Lucas 8

49 वो न्यू कहवै था के किसे नै आराधनालय कै सरदार याईर कै उरै तै आकै कह्या, "तेरी छोरी मर ली सै: गुरु नै कांल ना करै।"

50 यीशु नै न्यू सुणकै उसतै जवाब दिया, "मतना डरै, सिर्फ बिश्वास राख, तो वा बच जावैगी।"

51 घर म्ह आकै उसनै पतरस, यूहन्‍ना, याकूब, अर छोरी के माँ-बाप नै छोड़ दुसरे किसे नै अपणे गेल्या भीत्त्तर कोनी आण दिया। 52 सारे उसकै बाबत रोण-पिट्टण लागरे थे, पर उसनै कह्या, "रोओ मतना, वा मरी कोनी पर सोवै सै।"

53 वे न्यू जाणकै के वा मरगी सै उसका मजाक उड़ाण लाग्ये। 54 पर उसनै उसका हाथ पकड्या, अर रुक्‍का मारकै कह्या, "हे छोरी, उठ!" 55 फेर उसका जी बोहड़ आया अर वा जिब्बे उठ बेठ्ठी। फेर उसनै हुकम दिया के उसनै कुछ खाण नै द्यो। 56 उसकै माँ-बाप हैरान होए, पर उसनै उन ताहीं चिताया के यो जो होया सै किसे तै ना कहियो।