1 दाऊद के बेट्टे इस्राएल के राजा सुलैमान के नीतिवचन

2 इन नीतिवचनां के जरिये पढ़ण आळा बुद्धि अर शिक्षा पावै,

अर समझण की बात समझै,

3 अर बुद्धिमान तै जिन्दगी बिताण म्ह माहिरता,

अर धर्म, न्याय अर सिधाई के बारै म्ह अनुशासन पावै;

4 ताके भोळां नै चतुराई,

अर जवान नै ज्ञान अर विवेक मिलै;

5 ताके बुद्धिमान सुणकै अपणी विद्या बढ़ावै,

अर समझदार बुद्धि का उपदेश पावै,

6 जिसतै वे नीतिवचन अर उदाहरण की बात्तां नै,

अर बुद्धिमानां के वचन अर उनके भेदां नै समझै।

7 यहोवा का भय मानणा बुद्धि की शरुआत सै,

बुद्धि अर शिक्षा नै मूर्ख माणस ए तुच्छ जाणै सै,

8 हे मेरे बेट्टे, अपणे पिता की शिक्षा पै कान लगा,

अर अपणी माँ की शिक्षा नै ना भूल्‍लै;

9 क्यूँके वे मान्‍नो तेरे खात्तर सिर पै सजण आळा मुकुट,

अर तेरे गळे का हार होवैंगी।

10 हे मेरे बेट्टे, जै पापी माणस तन्‍नै भकावै,

तो उनकी बात ना मानिये।

11 जै वे कहवै, "म्हारे गैल चाल,

ताके हम मारण खात्तर दा लगावां, अर हम बेकसूरां पै हमला करां;

12 हम उननै जिन्दे ए निगळ जावां, जिस तरियां अधोलोक भले-चंगे माणसां नै भी निगळ जावै सै,

अर उन ताहीं कब्र म्ह पड़े मरे होया की तरियां बणा दे।

13 हमनै सारी ढाळ की बेसकिमती चीज मिलैगी,

हम अपणे घरां नै लूट तै भर लेवांगे;

14 तू म्हारा साझी हो जा,

अपणे सारया का एक ए साझा हो,"

15 तो, हे मेरे बेट्टे, उनकै गैल राह म्ह ना चालिए,

बल्के उनकी राह म्ह पैर भी ना धरिये;

16 क्यूँके वे बुराई करण नै भाज्जै सै,

अर मारण म्ह तावळ करै सै।

17 क्यूँके पंछी के देखदे होए जाळ बिछाणा फजूल होवै सै;

18 अर ये माणस तो अपणा ए खून करण की बाट म्ह बैठ्ठे सै,

अर खुद का ए खून करण की ताक म्ह रहवै सै।

19 सारे लालचियाँ की चाल इसीए हो सै;

उनकी जान लालच कै कारण ए जावै सै।

20 बुद्धि सड़क पै ऊँच्‍ची आवाज म्ह बोल्‍लै सै;

अर चौकां म्ह प्रचार करै सै।

21 वा बजारां की भीड़ म्ह पुकारै सै,

वा नगर के फाटकां के देह्ली पै खड़ी होकै, न्यू बोल्‍लै सै,

22 "हे अज्ञानियों, थम कद ताहीं अज्ञानता तै मोह राक्खोगे?

अर हे मखौल करण आळो, थम कद ताहीं मखौल करण तै राज्जी रहोगे?

हे मूर्खो, थम कद तक ज्ञान तै बैर राक्खोगे?

23 थम मेरी डाँट सुणकै पाप करणा छोड़ द्यो;

सुणो, मै अपणी आत्मा थारे खात्तर उंडेल दियुँगी।

मै थमनै अपणे वचन बताऊँगी।

24 मन्‍नै तो पुकारया पर थमनै मना करया,

अर मन्‍नै हाथ फैलाया*, पर किसे नै ध्यान न्ही दिया,

25 बल्के थमनै मेरी सारी सलाह ताहीं अनसुणी करया,

अर मेरी डाँट की किम्मत न्ही जाणी;

26 इस खात्तर मै भी थारी बिप्दा कै बखत हाँस्सुगी;

अर जिब थारे पै भय आ पड़ैगा, फेर मै मजाक उड़ाऊँगी।

27 बल्के आँधी कै ढाळ थारे पै भय आण पड़ैगा,

अर बिप्दा भम्बुळियाँ की ढाळ आ पड़ैगी,

अर थम मुश्किल अर बिप्दा म्ह फंसोगे फेर मै मखौल करुँगी।

28 उस बखत वे मन्‍नै पुकारैंगे अर मै ना सुणुगी;

वे मन्‍नै जतन तै तो ढूँढैंगे, पर न्ही पावैंगें।

29 क्यूँके, उननै ज्ञान तै बैर करया,

अर यहोवा का भय मानणा उननै न्ही भाया।

30 उननै मेरी सलाह न्ही मान्‍नी।

बल्के मेरी सारी डाँट-फटकार फजूल जाणी।

31 इस खात्तर वे अपणी करणी का फळ आप भोगैंगे,

अर अपणी युक्तियाँ कै नतिज्जे तै ऊब जावैंगे,

32 क्यूँके अज्ञानियाँ का भटक जाणा, उनकै घात करै जाणै का कारण होवैगा।

अर बेफिकर रहण कै कारण मूर्ख लोग नाश होवैंगे;

33 पर जो मेरी सुणैगा, वो निडर बस्या रहवैगा,

अर बिप्दा तै बेफिकर होकै सुख तै रहवैगा।"