बिन्यामीनियां कै खात्तर बिरबानियाँ की इन्तजाम
1 इस्राएली आदमियाँ नै मिस्पा म्ह कसम खाकै कह्या था, "म्हारै म्ह कोए अपणी बेट्टी का किसे बिन्यामीन तै ब्याह न्ही करैगा।" 2 वे बेतेल नगर म्ह जाकै साँझ ताहीं परमेसवर कै स्याम्ही बैठ्ठे रहे, अर फूट-फूटकै घणे रोन्दे रहे। 3 अर प्रार्थना करैं थे, "हे इस्राएल के परमेसवर यहोवा, इस्राएल म्ह इसा क्यूँ होण पाया, के आज इस्राएल म्ह एक गोत्र कम होग्या सै?" 4 फेर दुसरे दिन उननै सबेरै उठ ओड़ै वेदी बणाकै होमबलि अर मेलबलि चढ़ाए। 5 फेर इस्राएली पूछण लाग्गे, "इस्राएल के सारे गोत्रां म्ह तै कौण सै जो यहोवा कै धोरै सभा म्ह न्ही आया था?" उननै तो भारी कसम खाकै कह्या था, "जो कोए मिस्पा म्ह यहोवा कै धोरै ना आवै वो पक्का मार डाल्या जावैगा।" 6 फेर इस्राएली अपणे भाई बिन्यामीन कै बारै म्ह यो कहकै पच्छताण लाग्गे, "आज इस्राएल म्ह तै एक गोत्र कम होग्या सै। 7 हमनै जो यहोवा की कसम खाकै कह्या सै, के हम उनतै अपणी किसे बेट्टी का ब्याह न्ही करांगे, ज्यांतै बचे21:7 ज्यांतै बचे बिन्यामीन गोत्र होयां नै जनानियाँ मिलण कै खात्तर के करां?"
8 जिब उननै यो पूच्छया, "इस्राएल के गोत्रां म्ह तै कौण सै जो मिस्पा म्ह यहोवा कै धोरै न्ही आया था?" फेर यो मालुम होया, के गिलादी याबेश तै कोए छावणी म्ह सभा म्ह न्ही आया था। 9 यानिके जिब माणसां की गिणती करी गई, फेर यो जाण्या गया के गिलादी याबेश के निवासियां म्ह तै कोए उरै न्ही सै। 10 ज्यांतै मण्डळी नै बाराह हजार शूरवीरां तै ओड़ै यो हुकम देकै भेज दिया, "थम जाकै जनानियाँ अर बाल-बच्यां सुधा गिलादी याबेश नगर नै तलवार तै नाश करो। 11 अर थमनै जो करणा होवैगा वो यो सै, के सारे माणसां नै अर जितनी जनानियाँ नै माणस का मुँह देख्या हो उनका सत्यानाश कर देणा।" 12 अर उननै गिलादी याबेश के निवासियां म्ह तै च्यार सौ जवान कुमारियाँ मिली जिन नै माणस का मुँह न्ही देख्या था; अर उननै वे शीलो ताहीं जो कनान देश म्ह सै छावणी म्ह ले आए।
13 फेर सारी मण्डळी नै उन बिन्यामीनियाँ कै धोरै जो रिम्मोन नाम की चट्टान पै थे कुह्वा भेज्जा, अर उनतै संधि की घोषणा करी। 14 फेर बिन्यामीन उसे बखत बोहड़गे; अर उनतै वे जनानियाँ दी गई जो गिलादी परदेस के याबेश नगर की जनानियाँ म्ह तै जिन्दा छोड्डी गई थी; फेर भी वे उनकै खात्तर थोड़ी थी। 15 फेर माणस बिन्यामीन कै बारै म्ह फेर यो कहकै पच्छताये, के यहोवा नै इस्राएल के गोत्रां म्ह कमी करी सै।
16 फेर मण्डळी के बूढ़े माणसां नै कह्या, "बिन्यामीन जनान्नी नाश होई सैं, तो बचे होए माणसां कै खात्तर पत्नी पाण का हम के उपाय करां?" 17 फेर उननै कह्या, "बचे होए बिन्यामीनियाँ कै खात्तर कोए भाग चाहिये, इसा ना हो के इस्राएल म्ह तै एक गोत्र मिट ज्या। 18 पर हम तो अपणी किसे बेट्टी का उनतै ब्याह न्ही कर सकदे, क्यूँके इस्राएलियाँ नै यो कहकै कसम खाई सै के श्रापित हो वो जो किसे बिन्यामीन तै अपणी छोरी का ब्याह करैं।" 19 फेर उननै कह्या, "सुणो, शीलो जो बेतेल नगर के उत्तर की ओड़, अर उस सड़क के पूर्व की ओड़ सै जो बेतेल तै शेकेम नगर नै चली गई सै, अर लबोना के दक्षिण की और सै, उस म्ह हर साल यहोवा का एक त्यौहार मान्या जावै सै।" 20 ज्यांतै उननै बिन्यामीनियाँ तै यो हुकम दिया, "थम जाकै दाख की बारियां के बीच घात लगाये बैठ्ठे रहो, 21 अर देखदे रहो; अर जै शीलो नगर की छोरी नाचण नै लिकड़ै, तो थम दाख की बारियां तै लिकड़कै शीलो नगर की छोरियाँ म्ह तै अपणी-अपणी पत्नी बणाण खात्तर पकड़कै बिन्यामीन के क्षेत्र म्ह चले जाईयो। 22 अर जिब उनके पिता या भाई म्हारे धोरै झगड़ण नै आवैंगे, फेर हम उनतै कहवागें, ‘अनुग्रह करकै उननै म्हारे तै दे द्यो, क्यूँके लड़ाई के बखत हमनै उन म्ह तै एक-एक कै खात्तर जनान्नी न्ही बचाई; अर थम माणसां नै तो उनका ब्याह न्ही करया, न्ही तो थम इब दोषी ठहरदे।’" 23 फेर बिन्यामीनियाँ नै इसाए करया, यानिके उन ताहीं अपणी गिणती कै मुताबिक उन नाचण आळियाँ म्ह तै पकड़कै जनानियाँ ले ली; फेर अपणे हिस्से म्ह बोहड़गे, अर नगरां नै बसाकै उन म्ह रहण लाग्गे। 24 उसे बखत इस्राएली भी ओड़ै तै चालकै अपणे-अपणे गोत्र अर अपणे-अपणे घराने म्ह गए, अर ओड़ै तै वे अपणे-अपणे निज हिस्सा म्ह गए।
25 उन दिनां म्ह इस्राएलियाँ का कोए राजा ना था; जिसनै जो ठीक लाग्गै था वोए वो करै था।