Provérbios 9

ज्ञान की राह

1 बुद्धि नै अपणा घर बणाया

अर उसके सात्तु खम्भे गढ़े होए सै।

2 उसनै भोज कै खात्तर अपणे पशु काटकै, अपणे दाखमधु म्ह मसाला मिलाया

अर अपणी मेज लगाई सै।

3 उसनै अपणी नौकराणियाँ ताहीं बुलाण खात्तर भेज्या सै;

अर वा नगर के सब तै ऊँच्‍चे स्थानां पै तै पुकारै सै,

4 "जो कोए भोळा सै वो बोहड़कै उरैए आवै!"

अर जो बेअक्ला सै, उसतै वा कहवै सै,

5 "आओ, मेरी रोट्टी खाओ,

अर मेरा मसाला मिलाया होया दाखमधु पीओ।

6 मूर्खां का साथ छोड़ो,

अर जिन्दा रहो, समझ की राह म्ह सीध्धे चाल्‍लों।"

7 जो मजाक करण आळा नै शिक्षा देवै सै, वो अपमानित होवै सै,

अर जो दुष्ट माणस नै डाँटै सै वो कलंकित होवै सै।

8 मजाक उड़ाण आळे नै ना डाँटिये, इसा ना हो, के वो तेरे तै बैर करै,

बुद्धिमान नै डाँट, वो तेरे तै प्यार करैगा।

9 बुद्धिमान नै शिक्षा दे, वो घणा बुद्धिमान होवैगा;

धर्मी नै चेतावनी दे, वो अपणी शिक्षा बढ़ावैगा।

10 यहोवा का भय मानणा बुद्धि की शरुआत सै,

अर परमपवित्र परमेसवर नै जाणणा ए समझ सै।

11 मेरै जरिये ए तो तेरी उम्र बढ़ैगी,

अर तेरी जिन्दगी के साल घणे होवैगें।

12 जै तू बुद्धिमान सै, तो बुद्धि का फळ तू ए भोग्गैगा;

अर जै तू मजाक उड़ावैगा, तो सजा भी तू हे भोग्गैगा।

मूर्खता का राह

13 मूर्खता बक-बक करण आळी जनान्‍नी के जिसी सै; वा तो बेअक्ली सै,

अर कुछ न्ही जाणदी।

14 वा अपणे घर कै दरबाजे म्ह,

अर नगर के ऊँच्‍चे स्थानां म्ह अपणे आसनां पै बैठ्ठी होई

15 वा उन माणसां तै जो अपणे राह पै जो सीध्धा चाल्‍लै सै या कहकै पुकारै सै,

16 "जो कोए भोळा सै, वा बोहड़कै उरैए आवै,"

अर जो बेअक्ले सै, उसतै वा कहवै सै,

17 "चोरी का पाणी मिठ्ठा होवै सै,

अर लुकै-छिपे की रोट्टी आच्छी लाग्गै सै,"

18 वो न्ही जाणदा, के ओड़ै मरे होये पड़े सै,

अर उस जनान्‍नी के जिमण आळे अधोलोक के निचले स्थानां म्ह पोहचे सै।