दानिय्येल 2

नबूकदनेस्सरो रा सुफना

1 एकी राती बेबीलोनो दे आपणे राजो रे दूजे साले नबूकदनेस्सर राजे एक एड़ा सुफना देखेया जेते कि तेसरा मन बऊत ई बेचैन ऊईगा ओर तेतेरिया बजा ते से सई नि सकेया। 2 दूजे दिने प्यागा राजे आपणे ज्योतषी, तान्त्रिक, डाऊ ओर कसदी पण्डत आपू गे बुलाए। कऊँकि से पूली गा था कि तिने क्या सुफना देखेया था, इजी री खातर तिने बिनती कित्ती की सेयो तेसखे बताओ कि तिने क्या सुफना देखी राखेया था। जेबे सेयो आए ओर राजे रे सामणे आजीर ऊए, 3 तेबे राजे तिना खे बोलेया, "मैं एक सुफना देखी राखेया ओर मेरा मन बऊत बेचैन ए, आऊँ ये जाणना चाऊँआ कि एते सुफने रा मतलब क्या ए?" 4 तेबे कसदी ज्योतषिया रे मुखिये राजे खे अरामी पाषा दे बोलेया, "ओ राजा, तेरी उम्र लाम्बी ओ! आपणे दासा खे आपणा से सुफना बता जो तैं देखी राखेया। तेबे आसा तिजी रा मतलब ताखे बताणा।" 5 पर राजे कसदी ज्योतषिये खे ज्वाब दित्तेया, "मैं ये पक्का निश्चा करी ला दा ए कि तुसे माखे सुफना जरूर बताओ, ओर ये बी बताओ कि एतेरा क्या मतलब आ। जे तुसे एड़ा नि कित्तेया तो मां आपणे सिपाईया खे उक्कम देणा कि सेयो तुसा रे टुकड़े-टुकड़े करी देयो, ओर तुसा रे कअर पात्थरा रे टेर करी देणे। 6 पर जे तुसे माखे मेरा सुफना ओर तेतेरा मतलब दोनों बताई देयोगे तो मां तुसा खे बऊत किमती तोफे देणे ओर तुसा रा आदर बी बढ़ाणा। इजी री खातर एबे तुसे माखे मतलबो समेत सुफना बी बताओ।"

7 कसदी ज्योतषिये दूजी बार बोलेया, "ओ राजा, आपणे दासा आसा खे आपणा सुफना बताई दे तेबे आसा तिजी रा मतलब समजयाई देणा।" 8 राजे ज्वाब दित्तेया, "आऊँ पक्का जाणूंआ कि तुसे ये देखी की, कि राजे रे मुंए ते आज्ञा निकल़ी चूकी री, बखत बढ़ाणा चाओए। 9 इजी री खातर जे तुसे माखे सुफना नि बताओगे तो तुसा खे एक ई आज्ञा ए। कऊँकि तुसे सभा कित्ती ऊणी कि जदुओ तक बखत नि बदलोगा, तदुओ तक आसा राजे सामणे चूठिया गल्ला बोलणिया। इजी री खातर तुसे माखे सुफना बताओ, तेबे माखे पता लगी जाणा कि तुसे तिजी रा मतलब बी समजयाई सकोए।" 10 कसदी ज्योतषिये राजे खे बोलेया, "सारी तरतिया दे एड़ा कोई माणूं नि ए जो राजे रे मनो री गल्ला खे जाणी सको ओर तेतेखे पूरा करी सको ओर ना कोई एड़ा राजा या परदान या हाकिम कदी ऊआ जिने केसी ज्योतषी, तान्त्रिक, या कसदी पण्डता ते एड़ी कोई गल्ल पूछी ओ। 11 ओ राजा, जो गल्ल तूँ आसा ते पूछणे लगी रा से कठण ए। बस देवते ई ए जो एतेरे बारे दे राजे खे बताई सकोए। पर एते तरतिया पाँदे एड़ा कोई माणूं नि ए जो एतेरे बारे दे राजे खे बताई सकोआ।" 12 जेबे राजे यो गल्ला सुणिया ते से बाबेलो रे सबी ज्योतषी, तान्त्रिक, कसदी पण्डता ते बऊत ई रोषे ऊआ। तिने तिना सबी खे नाश करने री आज्ञा देईती। 13 तेबे राजे री ये आज्ञा पूरे देशो दे पऊँचाई। राज रे सारे ज्ञानी लोक मरने वाल़े थे; इजी री खातर राजे रे सिपाई दानिय्येल ओर तेसरे साथिया खे बी काणे खे टोल़ने लगी रे थे।

परमेशरो रे जरीये नबूकदनेस्सरो रे सुफने रा दसेया जाणा

14 तेबे दानिय्येले, राजे रे अंगरक्षका रे परदान अर्योको ते सोची-समजी की गल्ल-बात कित्ती, जो बेबीलोनो दे ज्ञानी मर्दा रा खून करने खे निकल़ेया था। 15 तिने राजे रे अंगरक्षका रे परदान अर्योको ते पूछेया, "राजे जल्दबाजिया दे एड़ी कठण आज्ञा कऊँ दित्ती? तेबे अर्योके दानिय्येलो खे जो कुछ ऊआ था से सब बताईता।" 16 तेबुई दानिय्येले मईलो दे राजे गे जाई की प्रार्थना कित्ती ओर बोलेया, "महाराज, माखे कोई बखत ठराओ, ताकि आऊँ तुसा रा सुफना ओर तेतेरा मतलब बताई सकुँ।" 17 तेबे दानिय्येल आपणे कअरे वापस गया ओर आपणे साथी हनन्याह, मीशाएल ओर अजर्याह खे सारा आल बताया। 18 मैं आपणे साथिया ते बिनती कित्ती की सेयो परमेशरो ते, जो स्वर्गो दे रओआ, प्रार्थना करो कि से आसा पाँदे दया करी की राजे रा सुफना ओर तेतेरा गुप्त मतलब आसा खे बताओ, ताकि आसे ओर बेबीलोनो रे ओर बुद्धिमान लोका खे काणे री सजा ना मिलो। 19 तेते ते बाद तेसा राती परमेशरे माखे एक दर्शण दित्तेया जिदे तिने तेस पेतो रा मतलब माखे दशेया। तेबे मैं स्वर्गो रे परमेशरो रा तन्यवाद कित्तेया।*2:19 अय्यू. 33:15, 16, गिण. 12:6 20 तिने बोलेया, "परमेशरो रा नाओं युगो-युगो तक तन्य ए; कऊँकि बुद्धि ओर पराक्रम सिर्फ तेसरे ईए।*2:20 अय्यू. 12:13 21 से बखत ओर ऋतुआ खे बदलणे वाल़ा ए, से ई राजेया खे तिना रे पदो ते टाओ आ। से दूजे राजेया खे राज करने देयोआ। अक्लमंद माणूंए खे अक्ल ओर समजणे वाल़ेया खे ज्ञान बी सेई देयोआ। 22 परमेशर ई गूढ़ ओर गुप्त गल्ला खे बताओआ, से जाणोआ कि न्हेरे दे क्या ए ओर तेस साथे सदा प्रयासा रओआ। 23 ओ मेरे पितरा रे परमेशर, आऊँ तेरा तन्यवाद ओर स्तुति करूँआ। तैं माखे बुद्धि ओर समज देई राखी; तैं मेरी प्रार्थना रा ज्वाब माखे दित्तेया ओर आसा गे बताया कि राजे खे क्या बोलणा ए।"

दानिय्येलो रे जरीये सुफने रा मतलब बताणा

24 तेबे दानिय्येले अर्योको गे, जो राजे बेबीलोनो रे ज्ञानी मर्दा रा नाश करने खे ठराया था, पीतरे जाई की बोलेया, "बेबीलोनो रे ज्ञानी मर्दा रा नाश नि कर, माखे राजे सामणे पीतरे लई चल, मां राजे रा सुफना ओर तेतेरा मतलब बताणा।" 25 तेबे अर्योक दानिय्येलो खे राजे सामणे फटाफट पीतरे लईगा। तिने राजे गे जाई की बोलेया, "यहूदा प्रदेशो रे गुलामा बीचा ते एक मर्द माखे मिली रा, जो राजे खे तेसरा सुफना ओर तेतेरा मतलब बताई सकोआ।" 26 राजा नबूकदनेस्सरे दानिय्येलो ते पूछेया जेसरा नाओं बेलतशस्सर बी था, "क्या तांदे इतणी सामर्थ आई कि जो सुफना मैं देखी राखेया, तिजी खे मतलब समेत मांगे बताई सके?" 27 दानिय्येले राजे खे ज्वाब दित्तेया, "जो पेतो री गल्ल राजा पूछोआ, से ना तो पण्डत, ना तान्त्रिक, ना ज्योतषी, ना आत्मा साथे गल्ला करने वाल़े राजे गे बताई सकोए, 28 पर स्वर्गो दे एक परमेशर ए जो सबी तरआ रे पेतो रिया गल्ला खे बताणे वाल़ा ए ओर तिने नबूकदनेस्सर राजे गे बताई राखेया कि आऊणे वाल़े दिना रे क्या-क्या ऊणे वाल़ा ए। तेरा सुफना जो तैं माँजे पाँदे लेटे दे देखेया ओर जो कुछ तैं सुफने रे देखी राखेया, से ये,*2:28 उत्प. 40:8 29 ओ राजा! जेबे तूँ माँजे पाँदे लेटी रा था, तेबे तूँ सोचणे लगेया कि आऊणे वाल़ा बखत केड़ा ऊणा? तेबे पेत खोलणे वाल़े परमेशरे तांगे बताईता कि क्या-क्या ऊणे वाल़ा ए।*2:29 आमो. 4:13 30 परमेशरे मांगे ये पेत इजी बजा ते नि बताया कि आऊँ ओरी सबी माणूंआ ते जादा अक्लमंद ए, पर बस इजी बजा ते बताया कि सुफने रा मतलब राजे गे बताऊँ ओर तूँ आपणे मनो दे सोची-समजी सके। 31 ओ राजा, तैं आपणे दर्शणो दे आपणे सामणे एक बड़ी ओर डराऊणी माणूंए री मूर्ति देखी। से बऊत चमकणे लगी री थी, ओर से डराऊणी ओर खतरनाक थी, 32 तेसा मूर्तिया रा सिर शुद्ध सूईने रा था, तेसा री छाती ओर बाँयी चाँदिए री थिया ओर तेसा रा पेट ओर पाट पीतल़ी रे, 33 मूर्तिया रे पैर लोए रे बणी रे थे। तेसा रे पैर कुछ तो लोए रे ओर कुछ माट्टिया रे बणी रे थे। 34 देखदे ई देखदे किने पाह्ड़ो ते एक बड़ा पात्थर तोड़ी की काडेया। पर ये काम किने बी माणूंए नि करी राखेया। पात्थर आपू तेसा मूर्तिया रे पैरा पाँदे जो लोए ओर माट्टिया रे थे लगेया, पात्थरे सेयो चूर-चूर करीते। 35 तेबे लोआ, माट्टी, पीतल़, चाँदी ओर सूईना बी चूर-चूर ऊईगे ओर तूपा रे बखते खल्याणो रे पूओ जेड़े अवा रे एड़े उडी गे कि तिना रा कोई पता नि रया ओर से पात्थर जो मूर्तिया पाँदे लगेया था, से बड़ा पाह्ड़ बणी की सारी तरतिया रे फैलीगा। 36 सुफना तो ईंयाँ ई ऊआ ओर एबे आसे तिजी रा मतलब राजे गे समजयाई देऊँए। 37 ओ राजा, तूँ तो महाराजा ए, कऊँकि स्वर्गो रे परमेशरे ताखे राज, सामर्थ, शक्ति ओर महिमा देई राखी 38 ओर जेती केथी माणूं रओए, तेती तिने सेयो सब ओर मैदानो रे जीव-जन्तु ओर तूँ तिना सबी रा अधिकारी ठराई राखेया। ये सूईने रा सिर तूँई ए। 39 पर तेरा राज खत्म ऊणे ते बाद, एक ओर महान राज्य ऊणा, पर से तेरे राजो जेड़ा महान नि ऊणा। मूर्तिया रे चाँदिए वाल़ा इस्सा ये बताओआ कि एक ओर तीजा महान राज्य ऊणा जेसरे राजे सारी तरतिया पाँदे राज करना। मूर्तिया रे पीतल़ी वाल़ा इस्सा तेस राज्य खे बताओआ। 40 तेस राजो रे खत्म ऊणे ते बाद एक ओर चौथा महान राज्य लोए जेड़ा मजबूत ऊणा। तेस राजो दे जो सेना ऊणी तेसा पिछले सब राज्य नाश करी देणे, ठीक तेड़े ई जेड़े लोआ सबी चीजा खे नाश करी देयोआ जेस पाँदे से अमला करोआ। 41 तैं जो मूर्तिया रे पैर ओर तिना री गूठिया देखिया, जो कुछ कुम्हारो री माट्टी ओर कुछ लोए री थिया, इजी ते से चौथा राज बाँडेया रा ऊणा, तेबे बी तिदे लोए रा जा करड़ा रणा, जेड़ा कि तैं कुम्हारो री माट्टिया साथे लोआ बी मिलेया रा देखेया था। 42 तेस राज्य रे कुछ इस्से लोए जेड़े मजबूत ऊणे, पर कुछ इस्से कट्ठे नि रणे, जेड़े लोआ ओर माट्टी कट्ठे नि रंदे। 43 मूर्तिया दे लोए ओर माट्टिया रा मिलणा ये बी बताओआ कि जो राज्य एकी दूजे ते लग ऊई जाओए, तिना रे राजेया आपू बीचे गठबंदन बनाणे री कोशिश करनी कऊँकि तिना राज्या रे राजे एकी दूजे रे परिवार आपू बीचे ब्या करी लओए। पर ये सफल नि ऊणा, जेड़े लोआ ओर माट्टी कट्ठे नि चिपकदे। 44 तिना कुछ माट्टी ओर कुछ लोए रे राजेया रे दिना दे स्वर्गो रे परमेशरो, एक एड़ा राज उदय करना, जो अनन्तकालो तक नि टूटणा ओर ना से केई दूजी जातिया रे आथो रे कित्तेया जाणा। बल्कि तेस सेयो सारे राज चूर-चूर करने ओर तिना रा अन्त करी देणा ओर से सदा स्थिर रणा;*2:44 प्रका. 11:15 45 जेड़ा तैं देखेया कि एक पात्थर केसी रे आथो ते बिना खणे पाह्ड़ो ते उखड़ी गा ओर तिने लोआ, पीतल़, माट्टी, चाँदी ओर सूईना चूर-चूर करी ता, ईंयाँ महान परमेशरे राजे खे बताई राखेया कि इजी ते बाद क्या-क्या ऊणे वाल़ा ए। ओर तूँ तेस सुफने रे मतलबो रे बारे दे जो मैं तुसा खे बताई राखेया, तेते पाँदे परोसा करी सकोए।" 46 इतणा सुणी की नबूकदनेस्सर राजा मुंए रे पारे थाले पड़ी की दानिय्येलो गे माथा तेकेया ओर आज्ञा दित्ती कि तेसगे पेंट चढ़ाओ ओर तेस सामणे खुशबूदार चीजा बाल़ो। 47 तेबे राजे दानिय्येलो खे बोलेया, "सच्च तो ये कि तुसा लोका रा परमेशर, सबी परमेशरो रा परमेशर ए, राजेया रा राजा ओर पेतो खे खोलणे वाल़ा ए, तेबेई तूँ ये पेत बताई सकेया।"*2:47 बिध. 10:17

दानिय्येल ओर तेसरे दोस्ता री बढ़ोतरी

48 तेबे राजे दानिय्येलो खे बड़ा पद दित्तेया ओर तेसखे बऊत बड़े-बड़े दान दित्ते ओर ये आज्ञा दित्ती कि से बेबीलोनो रे सारे देशो पाँदे परदान ओर बेबीलोनो रे सबी पण्डता पाँदे मुख्य परदान आ। 49 तेबे दानिय्येले आपणे दोस्ता रिया तँईं राजे ते बिनती कित्ती ओर राजे शद्रक, मेशक ओर अबेदनगो खे बेबीलोनो रे सारे देशो दे कामो पाँदे मुखिया नियुक्त करी ता, पर दानिय्येल आपू राजे रे दरबारो दे रओ था।