1 इस्राएलियाँ म्ह तै जितने कनान म्ह की लड़ाईयाँ म्ह शामिल न्ही होए थे, उननै परखण कै खात्तर यहोवा नै इन जात्तां ताहीं देश म्ह ज्यांतै रहण दिया; 2 ताके सारी पीढ़ी के इस्राएलियाँ म्ह तै जो लड़ाई नै पैहला न्ही जाणै थे वे सीखै, अर जाण लें, 3 यानिके पाँच सरदारां समेत पलिश्तियाँ, अर सारे कनानियाँ, अर सीदोनियां, अर बालहेर्मोन नाम के पहाड़ तै लेकै हमात की तराई तक लबानोन पर्वत म्ह रहणआळे हिब्बियाँ नै। 4 ये ज्यांतै रहण पावै के इनके जरिये इस्राएलियाँ की बात म्ह परीक्षा हो, के जो हुकम यहोवा नै मूसा के जरिये उनकै पूर्वजां ताहीं दिये थे, उननै वे मान्‍नैगें या न्ही। 5 ज्यांतै इस्राएली कनानियाँ, हित्तियाँ, एमोरियां, परिज्जियाँ, हिब्बियाँ, अर यबूसियाँ के बीच म्ह बसगे; 6 फेर वे उनकी बेट्टी ब्याह म्ह लेण लाग्गे, अर अपणी बेट्टियाँ नै उनके बेट्यां ताहीं ब्याह म्ह देण लाग्गे; अर उनके देवत्यां की भी उपासना करण लाग्गे।

7 इस तरियां इस्राएलियाँ नै यहोवा की नजर म्ह बुरा करया, अर अपणे परमेसवर यहोवा नै भूलकै बाल अर अशेरा नाम की देवी देवत्यां की उपासना करण लाग्गे। 8 फेर यहोवा का छो इस्राएलियाँ पै भड़क्या, अर उसनै उन ताहीं* अरम्नहरैम के राजा कूशन रिश्आतइम के अधीन कर दिया; सो इस्राएली आठ साल तक कूशन रिश्आतइम के अधीन म्ह रहे। 9 फेर इस्राएलियाँ नै यहोवा की दुहाई दी, अर उसनै इस्राएलियाँ के छुटकारै कै खात्तर कालेब के छोट्टे भाई ओत्नीएल नाम के कनजी के बेट्टे ताहीं ठैहराया, अर उसनै उन ताहीं छुड़ाया। 10 उस म्ह यहोवा का आत्मा समाया, अर वो इस्राएलियाँ का न्यायी बणग्या, अर लड़ण नै लिकड़या, अर यहोवा नै अराम के राजा कूशन रिश्आतइम ताहीं उसके हाथ म्ह कर दिया; अर वो कूशन रिश्आतइम पै जयवन्त होया। 11 फेर चाळीस साल ताहीं देश म्ह शान्ति बणी रही। फेर कनजी का बेट्टा ओत्नीएल मर ग्या।

12 फेर इस्राएलियाँ नै फेर यहोवा की नजर म्ह बुरा करया; अर यहोवा नै मोआब के राजा एग्लोन ताहीं इस्राएल पै प्रबल करया, क्यूँके उननै यहोवा की नजर म्ह बुरा करया था। 13 ज्यांतै उसनै अम्मोनियाँ अर अमालेकियाँ ताहीं अपणे धोरै कठ्ठा करया, अर जाकै इस्राएल ताहीं मार लिया; अर खजूरआळे नगर की सम्पत्ति पै कब्जा कर लिया। 14 फेर इस्राएली अठारह साल ताहीं मोआब के राजा एग्लोन के अधीन म्ह रहे।

15 फेर इस्राएलियाँ नै यहोवा की दुहाई दी, अर उसनै गेरा के बेट्टे एहूद नाम के एक बिन्‍यामीन ताहीं उनका छुड़ाण आळा ठैहराया; वो खबची था। इस्राएलियाँ नै उसे के हाथ तै मोआब के राजा एग्लोन कै धोरै कुछ भेंट भेज्जी। 16 एहूद नै एक हाथ लाम्बी एक दोधारी तलवार बणवाई थी, अर उसनै उस ताहीं कपड़यां कै तळै अपणी दाहिनी जाँघ पर लटका लिया। 17 फेर वो उस भेंट नै मोआब के राजा एग्लोन के धोरै जो घणा मोट्टा माणस था लेग्या। 18 जिब वो भेंट नै दे चुक्या, फेर भेंट के ल्याण आळे ताहीं विदा करया। 19 पर वो आप गिलगाल के धोरै की खुदी होई मूरतां के लोवै बोहड़ ग्या, अर एग्लोन कै धोरै सन्देसा भेज्या, "हे राजा, मन्‍नै तेरै तै एक भेद की बात कहणी सै।" फेर राजा नै कह्या, "थोड़ी देर खात्तर बाहर जाओ।" फेर जितने माणस उसकै धोरै हाजिर थे वे सारे बाहर चले गए। 20 फेर एहूद उसकै धोरै गया; वो तो अपणी एक हवादार अटारी म्ह एक्ला बैठा था। एहूद नै कह्या, "परमेसवर की और तै मन्‍नै तेरै तै एक बात कहणी सै।" फेर वो गद्दी पै तै उठ खड्या होया। 21 इतणे म्ह एहूद नै अपणा खब्बा हाथ बढ़ाकै अपणी दाहिनी जाँघ पै तै तलवार खींचकै उसकी पेट म्ह घुसेड़ दी; 22 अर तलवार कै बाद मूठ भी बैठगी, अर तलवार चर्बी म्ह धँस्सी रही, क्यूँके उसनै तलवार ताहीं उसके पेट म्ह तै ना लिकाड़या; बलके वा उसके आर-पार लिकड़ गई। 23 फेर एहूद छज्जे तै लिकड़कै बाहर गया, अर अटारी के किवाड़ खींचकै उन ताहीं बन्द करकै ताळा लगा दिया।

24 उसके लिकड़कै जान्दे ए राजा के दास आए, तो के देक्खै सैं, के अटारी के किवाड़ां म्ह ताळा लागरया सै; इस करकै वे बोल्‍ले, "जरुर वो हवादार कोठड़ी म्ह लघुशंका करदा होवैगा।" 25 वे बाट देखदे-देखदे थकगे; फेर यो देखकै के वो अटारी के किवाड़ न्ही खोल्दा, उननै चाबी लेकै किवाड़ खोल्‍ले तो के देख्या, के उनका स्वामी धरती पै मरया पड़या सै।

26 जिब तक वे सोच विचार कर ए रहे थे जिब ताहीं एहूद भाज लिकड़या, अर खुदी होई मूरतां की परली ओड़ होकै सेइरे म्ह जाकै शरण लेई। 27 ओड़ै पोहचकै उसनै एप्रैम के पहाड़ी देश म्ह नरसिंगा फूँक्या; फेर इस्राएली उसकै गैल होकै पहाड़ी देश तै उसकै पाच्छै-पाच्छै नीच्‍चै गए। 28 अर उसनै उनतै कह्या, "मेरै पाच्छै-पाच्छै चाल्‍ले आओ; क्यूँके यहोवा नै थारे मोआबी दुश्मनां नै थारे हाथ म्ह कर दिया सै।" फेर उननै उसके पाच्छै-पाच्छै जाकै यरदन के घाटां ताहीं जो मोआब देश की और तै ले लिया, अर किसे ताहीं उतरण न्ही दिया। 29 उस बखत उननै लगभग दस हजार मोआबियाँ ताहीं मार गेरया; वे सारे के सारे हष्ट-पुष्ट अर शूरवीर थे, पर उन म्ह तै एक भी न्ही बच्या। 30 इस तरियां उस बखत मोआब इस्राएल के हाथ कै तळै दब ग्या। फेर अस्सी साल ताहीं देश म्ह शान्ति बणी रही। 31 उसकै बाद अनात का बेट्टा शमगर होया, उसनै छः सौ पलिश्ती माणसां ताहीं बळध के पैने तै मार गेरया; इस कारण वो भी इस्राएल का छुड़ाण आळा होया।