1 मन्‍नै कह्या: हे याकूब के प्रधान्‍नों, हे इस्राएल के लोगों के न्यायियों, सुणो! के न्याय का भेद जाणणा थारा काम न्ही? 2 थम तो भलाई तै बैर, अर बुराई तै प्यार राक्खो सो*, मान्‍नो, थम, लोग्गां पै तै उनकी खाल उधेड़ लेते, अर उनकी हड्डियाँ पै तै उनका खाल नोच लेओ सो; 3 बलके थम मेरे माणसां का माँस खा भी लेओ, अर उनकी खाल उधेड़ो सो; थम उनकी हड्डियाँ नै हाण्डी म्ह पकाण कै खात्तर तोड़ देते अर उनका माँस हँडे म्ह पकाण कै खात्तर टुकड़े-टुकड़े करो सो। 4 वे उस बखत यहोवा नै मदद खात्तर पुकारैंगे, पर वो उनकी ना सुणैगा, बलके उस बखत वो उनके बुरे काम्मां कै कारण उनतै मुँह मोड़ लेवैगा।

5 यहोवा का यो वचन सै के जो भविष्यवक्ता मेरी प्रजा नै भटका देवै सैं, अर जिब उननै खाण नै मिलै सै फेर "शान्ति-शान्ति," पुकारै सैं, अर जै कोए उनके मुँह म्ह कुछ ना दे, तो उसकै खिलाफ युद्ध करण नै त्यार हो जावै सैं। 6 इस कारण थारे पै इसी रात आवैगी, के थमनै दर्शन ना मिलैगा, अर थम इसे अन्धकार म्ह पड़ोगे के बुझा ना दे सकोगे। नबिया कै खात्तर सूरज डूब ज्यागा, अर दिन रहन्दे उनपै अन्धेरा छा जावैगा। 7 नबी लज्जित होवैंगे, अर पुच्छा देण आळयां के मुँह काळे होवैंगें; अर वे सबके सब अपणे होठां नै इस करकै ढकैगें* के परमेसवर की और तै जवाब न्ही मिलदा। 8 लेकिन मै तो यहोवा की आत्मा तै शक्ति, न्याय अर पराक्रम पाकै भरपूर सूं ताके मै याकूब नै उसका अपराध अर इस्राएल नै उसका पाप बता सकूँ।

9 हे याकूब के घरान्‍ने के प्रधान्‍नों, हे इस्राएल के घरान्‍ने के न्यायियों, हे न्याय तै घृणा करण आळेयो अर सारी सीध्धी बात्तां नै टेढ़ी-मेढ़ी करण आळेयो, या बात सुणो। 10 थम* सिय्योन नै हत्या करकै अर यरुशलेम नै कुटिलता करकै मजबूत करो सो। 11 उस शहर के प्रधान घूस ले-लेकै विचार करै, अर याजक दाम ले-लेकै नियम-कायदे देवै सैं, अर भविष्यवक्ता रपियाँ कै खात्तर पुच्छा देवैं सैं; तोभी वे न्यू कहकै यहोवा पै भरोस्सा राक्खै सैं, "यहोवा म्हारे बीच म्ह सै, इस करकै कोए मुसीबत म्हारे पै ना आवैगी।" 12 इस करकै थारे कारण सिय्योन जोतकै खेत बणाया जावैगा, अर यरुशलेम खण्डहरां का ढेर हो जावैगा, अर जिस पहाड़ पै परमेसवर का भवन बण्या सै, वो बण की ऊँच्‍ची जगहां जिसा हो जावैगा।