर ज्योतिषी, तांत्रिक, कसदी अर भावी बताण आळे भित्तर आए, अर मन्‍नै उन ताहीं अपणा सपना बताया, फेर भी वे उसका मतलब ना बता सके। 8 अन्त म्ह दानिय्येल मेरे स्याम्ही आया, जिसका नाम मेरे देवता कै नाम कै कारण बेलतशस्सर धरया गया था, अर जिस म्ह पवित्र ईश्वरां की आत्मा रहवै सै; अर मन्‍नै उस ताहीं अपणा सपना या कहकै बता दिया, 9 हे बेलतशस्सर तू तो सारे ज्योतिषियाँ का प्रधान सै, मै जाणु सूं के तेरै म्ह पवित्र ईश्वरां की आत्मा रहवै सै, अर तू किसे भेद कै कारण न्ही घबरान्दा; इस करकै जो सपना मन्‍नै देख्या सै उसनै मतलब समेत मेरे ताहीं बताकै समझा दे। 10 जो दर्शन मन्‍नै पलंग पै पाया वो या सै: मन्‍नै देख्या, के धरती के बीचो बीच एक दरखत लाग्या सै; उसकी ऊँचाई घणी बड़ी सै। 11 वो दरखत बड़ा होकै मजबूत हो गया, अर उसकी ऊँचाई सुर्ग ताहीं पोहची, अर वो सारी धरती की छोर ताहीं दिखाई देवै था। 12 उसके पत्ते सुन्दर, अर उस म्ह घणे फळ थे, उरै ताहीं के उस म्ह सारया कै खात्तर भोजन था। उसकै नीच्‍चै मैदान के सारे पशुआं ताहीं छाया मिलै थी, अर उसकी डालियाँ म्ह अकास की सारी चिड़ियाँ बसेरा करै थी, अर सारे प्राणी उसतै भोजन पाया करदे।"

13 "मन्‍नै पलंग पै दर्शन पान्दे बखत के देख्या, के एक पवित्र दूत सुर्ग तै उतर आया जो कदे ना सोवै था। 14 उसनै ऊँच्‍ची आवाज तै पुकारकै न्यू कह्या, ‘दरखत नै काट देओ, उसकी डालियाँ नै छाँट द्यो, उसके पत्ते झाड़ द्यो अर उसके फळ छितरा देओ; पशु उसकै नीच्‍चै तै हट जावैं, अर चिड़ियाँ उसकी डालियाँ पै तै उड़ जावैं। 15 सुर्गदूत नै आग्गै कह्या उसके ठूँठ नै जड़ समेत धरती म्ह छोड़ द्यो, अर उसनै लोहे अर पीतळ के बन्धन तै बाँधकै मैदान की हरी घास के बीच रहण द्यो। वो अकास की ओस तै भीज्या करै अर धरती की घास खाण म्ह मैदान के पशुआं कै गैल भागी हो। 16 उसका मन बदलै अर माणस का ना रहवै, पर पशु का जिसा बण जावै; अर उसपै सात साल बीतैं। 17 यो हुकम उस दूत का फैसला सै, अर या बात पवित्र माणसां के वचन तै लिकड़ी, कै जो जिन्दा सैं वे जाण लेवै कै परमप्रधान परमेसवर माणसां के राज्य म्ह प्रभुता करै सै, अर उसनै जिस ताहीं चाहे उसनै दे देवै सै, अर वो छोट्टे तै छोट्टे माणस नै भी उसपै ठहरा देवै सै।’ 18 मुझ नबूकदनेस्सर राजा नै योए सपना देख्या। इस करकै हे बेलतशस्सर, तू इसका मतलब बता, क्यूँके मेरे राज्य म्ह और कोए पंडित इसका मतलब मेरे ताहीं समझा न्ही सक्या, पर तेरै म्ह तो पवित्र ईश्वरां की आत्मा रहवै सै, इस कारण तू उसनै समझा सकै सै।"

19 फेर दानिय्येल जिसका नाम बेलतशस्सर भी था, घड़ी भर घबरान्दा रह्या, अर सोचदे-सोचदे बेचैन होग्या। फेर राजा कहण लाग्या, "हे बेलतशस्सर यो सपना सै, या इसके मतलब तै तू बेचैन ना हो।" बेलतशस्सर नै कह्या, "हे मेरे प्रभु, यो सपना तेरे बैरियाँ पै, अर इसका मतलब तेरे बिरोधियाँ पै फळे! 20 जिस दरखत ताहीं तन्‍नै देख्या, जो बड़ा अर मजबूत होग्या, अर जिसकी ऊँचाई सुर्ग ताहीं पोहची अर जो धरती के सिरे तक दिखाई देवै था; 21 जिसके पत्ते सुन्दर अर फळ घणे थे, अर जिस म्ह सारया कै खात्तर भोजन था; जिसकै नीच्‍चै मैदान के सारे पशु रहवै थे, अर जिसकी डालियाँ म्ह अकास की चिड़ियाँ बसेरा करै थी, 22 हे राजा, वो तू आप्पे सै। तू महान अर ताकतवर होग्या, तेरी महिमा बढ़ी अर सुर्ग ताहीं पोहचगी, अर तेरी प्रभुता धरती की छोर ताहीं फैली सै। 23 अर हे राजा, तन्‍नै जो एक पवित्र दूत ताहीं सुर्ग तै उतरदे अर या कहन्दे देख्या के दरखत नै काट देओ अर उसका नाश करो, तोभी उसके ठूँठ नै जड़ समेत धरती म्ह छोड़ द्यो, अर उसनै लोहे अर पीतळ के बन्धन तै बाँधकै मैदान की हरी घास कै बीच म्ह रहण द्यो; वो अकास की ओस तै भीज्या करै, अर उसनै मैदान के पशुआं कै गैल ए भाग मिले; अर जिब ताहीं सात युग उसपै बीत ना लेवैं, जिब ताहीं उसकी इसीए हालत रहवै। 24 हे राजा, इसका मतलब जो परमप्रधान परमेसवर नै ठाण्या सै के राजा पै बीत्तै, वो या सै, 25 तू माणसां के बीच तै लिकाड़या जावैगा*, अर मैदान के पशुआं कै गैल रहवैगा; तू बळध की तरियां घास चरैगा; अर अकास की ओस तै भीज्या करैगा अर सात युग तेरै पै बीतैगें, जिब ताहीं के तू ना जाण ले के माणसां के राज्य म्ह परमप्रधान ए प्रभुता करै सै, अर जिसनै चाहे वो उसनै दे देवै सै। 26 अर उस दरखत के ठूँठ नै जड़ समेत छोड़ण का हुकम जो होया सै, इसका मतलब या सै के तेरा राज्य तेरे खात्तर बण्या रहवैगा; अर जिब तू जाण लेवैगा के जगत का प्रभु सुर्ग ए म्ह सै, फेर तू दुबारा तै राज्य करण पावैगा। 27 इस कारण, हे राजा, मेरी या सलाह मान के, के जै तू पाप छोड़कै धार्मिकता करण लाग्गै, अर अधर्म छोड़कै कमजोर माणसां पै दया करण लाग्गै, तो हो सकै सै के इसा करण तै तेरा चैन बण्या रहवै।"

28 या सब कुछ नबूकदनेस्सर राजा पै घट ग्या।* 29 बारहा महिन्‍ने बीतण पै जिब वो बाबेल के राजभवन की छात पै टहल रह्या था, फेर वो कहण लाग्या, 30 "के यो बड़ा बाबेल न्ही सै, जिस ताहीं मन्‍नै ए अपणे बल अर ताकत तै राज्य म्ह रहण ताहीं अर अपणे प्रताप की बड़ाई कै खात्तर बसाया सै?" 31 यो वचन राजा के मुँह तै लिकड़ण भी ना पाया था के आकाशवाणी होई, "हे राजा नबूकदनेस्सर तेरे बारै म्ह या हुकम लिकड़या सै के राज्य तेरे हाथ तै लिकड़ ग्या, 32 अर तू माणसां के बीच म्ह से लिकाड़या जावैगा, अर मैदान के पशुआं कै गैल रहवैगा; अर बळधां की तरियां घास चरैगा अर सात काल तेरै पै बीतैगें, जिब ताहीं के तू ना जाण लेवै के परमप्रधान परमेसवर, माणसां कै राज्य म्ह प्रभुता करै सै अर जिसनै चाहे वो उसनै दे देवै सै।" 33 उसी बखत या वचन नबूकदनेस्सर कै बारै म्ह पूरा होया। वो माणसां म्ह तै लिकाड़या गया, अर बळधां की तरियां घास चरण लाग्या, अर उसका शरीर अकास की ओस तै भीज्या करदा, उरै ताहीं के उसके बाल उकाब पक्षियां के परां तै अर उसके नाखून चिड़ियाँ के पंज्याँ की तरियां बढ़गे।

34 सात साल के बित्तण पै, मुझ नबूकदनेस्सर नै अपणी आँख सुर्ग की और ठाई, अर मेरी बुद्धि फेर ज्यों की त्यों होगी; फेर मन्‍नै परमप्रधान परमेसवर ताहीं धन्य कह्या, अर जो सदा जिन्दा सै उसकी स्तुति अर महिमा या कहकै करण लाग्या:

उसकी प्रभुता सदा की सै

अर उसका राज्य पीढ़ी तै पीढ़ी फेर बण्या रहण आळा सै।

35 धरती के सारे रहण आळे परमेसवर के स्याम्ही निकम्मा गिणे जावैं सैं,

अर वो सुर्ग की सेना अर धरती के रहण आळयां कै बीच

अपणी इच्छा कै मुताबिक काम करै सै;

अर कोए उसनै रोक कै उसतै न्ही कह सकदा, "तन्‍नै यो के करया सै?"

36 उसी बखत, मेरी बुद्धि फेर ज्यों की त्यों हो गई; अर मेरे राज्य की महिमा कै खात्तर मेरा प्रताप अर मुकुट मेरे पै फेर आ ग्या। अर मेरे मंत्री अर प्रधान माणस मेरे तै भेंट करण कै खात्तर आण लाग्गे, अर मै अपणे राज्य म्ह स्थिर होग्या; अर मेरी और घणी बड़ाई होण लाग्गी। 37 इब मै नबूकदनेस्सर सुर्ग के राजा परमेसवर नै सराहूं सूं, अर उसकी स्तुति अर महिमा करुँ सूं क्यूँके उसके सारे काम सच्‍चे, अर उसके सारे बरताव न्याय के सैं; अर जो माणस घमण्ड तै चालै सैं, उन ताहीं वो नीच्‍चा कर सकै सै।