Rute 1

एलीमेलेक के परिवार का मोआब जाणा

1 फेर जिन दिनां म्ह न्यायी माणस राज करया करै थे उन दिनां म्ह इस्राएल देश म्ह काळ पड्या, फेर यहूदा के बैतलहम नगर का एक माणस अपणी घरआळी अर दोन्‍नु बेट्यां नै गैल लेकै मोआब कै देश म्ह परदेशी होकै रहण कै खात्तर चल्या*1:1 परदेशी होकै रहण कै खात्तर चल्या पुराणे नियम के न्यायाधीश अनिवार्य रूप तै कई वर्तमान समाज म्ह खास माणसां के समान थे। उननै ना सिर्फ लोगां के बीच मत भेदां का न्याय करया, बल्कि वे खास रूप तै इसे नेता थे जिन नै इस्राएल के जीवन ताहीं दिशा दी थी। 2 उस आदमी का नाम एलीमेलेक, अर उसकी घरआळी का नाम नाओमी, अर उसके दो बेट्यां के नाम महलोन अर किल्योन थे; ये एप्राती यानिके यहूदा के बैतलहम कै रहणआळे थे। वे मोआब के देश म्ह आकै कुछ बखत खात्तर ओड़ै रहे। 3 फेर नाओमी*1:3 नाओमी का अर्थ सै सुखद, प्यारा, रमणीय। का घरआळा एलीमेलेक कुछ बखत कै बाद मर ग्या, अर नाओमी अर उसके दोन्‍नु बेट्टे रहगे। 4 अर उननै एक-एक मोआबिन छोरी तै ब्याह करया; एक का नाम ओर्पा अर दुसरी का नाम रूत था। फेर वे ओड़ै कोए दस साल तक रहे*1:4 फेर वे ओड़ै कोए दस साल तक रहे महलोन नै रूत तै ब्याह करया अर किल्योन नै ओर्पास तै ब्याह करया। 5 जिब महलोन अर किल्योन दोन्‍नु मरगे, फेर नाओमी अपणे दोन्‍नु बेट्यां अर घरआळे तै वंचित होगी।

नाओमी का रूत कै गैल बोहड़णा

6 फेर वा मोआब कै देश म्ह या सुणकै, के यहोवा नै अपणी प्रजा के माणसां की सुधि लेकै उन ताहीं भोजनवस्तु*1:6 भोजनवस्तु आच्छी फसल/आच्छी फसल दी सै, उस देश तै अपणी दोन्‍नु बहुआं समेत बोहड़ण खात्तर त्यार होई। 7 आखर वा अपणी दोन्‍नु बहुआं समेत उस जगहां तै जित्त वा रह्या करदी लिकड़ी, अर उननै यहूदा देश म्ह बोहड़ जाण का राह लिया। 8 फेर नाओमी नै अपणी दोन्‍नु बहुआं तै कह्या, "थम अपणे-अपणे पीहर वापस चली जाओ। अर जिस तरियां थमनै जो मरगे सैं अर मेरे तै भी प्यार करया सै, उस्से तरियां ए यहोवा थारे पै भी दया करै। 9 यहोवा इसा करै के थम फेर तै अपणे-अपणे घरआळे कै घर म्ह आराम पाओ।" फेर नाओमी नै उन ताहीं चुम्या, अर वे रुक्‍के मार-मारकै रोण लाग्गी*1:9 नाओमी नै उन ताहीं चुम्या, अर वे रुक्‍के मार-मारकै रोण लाग्गी नाओमी नै उन ताहीं चुम्या अर अलविदा कह्या, 10 अर उसतै कह्या, "जरुर हम तेरे गैल तेरे माणसां कै धोरै चाल्‍लांगी।" 11 पर नाओमी नै कह्या, "हे मेरी बेटियों, बोहड़ जाओ, थम क्यूँ मेरे गैल जाओगी? के मेरी कोख म्ह और बेट्टे सैं जो थारे घरआळे हों? 12 हे मेरी बेटियों, बोहड़ जाओ, क्यूँके मै घरआळा करण कै खात्तर बूढ़ी हो ली सूं। अर जै मै कहूँ भी, के मन्‍नै आस सै, अर आज की रात मेरा घरआळा भी होन्दा, अर मेरे बेट्टे भी होन्दे, 13 तोभी के थम उनके श्याणे होण तक आस लगाऐ ठैहरी रहोगी? अर उनकै खात्तर घरआळी बणण खात्तर रुकी रहोगी? हे मेरी बेटियों, इसा ना हो, क्यूँके मेरा दुख थारे दुख तै घणा बढ़कै सै; देक्खो, यहोवा का हाथ मेरे खिलाफ उठ्या सै।" 14 फेर वे रुक्‍के मार-मारकै रोण लाग्गी; अर ओर्पा नै तो अपणी सास ताहीं चुम्या अर अपणे घरां चली गई, पर रूत उसतै अलग ना होई।

15 फेर नाओमी नै रूत तै कह्या, "देख, तेरी जिठाणी तो अपणे माणसां अर अपणे देवता कै धोरै चली गई; ज्यांतै तू अपणी जिठाणी कै पाच्छै चली जा।" 16 पर रूत नै उतर दिया, "तू मेरे तै या बिनती ना करै, के मन्‍नै छोड़कै उलटी चली जा; क्यूँके जित्त तू जावैगी ओड़ै मै भी जाऊँगी; जित्त तू रहवै ओड़ै मै भी रहूँगी; तेरे माणस मेरे माणस होवैंगे, अर तेरा परमेसवर मेरा परमेसवर होवैगा; 17 जित्त तू मरैगी ओड़ै मै भी मरुँगी, अर ओड़ैए मेरे ताहीं माट्टी दी जावैगी। जै मौत नै छोड़ और किसे कारण मै तेरे तै न्यारी होऊँ, तो यहोवा मेरे तै उस्से तरियां बल्के उसतै भी घणा करै।" 18 जिब नाओमी नै यो देख्या के वा मेरे गैल चाल्‍लण खात्तर त्यार सै, फेर उसनै उसतै और बात न्ही करी।

19 आखर म्ह वो दोन्‍नु सास अर बहू चाल पड़ी अर लाम्बी यात्रा कै बाद बैतलहम नगर म्ह पोहची। उनकै बैतलहम म्ह पोहचण पै सारे नगर म्ह उनकै कारण हलचल माचगी; अर सारी जनान्‍नी एक दुसरी तै कहण लाग्गी, "के या नाओमी सै?" 20 फेर नाओमी नै उनतै कह्या, "मन्‍नै नाओमी ना कहो, मन्‍नै मारा*1:20 मारा कड़वा कहो, क्यूँके सर्वशक्तिमान नै मेरे ताहीं बड़ा दुख दिया सै। 21 मै हरी-भरी परदेस गई थी, पर यहोवा मेरे ताहीं खाल्‍ली हाथ लेकै आया सै। इस करकै यहोवा नै ए मेरे खिलाफ गवाही दी, अर सर्वशक्तिमान नै मेरे ताहीं दुख दिया सै, फेर थम मेरे ताहीं क्यूँ नाओमी कहो सो?"

22 इस तरियां नाओमी अपणी मोआबिन बहू रूत कै गैल बोहड़ी, जो मोआब देश तै आई थी। अर वे जौ की लामणी शरु होन्दे ए बैतलहम म्ह पोहची।