न्यायियों 8

मिद्यानियाँ का पूरी तरियां हार जाणा

1 फेर एप्रैमी माणसां नै गिदोन तै कह्या, "तन्‍नै म्हारे गैल इसा बरताव क्यूँ करया सै, के जिब तू मिद्यान तै लड़ण नै चाल्या जद म्हारे ताहीं न्ही बुलवाया?" अंत म्ह उननै उसतै बड़ा झगड़ा करया। 2 उसनै उनतै कह्या, "मन्‍नै थारै तरियां भला इब करया ए के सै? के एप्रैम की छोड्डी होई दाख भी अबीएजेर की सारी फसल तै आच्छी न्ही सै? 3 थारे ए हाथां म्ह परमेसवर नै ओरेब अर जेब नाम के मिद्यान के हाकिमां ताहीं कर दिया; फेर थारे बराबर मै करे के सक्या?" जिब उसनै या बात कही, फेर उनका जी उसकी और तै ठण्डा होग्या।

4 फेर गिदोन अर उसकै गैल तीन सौ माणस, जो थके-हारे थे फेर भी खदेड़दे ए रहे, यरदन कै पार होगे। 5 फेर उसनै सुक्‍कोत नगर के माणसां तै कह्या, "मेरै पाच्छै इन आण आळयां नै रोट्टी द्यो, क्यूँके ये थके-हारे सैं; अर मै मिद्यान के जेबह अर सल्मुन्‍ना नाम के राजयां का पिच्छा करण लाग रह्या सूं।" 6 सुक्‍कोत के हाकिमां नै जवाब दिया, "के राजा जेबह अर राजा सल्मुन्‍ना तेरे हाथ म्ह पड़ चुके सैं, के हम तेरी सेना नै रोट्टी देवां?" 7 गिदोन नै कह्या, "जिब यहोवा जेबह अर सल्मुन्‍ना नै मेरे हाथ म्ह कर देवैगा, फेर मै इस बात के कारण थमनै जंगळ के कटिले अर बिच्छु दरखतां तै नुचवाऊँगा।" 8 ओड़ै तै वो पनूएल म्ह गया, अर ओड़ै के माणसां तै इसीए बात कही; अर पनूएल के माणसां नै सुक्‍कोत के माणसां का सा जवाब दिया। 9 उसनै पनूएल के माणसां तै कह्या, "जिब मै सही-सलामत तै लौट आऊँगा, फेर इस गुम्मट नै ढ़ा दियुँगा।"

10 राजा जेबह अर राजा सल्मुन्‍ना तो कर्कोर नगर म्ह थे, अर उनकै गैल कोए पन्द्रह हजार माणसां की सेना थी, क्यूँके पूर्वियाँ की सारी सेना म्ह तै उतने ए रहगे थे; अर जो मारे गए थे वे एक लाख बीस हजार हथियार-बन्द थे। 11 फेर गिदोन नै नोबह गाम अर योगबहा गाम के पूर्व की और डेरयां म्ह रहण आळयां के रास्ता म्ह चढ़कै उस सेना ताहीं जो निडर पड़ी थी मार लिया। 12 अर जिब जेबह अर सल्मुन्‍ना भाज्जे, फेर उसनै उनका पिच्छा करकै मिद्यानियाँ के उन दोन्‍नु राजयां यानिके जेबह अर सल्मुन्‍ना ताहीं पकड़ लिया, अर सारी सेना म्ह भगदड़ मचा दी। 13 अर योआश का बेट्टा गिदोन हेरेस नाम की चढ़ाई पै तै लड़ाई तै बोहड़या। 14 अर उसनै सुक्‍कोत के एक जवान माणस ताहीं पकड़कै उसतै पूछ्या, अर उसनै सुक्‍कोत के सत्तर हाकिमां अर बूढ़े माणसां के नाम लिखवाए।

15 फेर वो सुक्‍कोत के माणसां कै धोरै जाकै कहण लाग्या, "जेबह अर सल्मुन्‍ना नै देक्खो, जिनकै बारै म्ह थमनै न्यू कहकै मेरे ताहीं चिढ़ाया था, के जेबह अर सल्मुन्‍ना इब्बे तेरे हाथ म्ह सैं, के हम तेरे थके-माँदे माणसां नै रोट्टी देवां?" 16 फेर उसनै उस नगर के बूढ़े माणसां ताहीं पकड्या, अर जंगळ के कटिले अर बिच्छु पेड़ लेकै सुक्‍कोत के माणसां ताहीं सजा दी। 17 अर उसनै पनूएल के गुम्मट ताहीं ढ़ा दिया, अर उस नगर के माणसां ताहीं घात करया।

18 फेर उसनै जेबह अर सल्मुन्‍ना तै पूच्छया, "जो माणस थमनै ताबोर पै घात करे थे वे कित्त सै?" उननै जवाब दिया, "जिसा तू उसाए वे भी थे, यानिके एक-एक का रूप राजकुमार का सा था।" 19 गिदोन नै कह्या, "वे तो मेरे भाई, बलके मेरे सगे भाई थे; यहोवा के जीवन की कसम, जै थमनै उन ताहीं जिन्दा छोड्या होन्दा, तो मै थमनै घात न्ही करदा।" 20 फेर उसनै अपणे जेठ्ठे बेट्टे यतेरे तै कह्या, "उठकै इननै घात कर।" पर जवान नै अपणी तलवार न्ही खींची, क्यूँके वो उस बखत ताहीं छोरा ए था, ज्यांतै वो डर ग्या। 21 फेर जेबह अर सल्मुन्‍ना नै कह्या, "तू उठकै म्हारै पै प्रहार कर; क्यूँके जिसा माणस हो, उसीए उसकी ताकत भी होगी।" फेर गिदोन नै उठकै जेबह अर सल्मुन्‍ना ताहीं घात करया; अर उनके ऊँटां के गळयाँ के चन्द्रहार ले लिये।

22 फेर इस्राएल के माणसां नै गिदोन तै कह्या, "तू म्हारे उप्पर राज कर, तू अर तेरा बेट्टा अर पोत्ता भी राज करै; क्यूँके तन्‍नै मेरे ताहीं मिद्यान के हाथ तै छुड़ाया सै।" 23 गिदोन नै उनतै कह्या, "मै थारे उप्पर राज न्ही करुँगा, अर ना मेरा बेट्टा थारे उप्पर राज करैगा; यहोवा ए थारै पै राज करैगा।" 24 फेर गिदोन नै उनतै कह्या, "मै थारै तै किमे माँगू सूं; यानिके थम मन्‍नै अपणी-अपणी लूट म्ह की बालियाँ द्यो। वो तो इश्माएल के वंशज थे। ये मर्द कान्‍नां म्ह सोन्‍ने की बालियाँ पैहरा करां थे।)" 25 उननै कह्या, "जरुर हम देवांगे।" फेर उननै कपड़ा बिछाकै उस म्ह अपणी-अपणी लूट म्ह तै लिकाड़कै बालियाँ दे दी। 26 जो सोन्‍ने की बालियाँ उसनै माँग ली उनका तौल एक हजार सात सौ शेकेल*8:26 एक हजार सात सौ शेकेल बीस किलो होया; अर उन ताहीं छोड़ चन्द्रहार, झुमके, अर बैंगणी रंग के कपड़े जो मिद्यानियाँ के राजा पैहरे थे, अर उनके ऊँटां के गळयाँ की जंजीर। 27 उनका गिदोन नै एक एपोद बणवाकै अपणे ओप्रा नाम के नगर म्ह धरया; अर सारा इस्राएल ओड़ै व्यभिचारिणी की तरियां उसकै पाच्छै हो लिया, अर वो गिदोन अर उसके घरान्‍ने कै खात्तर फंदा ठहरया। 28 इस तरियां मिद्यान इस्राएलियाँ तै दब गया, अर फेर सिर न्ही ठाया। अर गिदोन के जीवन भर यानिके चाळीस साल तक देश चैन तै रह्या।

29 योआश का बेट्टा यरूब्बाल जाकै अपणे घर म्ह रहण लाग्या। 30 अर गिदोन के सत्तर बेट्टे पैदा होए, क्यूँके उसकी घणी पत्नियाँ थी। 31 अर उसकी जो एक रखैल शेकेम म्ह रहवै थी उसतै एक बेट्टा पैदा होया, अर गिदोन नै उसका नाम अबीमेलेक धरया। 32 योआश का बेट्टा गिदोन पूरे बुढ़ापे म्ह मर ग्या, अर अबीएजेरियाँ के ओप्रा नाम के गाम म्ह उसके पिता योआश की कब्र म्ह उस ताहीं माट्टी दी गई।

33 गिदोन के मरदे ए इस्राएली भटकगे, अर व्यभिचारिणी की तरियां बाल देवत्यां कै पाच्छै हो लिए, अर बाल-बरीत ताहीं अपणा देवता मान लिया। 34 अर इस्राएलियाँ नै अपणे परमेसवर यहोवा ताहीं, जिसनै उन ताहीं च्यांरु और के सारे दुश्मनां के हाथ तै छुड़ाया था, याद न्ही राख्या; 35 अर ना उन ताहीं यरूब्बाल यानिके गिदोन की उस सारी भलाई कै मुताबिक जो उसनै इस्राएलियाँ कै गैल करी थी उसके घरान्‍ने तै दया दिखाई।