1 हाय धोक्खा करण आळी अर अशुद्ध अर अंधेर तै भरी होई यरुशलेम नगरी! 2 उसनै मेरी न्ही सुणी, उसनै फटकार तै भी न्ही मान्या, उसनै यहोवा पै भरोस्सा न्ही राख्या*, वो अपणे परमेसवर कै धोरै न्ही आई।

3 उस शहर के हाकिम गरजण आळे शेर ठहरे; उसके न्यायी साँझ नै शिकार करण आळे भेड़िये सैं जो सबेरै के खात्तर कुछ न्ही छोड़दे। 4 उसके भविष्यवक्ता बेकार बकण आळे अर धोक्खेबाज सैं, उसके याजकां नै पवित्रस्‍थान ताहीं अशुद्ध करया अर नियम-कायदे म्ह खींच-ताण करी सै। 5 यहोवा जो उसके बिचाळै म्ह सै, वो धर्मी सै, वो कुटिलता न्ही करैगा; वो अपणा न्याय हर सुबेरै प्रगट करै सै अर चूकदा न्ही; लेकिन कुटिल माणस नै शर्म आवै ए न्ही। 6 यहोवा कहवै सै, "मन्‍नै गैर जातियाँ ताहीं उरै तै नाश करया, के उनके कुण्यां आळे गुम्मट उजड़गे; मन्‍नै उनकी सड़कां ताहीं उरै तक सून्‍नी करया, के कोए उनपै न्ही चालदा; उनके नगर उरै ताहीं नाश होए के उन म्ह कोए माणस बलके कोए भी प्राणी न्ही रह्या।" 7 मन्‍नै कह्या, "इब तू मेरा भय मान्‍नैगी, अर मेरी ताड़ना अंगीकार करैगी जिसतै उसका निवास-स्थान उस सारया कै मुताबिक जो मन्‍नै ठहराणा था, नाश ना हो। पर वे सारे ढाळ के बुरे-बुरे काम कोशिश तै करण लाग्गे।"

8 इस कारण यहोवा* की या वाणी सै, "जिब ताहीं मै नाश करण नै ना उठूँ, जिब ताहीं थम मेरी बाट देखदे रहो*। मन्‍नै यो ठाण्या सै के जात-जात के अर राज्य-राज्य के माणसां नै मै कठ्ठा करुँ, के उनपै अपणे छो की आग पूरी तरियां तै भड़काऊँ; क्यूँके सारी धरती मेरी जळण की आग तै भस्म हो जावैगी।"

9 "उस बखत मै देश-देश कै माणसां तै एक नई अर शुद्ध भाषा बुलवाऊँगा, के वे सारे के सारे यहोवा तै प्रार्थना करैं, अर एक मन तै कंधे तै कंधा मिलाए होए उसकी सेवा करैं। 10 कूश* की नदी कै पार तै मेरे तै बिनती करण आळे उरै ताहीं के मेरै आस्सै-पास्सै होई प्रजा मेरे धोरै भेंट लेकै आवैगी।"

11 "उस दिन, तू अपणे सारे बड़े तै बड़े काम्मां तै जिननै करकै तू मेरे तै मुड़गी थी, फेर लज्जित न्ही होवैगी। उस बखत मै तेरे बिचाळै तै उननै दूर करुँगा जो अपणे घमण्ड म्ह आनन्द करै सै, अर तू मेरे पवित्र पर्वत पै फेर कदे घमण्ड न्ही करैगी।* 12 क्यूँके मै तेरे बीच म्ह दीन अर कंगाल माणसां का एक दल बचाए राखूँगा, अर वे यहोवा के नाम की शरण लेंगे। 13 इस्राएल के बचे होए माणस ना तो कुटिलता करैंगे अर ना झूठ बोलैगें, अर ना उनके मुँह तै छळ की बात लिकड़ैगी। वे चरैंगे अर आराम करैंगे, अर कोए उननै डराण आळा न्ही होगा।"*

14 हे सिय्योन की बेट्टी*, ऊँच्‍ची आवाज तै गा; हे इस्राएल के माणसों, जयजयकार कर! हे यरुशलेम के माणसों अपणे पूरे मन तै आनन्द कर, अर खुश हो! 15 यहोवा नै तेरी सजा दूर करदी* अर तेरे दुश्मनां ताहीं दूर कर दिया सै। इस्राएल का राजा यहोवा तेरे बीच म्ह सै, इस करकै तू फेर विपत्ति न्ही भोगैगी। 16 उस दिन यरुशलेम शहर तै न्यू कह्या जावैगा, "हे सिय्योन ना डरै, तेरे हाथ ढील्‍ले न्ही पड़ण पावैं। 17 तेरा परमेसवर यहोवा तेरे बीच म्ह सै, वो उद्धार करण म्ह पराक्रमी सै; वो तेरै कारण आनन्द तै मगन होवैगा, वो अपणे प्यार के मारे चुप रहवैगा; फेर ऊँच्‍ची आवाज तै गान्दा होया तेरै कारण मगन होगा।"

18 "जो माणसां नियत त्यौहारां म्ह शामिल ना होण कै कारण दुखी रहवैं सैं, उननै मै कठ्ठा करुँगा, क्यूँके वे तेरे सैं; अर उसकी नामधराई उननै बोझ जाण पड़ै सै। 19 उस बखत मै उन सारया तै जो तेरे ताहीं दुःख देवैं सैं, सही बरताव करुँगा। अर मै लंगड्यां नै चंगा करुँगा, अर धक्‍के तै लिकाड़े होया नै कठ्ठा करुँगा, अर जिनकी शर्म का जिक्र सारी पृथ्वी पै फैल्या सै, उनकी बड़ाई अर कीर्ति सारी जगहां फैलाऊँगा।* 20 उसे बखत मै थमनै ले जाऊँगा, अर उसे बखत मै थमनै कठ्ठा करुँगा; अर जिब मै थारै स्याम्ही थारी समृद्धि नै लौटा ल्याऊँगा, फेर धरती की सारी जातियाँ कै बीच म्ह थारी कीर्ति अर बड़ाई फैला दियुँगा," यहोवा का योए वचन सै।