एस्तेर 3

यहूदियाँ कै खिलाफ हामान की साजिस

1 इन बात्तां कै बाद राजा क्षयर्ष नै अगागी हम्मदाता के बेट्टे हामान*3:1 हामान अमालेकी राजा अगागो का वंशज था ताहीं ऊँच्‍चा पद दिया, अर उस ताहीं खास जाणकै उसकै खात्तर उसके साथी हाकिमां के सिंहासनां तै ऊँच्‍चा सिंहासन ठैहराया। 2 राजा के सारे कर्मचारी जो राजभवन के फाटक म्ह रह्या करदे, वे हामान कै स्याम्ही झुककै दण्डवत करया करदे क्यूँके राजा नै उसकै बारै म्ह इसाए हुकम दिया था; पर मोर्दकै ना तो झुकै था अर ना उस नै दण्डवत करया करदा। 3 फेर राजा के कर्मचारी जो राजभवन के फाटक म्ह रह्या करदे, उननै मोर्दकै तै पूच्छया, "तू राजा का हुकम का क्यूँ उलंघण करै सै?" 4 जिब वे उसतै रोज इसाए कहन्दे रहे, अर उसनै उनकी एक न्ही मान्‍नी, फेर उननै या देखण की इच्छा तै के मोर्दकै की या बात चाल्‍लैगी के न्ही, हामान तै बता दी; उसनै उन ताहीं बता दिया था के मै यहूदी सूं। 5 जिब हामान नै देख्या, के मोर्दकै न्ही झुकदा, अर ना मन्‍नै दण्डवत करै सै, फेर हामान भोत घणा छो म्ह होया। 6 उसनै सिर्फ मोर्दकै पै हाथ उठाणा अपणी मर्यादा तै कम जाण्या। क्यूँके उननै हामान तै यो बता दिया था, के मोर्दकै किस जात का सै, ज्यांतै हामान नै क्षयर्ष के साम्राज्य म्ह रहणआळे सारे यहूदियाँ ताहीं भी मोर्दकै की जात जाणकै, नाश करण की योजना लिकाड़ी।

7 राजा क्षयर्ष के शासनकाल के बारहवें साल के नीसान*3:7 यो हिब्रू कैलेंडर का पैहला महीना था, जो मार्च कै बिचाळै तै अप्रैल कै बिचाळै तक अमावस्या पै शरु होया था। नीसान नाम मूल रूप तै बेबीलोनियाई सै अर पुराणे नियम के लेखन म्ह बेबीलोन के निर्वासन कै बाद ए प्रकट होया सै। मूसा के विधान म्ह कनानी नाम अबीब पैहले महिन्‍ने कै खात्तर आवै सै नाम के पैहले महिन्‍ने म्ह, हामान नै अदार नाम के बारहवें महिन्‍ने ताहीं के एक-एक दिन अर एक-एक महिन्‍ने कै खात्तर "पूर" यानिके चिट्ठी अपणे स्याम्ही डलवाई। 8 फेर हामान नै राजा क्षयर्ष तै कह्या, महाराज, "तेरे राज्य के सारे प्रान्तां के रहणआळे देश-देश के माणसां म्ह एक इसी जात बसी सै, जिसके रीति-रिवाज और सारे माणसां के रीति-रिवाज तै न्यारे सैं; अर वे राजा के कानून पै न्ही चाल्दे, ज्यांतै उन ताहीं रहण देणा राजा नै फायदेमन्द न्ही सै। 9 जै राजा नै मंजुर हो तो उननै नाश करण का हुकम लिख्या जावै, अर मै राजा के भण्डारीयाँ कै हाथ म्ह राजभण्डार म्ह पोहचाण कै खात्तर, दस हजार किक्‍कार चाँदी दियुँगा।" 10 फेर राजा नै अपणी मोहर आळी अंगूठी*3:10 राजा की अंगूठी, जिसका इस्तमाल घोषणा पै मोहर लगाण अर उन ताहीं आधिकारिक बणाण कै खात्तर भी करया जावै था अपणे हाथ तै तारकै अगागी हम्मदाता के बेट्टे हामान ताहीं, जो यहूदियाँ का दुश्मन था दे दी। 11 अर राजा नै हामान तै कह्या, "वा चाँदी तेरे ताहीं दी गई सै, अर वे माणस भी, ताके तू उनतै जिसा तेरा जी चावै उस्से तरियां बरतावै करै।"

12 फेर नीसान नाम के पैहले महिन्‍ने के तेरहवें दिन राजा के लेखक बुलाए गए, अर हामान के हुकम कै मुताबिक राजा के सारे अधिपतियाँ, अर सारे प्रान्तां के प्रधान, अर देश-देश के माणसां के हाकिमां कै खात्तर उनकी अपणी भाषा अर लिपि म्ह चिट्ठी लिखी। यो हुकम राजा क्षयर्ष कै नाम तै लिख्या गया; अर उनपै राजा की मोहर आळी अंगूठी की छाप लगाई गई। 13 राज्य के सारे प्रान्तां म्ह इस उम्मीद तै चिट्ठी हर डाकियाँ के जरिये भेज्जी गई के एके दिन म्ह, यानिके अदार नाम के बारहवें महिन्‍ने के तेरहवें दिन नै, के जवान, के बूढ़ा, के जनान्‍नी, के बाळक, सारे यहूदी घात अर नाश करे जावैं; अर उनकी धन-दौलत लूट ली जावै। 14 उस हुकम के लेख की नकल सारे प्रान्तां म्ह खुली होई भेज्जी गई के सारे देशां के माणस उस दिन कै खात्तर त्यार हो जावैं। 15 यो हुकम शूशन गढ़ म्ह दिया गया, अर डाकिए राजा के हुकम तै जिब्बे लिकड़गे। राजा अर हामान तो दाखमधु पीण बैठगे; पर शूशन गढ़ म्ह घबराहट फैलगी।