शिमशोन अर दलीला
1 एक दिन फेर शिमशोन गाज़ा नगर नै गया, अर ओड़ै एक वेश्या नै देखकै उसके धोरै गया। 2 जिब गाज़ावासियां नै इसकी खबर मिली के शिमशोन उरै आया सै, फेर उननै उस ताहीं घेर लिया, अर रात भर नगर के फाटक पै उसकी घात म्ह लाग्गे रहे; अर यो कहकै रात भर चुपचाप रहे, के सुबेर होन्दे ए हम उसनै घात करांगे। 3 पर शिमशोन आध्धी रात ताहीं पड़या रह्या, अर आध्धी रात नै उठकै, उसनै नगर के फाटक के दोन्नु पल्यां अर दोन्नु बाजुआं नै पकड़कै बेंड़यां समेत उखाड़ लिया, अर अपणे कंध्यां पै धरकै उननै उस पहाड़ की चोट्टी पर ले गया, जो हेब्रोन शहर कै स्याम्ही सै। 4 इसकै बाद वो सोरेक नाम की घाटी म्ह रहण आणी दलीला नाम की एक जनान्नी तै प्रीति करण लाग्या। 5 फेर पलिश्तियाँ के सरदारां नै उस जनान्नी कै धोरै जा के कह्या, "तू उसनै फुसळा कै पूछ के उसके महाबल का भेद के सै, अर कूण सा उपाय करकै हम उसपै इसे प्रबल होवां, के उसनै बाँधकै दाब्बे राक्खां; फेर हम तन्नै ग्यारह-ग्यारह सौ टुकड़े चाँदी16:5 लगभग 13 किलोग्राम चाँदी देवांगे।" 6 फेर दलीला नै शिमशोन तै कह्या, "मन्नै बता दे के तेरे बड़े बल का भेद के सै, अर किस तरियां तै कोए तन्नै बाँधकै राख सकै सै।" 7 शिमशोन नै उसतै कह्या, "जै मै सात इसी नई-नई ताँत्यां तै बाँध्या जाऊँ जो सुखाई ना गई हों, तो मेरा बल घट जावैगा, अर मै साधारण माणस जिसा हो जाऊँगा।" 8 फेर पलिश्तियाँ के सरदार दलीला कै धोरै इसी नई-नई सात ताँत16:8 धनुष पै बांध्या होया धागा लेगे जो सुखाई ना गई थी, अर उनतै उसनै शिमशोन ताहीं बाँध्या। 9 उसकै धोरै कुछ माणस कोठड़ी म्ह घात लगाऐ बैठ्ठे थे। फेर उसनै उसतै कह्या, "हे शिमशोन, पलिश्तियाँ के सरदार तेरी घात म्ह सैं!" फेर उसनै ताँत्यां16:9 धनुष पै बांध्या होया धागा ताहीं इसा ताेड़या जिसा सण का सूत आग तै छुन्दे ए टूट जावै सै। अर उसके बल का भेद ना खुल्या।
10 फेर दलीला नै शिमशोन तै कह्या, "सुण, तन्नै तो मेरे ताहीं छल करया, अर झूठ कह्या सै; इब मन्नै बता दे के तू किस चीज तै बन्ध सकै सै।" 11 उसनै उसतै कह्या, "जै मै इसी नई-नई रस्सियाँ तै जो किसे काम म्ह ना आई हों कसकै बाँध्या जाऊँ, तो मेरा बल घट जावैगा, अर मै साधारण माणस के बराबर हो जाऊँगा।" 12 फेर दलीला नै नई-नई रस्सी लेकै अर उस ताहीं बाँधकै कह्या, "हे शिमशोन, पलिश्तियाँ के सरदार तेरी घात म्ह सैं!" अर कुछ माणस उस कोठड़ी म्ह घात लगाऐ होए थे। फेर उसनै रस्सियाँ ताहीं सूत के बराबर अपणी बाजुआं पै तै तोड़ गेरया। 13 फेर दलीला नै शिमशोन तै कह्या, "इब तक तू मेरे तै छल करदा, अर झूठ बोल्दा आया सै; इब मन्नै बता दे के तू किसतै बन्ध सकै सै?" उसनै कह्या, "जै तू मेरे सिर की सात्तु लटां नै ताणे म्ह बुणे तो बन्ध सकूँगा।" 14 आखर उसनै उस ताहीं खूँटी तै जकड्या। फेर उसतै कह्या, "हे शिमशोन, पलिश्तियाँ के सरदार तेरी घात म्ह सैं!" फेर वो नींद तै चौंक उठ्या, अर खूँटी ताहीं उखाड़ कै उसनै ताणे समेत ले गया।
15 फेर दलीला नै उसतै कह्या, "तेरा मन तो मेरे तै न्ही लाग्या, फेर तू क्यूँ कहवै सै, के मै तेरे तै प्यार करुँ सूं? तन्नै यो तीन्नु बार मेरे ताहीं छल करया, अर मेरे तै न्ही बताया के तेरी घणी ताकत का भेद के सै।" 16 इस तरियां जिब उसनै हर दिन बात करदे-करदे उस ताहीं तंग करया, अर उरै ताहीं जिद करी, के उसकी नाक्कां म्ह दम आ ग्या, 17 फेर उसनै अपणे मन का सारा भेद खोलकै उसतै कह्या, "मेरे सिर पै छुरा कदे भी न्ही फिरया, क्यूँके मै माँ के पेट ए तै परमेसवर का नाज़ीर सूं, जै मै मुँण्डयां जाऊँ, तो मेरी ताकत इतणी घट जावैगी, के मै साधारण माणस सा हो जाऊँगा।"
18 यो देखकै, के उसनै अपणे मन का सारा भेद मेरे ताहीं बता दिया सै, दलीला नै पलिश्तियाँ के सरदारां के धोरै सन्देसा भेज्या, "इब की बार फेर आओ, क्यूँके उसनै अपणे मन का सारा भेद मेरे ताहीं बता दिया सै।" फेर पलिश्तियाँ के सरदार हाथ म्ह रुपया लिए होए उसके धोरै गए। 19 फेर उसनै उस ताहीं अपणे घुटन्या पै सुळाए राख्या; अर एक माणस बुलवाकै उसके सिर की सात्तु लट मुँण्डवा दी। अर वो उसनै दबाण लाग्गी, अर वो निर्बल होग्या। 20 फेर उसनै कह्या, "हे शिमशोन, पलिश्तियाँ के सरदार तेरी घात म्ह सैं!" फेर वो चौंककै सोच्चण लाग्या, "मै पैहले की तरियां बाहर जाकै झटकूँगा।" वो तो ना जाणै था, के यहोवा उसके गैल तै चल्या गया सै। 21 फेर पलिश्तियाँ नै उस ताहीं पकड़कै उसकी आँख फोड़ दी, अर उसनै गाज़ा नगर म्ह ले जाकै पीतळ की बेड़ियाँ तै जकड़ दिया; अर वो बन्दीगृह म्ह चाक्की पीसण लाग्या। 22 उसके सिर के बाळ मुँण्ड जाणकै बाद फेर बढ़ण लाग्गे। 23 फेर पलिश्तियाँ के सरदार अपणे दागोन नाम के देवता खात्तर बड़ा यज्ञ, अर आनन्द करण नै न्यू कहकै कठ्ठे होए, "म्हारे देवता नै म्हारे दुश्मन शिमशोन ताहीं म्हारे हाथ म्ह कर दिया सै।" 24 अर जिब माणसां नै उस ताहीं देख्या, फेर यो कहकै अपणे देवता की स्तुति करी, "म्हारे देवता नै म्हारे दुश्मन अर म्हारे देश का नाश करण आळे ताहीं, जिसनै म्हारे म्ह तै बोहत्तां ताहीं मार भी दिया, म्हारे हाथ म्ह कर दिया सै।" 25 जिब उनका मन मगन होग्या, फेर उननै कह्या, "शिमशोन ताहीं बुलवा ल्यो, के वो म्हारे खात्तर मनोरंजन करै।" ज्यांतै शिमशोन बन्दीगृह म्ह तै बुलवाया गया, अर उनकै खात्तर मनोरंजन करण लाग्या, अर खम्भ्यां के बीच खड़या कर दिया गया। 26 फेर शिमशोन नै उस छोरे तै जो उसका हाथ पकड़े था कह्या, "मेरे ताहीं उन खम्भ्यां नै, जिनतै घर सम्भळया होया सै छूण दे, के मै उस पर टेक लगाऊँ।" 27 वो घर तो जनान्नी अर माणसां तै भरया होया था; पलिश्तियाँ के सारे सरदार भी ओड़ै थे, अर छात पै कोए तीन हजार जनान्नी अर माणस थे, जो शिमशोन नै मनोरंजन करदे होए देख रहे थे।
28 फेर शिमशोन नै यो कहकै यहोवा की दुहाई दी, "हे प्रभु यहोवा, मेरी सुधि ले; हे परमेसवर, इब की बार मन्नै बल दे, के मै पलिश्तियाँ तै अपणी दोन्नु आँखां का एके बदला लूँ।" 29 फेर शिमशोन नै उन दोन्नु बीचआळे खम्भ्यां ताहीं जिनतै घर सम्भळया होया था, पकड़कै एक पै तो दाहिने हाथ तै अर दुसरे पै बाएँ हाथ तै जोर लगा दिया। 30 अर शिमशोन नै कह्या, "पलिश्तियाँ कै गैल मेरा प्राण भी जावै।" अर वो अपणा सारा जोर लगाकै झुक्या; फेर वा घर सारे सरदारां अर उस म्ह के सारे माणसां पै गिर पड़या। इस तरियां जिन ताहीं उसनै मरदे बखत मार गेरया वे उनतै भी घणे थे जिन ताहीं उसनै अपणी जिन्दगी भर म्ह मार गेरया था। 31 फेर उसके भाई अर उसके पिता के सारे घराने के माणस आए, अर उसनै ठाकै लेगे, अर सोरा अर एश्ताओल के बिचाळै उसके पिता मानोह की कब्र म्ह माट्टी दी। उसनै इस्राएल का न्याय बीस साल ताहीं करया था।