1 फारस देशो रे राजा कुस्रू रे राज रे तीजे सालो दे, मां दानिय्येलो खे, जेसखे बेलतशस्सर बी बोलोए, परमेशरो रिया तरफा ते एक ओर दर्शण मिलेया। सन्देश सच्चा था, पर माखे समजणे खे बऊत कठण था। पर बादो ते मैं जो दर्शण देखेया था, तेतेरिया बजा ते से मेरी समजा दे आईगा। 2 तिना दिना दे आऊँ दानिय्येल तीऊँ अफ़्तेया तक शोग करदा रया। 3 तिना तीन अफ़्ते पूरे ऊणे तक, मैं ना तो स्वाद रोटी खाई ओर ना मास ओर शराब आपणे मुंए दे राखेया ओर ना आपणे शरीरो दे कोई तेल लगाया। 4 तेबे सालो रे पईले मीन्ने* रे चौबिये दिने जेबे आऊँ हिद्देकेल नाओं री नदिया रे कनारे पाँदे था, 5 तेबे मैं देखेया कि रेशमो रे टाल्ले पईनी की ओर ऊफाज़ देशो रे सबी ते शुद्ध सूईने रा लको दे फैंटा था।* 6 तेसरा शरीर फिरोजे जेड़ा चमकणे लगी रा था, तेसरी शक्ल बिजल़िया जेड़ी चमकणे लगी री थी, आखी बल़ी रिया आगी री लूपिया जेड़िया, बाँयी ओर पैर पीतल़ी जेड़े चमकणे लगी रे थे। जेबे से बोलो था, तो तेसरी आवाज बऊत ऊच्ची थी, जेड़े कई लोक कट्ठे बोलणे लगी रे ओ।* 7 से बस मैं दानिय्येले ई देखेया ओर मां साथले माणूंआ खे तेसरा कोई बी दर्शण नि ऊआ, पर सेयो अचाणक बऊत डरीगे ओर लूकणे खे नठीगे। 8 ईंयाँ आऊँ एस महान दर्शणो खे देखणे खे कल्ला ई रईगा। मेरी शक्ति खत्म ऊईगी, मेरा रंग पिऊँल़ा पड़ीगा, ओर मांदे कोई बी तागत नि रयी। 9 तेबे बी मैं तेस मर्दो रे बोलणे री आवाज सुणी ओर जेबे से माखे सुणेया, तेबे आऊँ मुंए रे पारे थाले पड़ीगा ओर गईरी नींजा दे जमीना दे त्वाणा पड़ेया दा रया।

10 केसी रे आथे आऊँ छूँएया। तिने आऊँ आपणे आथा ओर जानूआ रे पारे ऊबे खींजी ला। आऊँ डरो रे मारे कांबणे लगेया। 11 तेबे स्वर्गदूते माखे बोलेया, "ओ पाई दानिय्येल, ओर परमेशरो रे बऊत प्यारे मर्द, जो वचन आऊँ ताए बोलूँआ तिजी खे समजी लो ओर सीदा खड़ा ओ, कऊँकि आऊँ यबु तांगे पेजी राखेया।" जेबे तिने माखे ये बोलेया तेबे आऊँ खड़ा तो ऊईगा, पर कांबदा रया। 12 तेबे तिने माखे बोलेया, "ओ दानिय्येल, डर नि, कऊँकि पईले ई दिने जेबे तैं समजणे-बूजणे खे मन लगाया ओर आपणे परमेशरो सामणे आपू खे दीन कित्तेया, तेस ई दिने तेरी बिनती सुणी ली ओर आऊँ तेरिया ई प्रार्थना रिया बजा ते आई रा।* 13 फारसो रे राज्य री रक्षा करने वाल़े दूते इक्की दिन तक मेरा सामणा कित्तेया, पर मीकाएल जो परमेशरो रे परदान स्वर्गदूता बीचा ते ए, से मेरी मताद करने आया, इजी री खातर आऊँ फारसो रे राजेया गे रया। 14 ओर एबे आऊँ ताखे समजयाणे आई रा कि अन्तो रे दिना रे तेरे लोका री क्या दशा ऊणी, कऊँकि जो दर्शण तैं देखी राखेया, से कुछ दिन बाद पूरा ऊणा।" 15 जेबे से मां साथे इना गल्ला करी चुकेया, तेबे मैं आपणा मूँ थाले कित्तेया ओर चुप रया। 16 अचाणक तिने स्वर्गदूते, जो एकी माणूं जेड़ा दिशो था, मेरे ओठ छूँएं। तेबे आऊँ बोलणे जोगा ऊईगा, ओर मैं तेसखे बोलेया, "ओ स्वामी, मैं एक दर्शण देखेया, इजी री बजा ते आऊँ बऊत कमजोर ऊईगा, ओर आऊँ कांबणा बन्द नि करी सकदा।* 17 इजी री खातर आऊँ आपणे मालको रे सामणे खड़े दे एकी दासो जेड़ा ए, आऊँ तां साथे किंयाँ गल्ला करी सकुँ आ? मेरी तागत खत्म ऊईगी री ए। सई दे, आऊँ बड़ी मुश्किला ते साआ लणे लगी रा।" 18 एक स्वर्गदूत जो माणूंए जेड़ा दिशणे लगी रा था, तिने आऊँ फेर छूँएया। तिने माखे तागत दित्ती, 19 तिने बोलेया, "डर नि, परमेशर ताखे बऊत प्यार करोआ। ताखे शान्ति मिलदी रओ! तूँ मजबूत बण। मजबूत बण।" जेबे तिने मां साथे गल्ल कित्ती, तो तेबे आऊँ मजबूत बणी गा। मैं बोलेया, "बोल, मेरे स्वामी! तैं माखे तागत देई राखी ए।"* 20 तेबे तिने बोलेया, "क्या तूँ जाणेया कि आऊँ किजी बजा ते तांगे आई रा? एबे मां फारसो रे राजे* साथे लड़ने खे वापस ऊणा ओर जेबे आऊँ निकल़ोगा, तेबे यूनानो रा परदान* आऊणा।" 21 तिने बोलेया, "क्या तूँ जाणेया कि मैं आऊँ तांगे कऊँ आई रा? आऊँ तांगे सच्चाईया री कताबा दे लिखी रिया गल्ला बताणे आई रा। पर एबे माखे फारसो रे राज्य पाँदे शासन करने वाल़ी दुष्ट आत्मा रे खलाफ लड़ने खे वापस जाणा पड़ना। जेबे मां से अराणा तेते ते बाद यूनानो री रक्षा करने वाल़ा दुष्ट स्वर्गदूत प्रकट ऊणा ओर माखे से अराणा पड़ना। मीकाएल, जो तूँ इस्राएलो री रक्षा करने वाल़ा स्वर्गदूत ए, मेरी मताद करनी, पर मेरी मताद करने वाल़ा कोई ओर नि आ।"