1 शिग्योनीत* की रीति पै हबक्‍कूक नबी की प्रार्थना।

2 हे यहोवा, मै तेरी कीर्ति* सुणकै डर ग्या।

हे यहोवा, वर्तमान युग म्ह अपणे काम नै पूरा कर;

इस्से युग म्ह तू उसनै प्रगट कर;

छो करदे होए भी दया करणा याद राख।

3 परमेसवर तेमान* तै आया,

पवित्र परमेसवर पारान पहाड़* तै आ रह्या सै। (सेला)

उसका तेज अकास पै छाया होया सै,

अर धरती उसकी स्तुति तै भरगी सै।

4 उसकी ज्योति सूरज कै बराबर थी,

उसके हाथ तै किरण लिकड़ रही थी;

अर इन म्ह उसकी ताकत छिपी होई थी।

5 उसकै आगै-आगै मरी फैलदी गई,

अर उसके पैरां तै महाज्वर लिकड़दा गया।

6 वो खड्या होकै धरती नै नाप रह्या था;

उसनै देख्या अर धरती की सारी जात्ति-जात्ति के माणस घबरागे;

फेर सनातन पहाड़ चकणाचूर होगे, अर सनातन की पहाड़ियाँ झुक गी

उसकी गति अनन्त काल तै एक जिसी सै।

7 मेरे ताहीं कूशान* गोत्र के माणसां के तम्बू म्ह रहण आळे दुःख तै दबे दिखाई पड़े;

अर मिद्यान देश के डेरे डगमगा गे।

8 हे यहोवा, के तू नदियाँ पै रिसियाया था?

के तेरा छो नदियाँ पै भड़क्या था,

या के तेरी जळजळाहट समुन्दर पै भड़की थी,

जिब तू अपणे घोड़यां पै अर उद्धार करण आळे जीत के रथां पै चढ़कै आ रह्या था?

9 तेरा धनुष खोल म्ह तै लिकड़ ग्या,

तेरी सजा का वचन कसम कै गैल होया था। (सेला)

तन्‍नै धरती ताहीं नदियाँ तै चीर दिया।

10 पहाड़ तेरे ताहीं देखकै काँम्ब उठे;

आँधी अर जल-प्रलय लिकड़गे;

ढुंघा सागर बोल उठ्या अर अपणे हाथां

यानिके लहरां ताहीं उप्पर ठाया।

11 तेरे उड़ण आळे तीरां के चाल्‍लण की ज्योति तै,

अर तेरे चमकीले भाल्‍ले की झलक की रोशनी तै सूरज अर चाँद अपणी-अपणी जगहां पै ठहरगे।

12 तू छो म्ह आकै धरती पै चाल लिकड़या,

तन्‍नै जात्ति-जात्ति ताहीं छो तै नाश करया।

13 तू अपणी प्रजा के उद्धार कै खात्तर लिकड़या,

हाँ, अपणे अभिषिक्त कै गैल होकै उद्धार कै खात्तर लिकड़या।

तन्‍नै दुष्ट के घर के सिर ताहीं कुचळ कै उसनै गळे तै नींव ताहीं नंगा कर दिया। (सेला)

14 तन्‍नै उसके योद्धयां के सिरां ताहीं उसे की बर्छी तै छेद्या सै,

वे मन्‍नै आस्सै-पास्सै करण कै खात्तर बवंडर की आँधी की तरियां आए,

अर दीन माणसां नै घात लगाकै मार गेरण की उम्मीद तै आनन्दित थे।

15 तू अपणे घोड़यां पै सवार होकै समुन्दर तै हाँ, जल-प्रलय तै पार होग्या।

16 यो सब सुणदे ए मेरा कळेजा* काँम्ब उठ्या,

मेरे होठ थरथराण लाग्गे;

मेरी हाड्डी सड़ण लाग्गी, अर मै खड़े-खड़े काँम्बण लाग्या।

मै शान्ति तै उस दिन की बाट देखदा रहूँगा

जिब दल बाँधकै प्रजा चढ़ाई करै।

17 क्यूँके चाहे अंजीर के दरखतां म्ह फूल ना लाग्गे,

अर ना दाखलता म्ह फळ लाग्गे,

जैतून के दरखत तै सिर्फ धोखा पाया जावै

अर खेत्तां म्ह अन्‍न ना उगै,

बाड़याँ म्ह भेड़-बकरी ना रहवैं,

अर ना थान्‍नां म्ह गां-बळध हों*,

18 फेर भी मै यहोवा कै कारण आनन्दित अर मगन रहूँगा,

अर अपणे उद्धारकर्ता परमेसवर कै जरिये भोत खुश रहूँगा

19 यहोवा परमेसवर मेरे जोर का कारण सै,

वो मेरे पैर हिरण की तरियां बणा देवै सै,

वो मन्‍नै मेरी ऊँच्‍ची जगहां* पै चलावै सै।