तोला अर याईर के चरित्र
1 अबीमेलेक कै मरण कै बाद इस्राएल नै छुड़ाण कै खात्तर तोला नाम का एक इस्साकारी उठ्या, वो दोदो का पोत्ता अर पूआ का बेट्टा था; अर एप्रैम के पहाड़ी देश के शामीर नगर म्ह रहवै था। 2 वो तेईस साल ताहीं इस्राएल का न्याय करदा रह्या। फेर मर ग्या, अर उस ताहीं शामीर म्ह माट्टी दी गई।
3 उसकै बाद गिलादी याईर उठ्या, वो बाईस साल ताहीं इस्राएल का न्याय करदा रह्या। 4 अर उसके तीस बेट्टे थे जो गधियाँ के तीस बच्चयां पै सवार होया करैं थे; अर उनके तीस नगर भी थे जो गिलाद देश म्ह सैं, अर आज ताहीं हब्बोत्याईर कुह्वावै सैं। 5 अर याईर मर गया, अर उस ताहीं कामोन म्ह माट्टी दी गई।
6 फेर इस्राएलियाँ नै यहोवा की नजर म्ह बुरा करया, यानिके बाल देवत्यां अर अश्तोरेत देवियाँ अर अराम, सीदोन, मोआब, अम्मोनियाँ, अर पलिश्तियाँ के देवत्यां की उपासना करण लाग्गे; अर यहोवा ताहीं त्याग दिया, अर उसकी उपासना ना करी। 7 फेर यहोवा का गुस्सा इस्राएल पै भड़क्या, अर उसनै उनतै पलिश्तियाँ अर अम्मोनियाँ10:7 यहोवा नै उन ताहीं पलिश्तियाँ अर अम्मोनियाँ के हाथां हरा दिया के अधीन कर दिया, 8 अर उस साल ये इस्राएलियाँ नै सतान्दे अर पीसदे रहे। बलके यरदन नदी पार एमोरियां के देश गिलाद म्ह रहणआळे सारे इस्राएलियाँ पै अठारह साल ताहीं अंधेर करदे रहे। 9 अम्मोनी यहूदा अर बिन्यामीन तै अर एप्रैम के घराने तै लड़ण नै यरदन पार जावैं थे, उरै ताहीं के इस्राएल बड़े संकट म्ह पड़ग्या। 10 फेर इस्राएलियाँ नै न्यू कहकै यहोवा की दुहाई दी, "हमनै जो अपणे परमेसवर ताहीं त्याग कै बाल देवत्यां की उपासना करी सै, यो हमनै तेरै बिरुध्द महापाप करया सै।" 11 यहोवा नै इस्राएलियाँ तै कह्या, "के मन्नै थारै ताहीं मिस्रियाँ, एमोरियां, अम्मोनियाँ, अर पलिश्तियाँ के हाथ तै ना छुड़ाया था? 12 फेर जिब सीदोनी, अर अमालेकी, अर माओनी माणसां नै थारे पै अंधेर करया; अर थमनै मेरी दुहाई दी, फेर मन्नै थारै ताहीं उनके हाथ तै छुड़ाया। 13 फेर भी थमनै मेरे ताहीं त्याग कै पराए देवत्यां की उपासना करी सै; ज्यांतै मै फेर थमनै ना छुड़ाऊँगा। 14 जाओ, अपणे चुणे होए देवत्यां की दुहाई द्यो; थारे संकट के बखत वोए थमनै छुड़ावै।" 15 इस्राएलियाँ नै यहोवा तै कह्या, "हमनै पाप करया सै; ज्यांतै जो किमे तेरी दृष्टि म्ह भला हो वोए म्हारे तै कर; पर इब्बे हमनै छुड़ा।" 16 फेर वे पराए देवता नै अपणे बिचाळै तै दूर करकै यहोवा की उपासना करण लाग्गे; अर वो इस्राएलियाँ के कष्ट के कारण दुखी होया।
17 फेर अम्मोनियाँ नै कठ्ठे होकै गिलाद म्ह अपणे डेरे गेरे; अर इस्राएलियाँ नै भी कठ्ठे होकै मिस्पा म्ह अपणे डेरे गेरे। 18 फेर गिलाद के हाकिम एक दुसरे तै कहण लाग्गे, "जो कोए माणस अम्मोनियाँ तै लड़ाई की शरुआत करैगा? वोए गिलाद के सारे निवासियां का प्रधान ठहरैगा।"