ज्ञान का मोल
1 हे मेरे बेट्टे, जै तू मेरे वचनां नै मान्नै,
अर मेरे हुकमां नै अपणे मन म्ह धरे राक्खै,
2 अर बुद्धि की बात ध्यान तै सुणै,
अर समझ की बात मन लगाकै सोच्चै;
3 जै तू माहिर अर समझ खात्तर घणे जतन तै पुकारै,
4 अर उसनै चाँदी की ढाळ टोहवै,
अर गुप्त धन की तरियां उसकी टोह म्ह लाग्या रहवै;
5 तो तू यहोवा के भय नै समझैगा,
अर परमेसवर का ज्ञान तन्नै मिलैगा।
6 क्यूँके बुद्धि यहोवा ए देवै सै,
ज्ञान अर समझ की बात उस्से कै मुँह तै लिकड़ै सै।
7 वो सीध्धे माणसां खात्तर खरी बुद्धि धरे राक्खै सै;
जो खराई तै चाल्लै सै, उनकै खात्तर वो ढाल बणै सै।
8 वो न्याय के राह की देख-भाल करै,
अर अपणे भगतां के राह की हिफाजत करै सै।
9 फेर तू धर्म अर न्याय अर सिधाई नै,
यानी सारी आच्छी राह नै समझ सकैगा;
10 क्यूँके बुद्धि तो तेरे मन म्ह दाखल होवैगी,
अर ज्ञान तेरे मन नै सुख देण आळा होवैगा;
11 विवेक तन्नै सम्भाले राक्खैगा;
अर समझ तेरी रक्षक होवैगी;
12 ताके वे तन्नै बुराई की राह तै,
अर उल्ट फेर की बात कहण आळे तै बचावैंगे,
13 जो सीध्धे राह नै छोड़ देवै सै,
ताके अँधेरी राह म्ह चाल्लै;
14 जो बुराई करण तै राज्जी होवै सै,
अर दुष्ट माणस की उल्ट फेर की बात्तां म्ह मगन रहवै सै;
15 जिनका चाल-चलण टेढ़ा-मेढ़ा
अर जिनके राह म्ह भटकाव होवै सै।
16 बुद्धि अर विवेक तन्नै पराई बीर तै भी बचावैंगे
जो चिकणी-चुपड़ी बात करै सै,
17 अर अपणी जवान्नी कै साथी नै छोड़ देवै,
अर जो अपणे परमेसवर के करार नै भूल जावै सै।
18 उसका घर मौत की ढलाण पै सै,
अर उसकी राही मरे होया म्ह पोहंचै सै;
19 जो उसकै धोरै जा सै, उन म्ह तै कोए भी बोहड़कै न्ही आन्दा;
अर ना वे जिन्दगी की राह पावै सै।
20 इस करकै तू भले माणसां की राह पै चाल,
अर धर्मियाँ की राह नै पकड़े रह।
21 क्यूँके धर्मी लोग देश म्ह बसे रहवैंगे,
अर खरे माणस ए उस म्ह बणे रहवैंगे।
22 दुष्ट माणस देश म्ह तै खतम होवैंगे,
अर धोक्खेबाज उस म्ह तै उखाड़े जावैंगे।