न्यायियों 17

मीका का मूर्तिपूजा करणा

1 एप्रैम गोत्र के पहाड़ी देश म्ह मीका नाम का एक माणस था। 2 उसनै अपणी माँ तै कह्या, "जो ग्यारह सौ टुकड़े चाँदी*17:2 लगभग 13 किलोग्राम चाँदी तेरे तै ले लिए गये थे, जिनके बारै म्ह तन्‍नै मेरे सुणदे भी श्राप दिया था, वे मेरे धोरै सैं; मन्‍नै ए उन ताहीं ले लिया था।" उसकी माँ नै कह्या, "मेरे बेट्टे पै यहोवा की और तै आशीष हो।" 3 जिब उसनै वे ग्यारह सौ टुकड़े चाँदी अपणी माँ ताहीं बोहड़ा दिए; फेर उसकी माँ नै कह्या, "मै अपणी और तै अपणे बेट्टे कै खात्तर यो रुपया यहोवा नै जरुर अर्पण करुँ सूं ताके उसतै एक मूर्ति खोदकै, और दुसरी ढाळकै बणाई जावै, इस करकै इब मै वो तन्‍नै बोहड़ा देऊँ सूं।" 4 जिब उसनै वा रुपया अपणी माँ तै वापस दिया, फेर माँ नै दो सौ टुकड़े ढलवैये ताहीं दिया, अर उसनै उनतै एक मूर्ति खोदकै, और दुसरी ढाळकै बणाई; अर वे मीका के घर म्ह रहीं। 5 मीका के धोरै एक देवस्थान था, फेर उसनै एक एपोद, अर कई एक गृहदेवता बणवाए; अर अपणे एक बेट्टे का संस्कार करकै उसतै अपणा पुरोहित ठहरा लिया 6 उन दिनां म्ह इस्राएलियाँ का कोए राजा ना था; जिसनै जो ठीक लाग्गै था वोए वो करै था।

7 यहूदा गोत्र के कुल का एक जवान लेवीय गोत्र का यहूदा के बैतलहम नगर म्ह परदेशी होकै रहवै था। 8 वो यहूदा के बैतलहम नगर तै ज्यांतै लिकड़या, के जित्त किते जगहां मिलै ओड़ै जा रहवै। चाल्दे-चाल्दे वो एप्रैम के पहाड़ी देश म्ह मीका के घर पै आ लिकड़या। 9 मीका नै उसतै पूछ्या, "तू कित्त तै आवै सै?" उसनै कह्या, "मै तो यहूदा के बैतलहम तै आया होया एक लेवीय सूं, अर ज्यांतै चाल्या जाऊँ सूं, के जित्त किते ठिकाणा मिलै ओड़ैए रहूँ।" 10 मीका नै उसतै कह्या, "मेरे गैल रहकै मेरे खात्तर पिता अर पुरोहित बण, अर मै तन्‍नै हर साल दस टुकड़े रपिये, अर एक जोड़ा कपड़ा, अर भोजनवस्तु दिया करुँगा," फेर वो लेवीय भित्तर गया। 11 अर वो लेवीय उस माणस के गैल रहण तै खुश होया; अर वो जवान उसके गैल बेट्टा सा बण्या रह्या। 12 फेर मीका नै उस लेवीय का संस्कार करया, अर वो जवान उसका पुरोहित होकै मीका के घर म्ह रहण लाग्या। 13 अर मीका सोच्‍चै था, के इब मै जाणु सूं के यहोवा मेरा भला करैगा, क्यूँके मन्‍नै एक लेवीय ताहीं अपणा पुरोहित राख्या सै।